1, 2. Цадок кем болгон? (1 Летопись 12:22, 26—28).

 САНААГАРГА јурап ийигер: Хеврон деп јердиҥ кайа-ташту јерлеринде 340000 ажык эр улус јуулышкан. Олор ары Давидти бӱдӱн Израильге каан болзын деп тургузарга келген. Анда ӱч кӱнниҥ туркунына кайда ла улустыҥ куучын-комуды, кокыр-каткызы, Кудайды мактаган кожоҥ-јаҥарлары кӱӱлеп турды (1 Лет. 12:39). Ол улустыҥ ортозында Цадок деп кижи болгон. Айландыра улустаҥ ол незиле де аҥыланбаган болор. Је Кудай ого ајару эткен. Бисти де ого ајару этсин деп кӱӱнзеген. (1 Летопись 12:22, 26—28 кычырыгар.) Цадок кем болгон?

² Цадок абыс болгон ло Авиафар деп улу абысла кожо иштеген. Анайда ок Кудайдыҥ болужыла сӱреен ойгор ло оныҥ табын аайлап ийер јайалталу кижи болгон (2 Сам. 15:27). Оныҥ да учун улус јӧп сураарга, ого баштанып туратан. Бого коштой ол јалтанбас болорыла аҥыланган. Бу јӧрмӧлдӧ бис шак ла бу кылык-јаҥ керегинде куучындажарыс.

3. а) Иегованыҥ ишчилерине нениҥ учун коркыбас болор керек? б) Бу јӧрмӧлдӧ нени шӱӱжерис?

³ Калганчы кӱндерде Сатананыҥ табарулары там тыҥыйт (1 Пётр 5:8). Оныҥ да учун бис Сатананыҥ ла оныҥ калју телекейиниҥ јоголтылатан ӧйин коркышту тыҥ сакып јадыс (Сар. 31:24). Је бу ӧй келгелекте биске Кудайдыҥ Каандыгына јӧмӧжӧр, ака-эјелериске болужар ла Иеговага чындык артар керек. Анайып эдерге коркыбас болор керек. Оныҥ учун Цадоктыҥ темин кӧрӱп ийектер.

 КУДАЙДЫҤ КААНДЫГЫНА ЈӦМӦЖИГЕР

4. Кудайдыҥ Каандыгын јӧмӧӧргӧ нениҥ учун јалтанбас болор керек? (Јурукты база кӧрӱгер.)

⁴ Бис, Иегованыҥ Керечилери, Кудайдыҥ Каандыгын талдап алга́ныс ла бастыра јӱрегисле оны јӧмӧп јадыс (Матф. 6:33). Је бу јеҥил эмес. Нениҥ учун дезе бис Сатананыҥ калју телекейинде Кудайдыҥ нормаларыла јӱрӱп јадыс ла сӱӱнчилӱ јар јарлап јадыс (1 Фес. 2:2). Анайда ок там ла кӧптӧп бараткан политический блааш-тартышту куучындарга киришпей јадыс (Иоанн 18:36). Иегованыҥ Керечилерин черӱге барбай турганы учун ла политикага киришпей турганы учун согуп, тӱрмелеп, акча-јӧӧжӧзин айрып алат. Оныҥ да учун биске јалтанбас болор керек.

5. Цадокко Давид учун јуулажарга, нениҥ учун јалтанбас болор керек болгон?

⁵ Цадок Хеврондӧӧн јӱк ле Давидти каан эдип тургузып јатканын кӧрӧргӧ келген эмес, ол јуулажарга да белетенип алган (1 Лет. 12:38). Бу јиит уул Давид учун јуулажарга, Израильди ӧштӱлердеҥ корулаарга, бек шӱӱп алган болгон. Је ол абыс болгон, оныҥ учун ондо, байла, јуулажатан ченемел ас болгон болор. Андый да болзо, Цадок недеҥ де коркыбас кижи болгон.

6. Цадок Давидтеҥ неге ӱренер аргалу болгон? (Сарын 138:3).

⁶ Цадокко јалтанбас кижи болуп каларга не болушкан? Оны айландыра кӱчтӱ ле јалтанбас улус болгон. Бу эр улус Цадокко тем болгон болор. Олордыҥ бирӱзи Давид каан. Ол Израильдиҥ јуучылдарыныҥ јалтанбас башчызы болгон. Агару Бичикте ол керегинде «Израильди јуу-согуштарга баштап апаратан» деп айдылган. Оныҥ да учун израильтяндар оны каан этире тургузарга кӱӱнзеген (1 Лет. 11:1, 2). Давид јуулажып барза, јаантайын Иеговага иженип туратан (Сар. 28:7;  Сарын 138:3 кычырыгар). Цадоктыҥ јанында тем алгадый ӧскӧ дӧ эр улус болгон: Иодай ла оныҥ Беная деп јалтанбас уулы ла база да 22 башчы (1 Лет. 11:22—25; 12:26—28). Олор Давидти акту јӱрегинеҥ јӧмӧгӧн лӧ оныҥ каандыгын корулаарга белен болгон.

7. а) Бӱгӱнги кӱнде јалтанбас болорыныҥ темин кемдер кӧргӱзет? б) Нси́лу деп ака керегинде видеоноҥ неге ӱренип алдаар?

⁷ Биске јалтанбас ла кӱчтӱ болорго не болужар? Иегованыҥ башкарар јаҥын јалтанбай корулаган улустар керегинде шӱӱп сананып турар керек. Элдеҥ озо ол бистиҥ Кааныс, Иисус Христос, болгон. Иисус Сатананыҥ телекейинде јадарда политикага бир де киришпеген (Матф. 4:8—11; Иоанн 6:14, 15). Ол анайда ок качан да бойыныҥ ийде-кӱчине иженбей, Иеговага иженип туратан. Бӱгӱнги де кӱнде јалтанбас ла кӱчтӱ улустыҥ темдери бар. Темдектезе, бистиҥ карындаштарыс Кудайга чындык артып, черӱге де барбай јат, политикага да киришпей јат. Олор керегинде бистиҥ jw.org a сайтта айдылат.

АКА-ЭЈЕЛЕРГЕ БОЛУЖЫГАР

8. Аксагалдарга кандый айалгада јалтанбас болорго келижердеҥ айабас?

⁸ Иегованыҥ ишчилерине бой-бойына болужарга јарап јат (2 Кор. 8:4). Је кезикте, темдектезе, јуу-согуштыҥ ӧйинде, олорго бой-бойына сӱӱжин кӧргӱзерге коркымчылу болот. Андый ӧйдӧ ака-эјелерис Агару Бичик, ого тӧзӧлӧнгӧн бичиктер, кийим-тудум ла курсак-тамак јок артып калардаҥ айабас. Оныҥ учун бистиҥ сӱӱштӱ аксагалдарыс олорго керектӱ немени јетирерге, бойыныҥ јӱрӱмин де јылыйтарга белен (Иоанн 15:12, 13). Мынызыла олор Цадокко тӱҥей болодылар.

9. Давид Цадокко кандый јакылта берген? (2 Самуил 15:27—29). (Јурукты база кӧрӱгер.)

⁹ Бир катап Авессалом адазын, Давидти,  ӧлтӱреле, оныҥ ордына каан болуп отурарга сананган (2 Сам. 15:12, 13). Мынаҥ улам Давидке Иерусалимнеҥ тӱрген ле качарга келишкен. Ол јалчыларына айткан: «Јуунадынаар, качар керек! Оноҥ башка ончобыс Авессаломныҥ колына кирерис!» (2 Сам. 15:14). Давидке, улузыла каладаҥ чыгып јадарда, Авессаломныҥ сӱмелӱ пландарын билип турарга бӱдӱмјилӱ улус артыргызып койор керек деп санаа келген. Оныҥ учун ол Цадокко ло ӧскӧ дӧ абыстарга јакылта берип салган. (2 Самуил 15:27—29 кычырыгар.) Је ого коркышту ајарыҥкай болор керек болгон. Не дезе Авессалом бойын сӱӱген, ӧштӧҥкӧй лӧ кара санаалу кижи, олордыҥ нени эдип турганын билип ийзе, олорды куучын јоктоҥ ло ӧлтӱрип салар эди!

10. Цадок ло ӧскӧ дӧ абыстар Давидти канайып аргадаган?

¹⁰ Давид нени эдерин пландап алала, Цадоктоҥ ло база бир најызынаҥ, Хушайдаҥ, болуш сураган (2 Сам. 15:32—37). Бу планла болзо, Хушай озо баштап, Авессаломныҥ бӱдӱмјизине кире берер учурлу. Оныҥ кийнинде табаруны канайып эдерин Авессаломго айдып берер керек. Анайып, Давид Авессаломныҥ табарузына белетенип алар эди. Оныҥ кийнинде Хушай Цадок ло Авиафарды Давидке тил јетирзин деген (2 Сам. 17:8—16). Бу јетирӱ Давидке тӧгӱлбей-чачылбай једип барган (2 Сам. 17:17). Анайып, Цадок ло ӧскӧ дӧ абыстар Иегованыҥ болужыла Давид каанды аргадап алган (2 Сам. 17:21, 22).

11. Ака-эјелерге болужып тура, Цадоктыҥ јалтанбазынаҥ кандый тем алараар?

¹¹ Слерди кӱч айалгага кирген ака-эјелерге болужып берзин деп сураган болзо? Цадоктыҥ јалтанбазынаҥ слер неге ӱренедеер? 1) Башкартуларга сӧсуккур болугар. Кӱч ӧйдӧ биске бирлик болор керек. Оныҥ учун јербойыныҥ Бет-Элинеҥ келген башкартулар аайынча эдигер (Евр. 13:17). А аксагалдар дезе јуун кӱч айалгага белен болзын деп, башкартуларды јаантайын шӱӱжип турар учурлу  (1 Кор. 14:33, 40). 2) Јалтанбас, је ајарыҥкай болугар (Укаа 22:3). Нени-нени эдердеҥ озо, јазап сананып ийигер. Меҥдебегер. Јӱрӱмеерди јеткерлӱ айалгага тургуспагар. 3) Иеговага иженигер. Ака-эјелерге болужар ла керек дейле, слердиҥ јӱрӱмеер јеткерлӱ айалгага кирип калбазын. Иеговага олор до, слер де керектӱ. Ака-эјелерге канайып болушса јакшы болорын оҥдоп ийерге, ол слерге болужып берер.

12, 13. Виктордыҥ ла Виталийдиҥ куучындаган учуралдары бисти неге ӱредет? (Јурукты база кӧрӱгер.)

¹² Эки аксагал, Виктор ло Виталий, Украинада ака-эјелерге курсак-тамак ла суу апарып туратан. Виктор куучындайт: «Бис курсак-тамакты кайдаҥ келижер оноҥ ло алып туратаныс. Бис кезикте адыжып турган ӧйгӧ туштап калатаныс. Бир катап бир ака кӧп курсак-тамак берген. Бу аканыҥ кысканбазынаҥ улам ака-эјелер бир канча ӧйгӧ курсак-тамакту отурган. Курсакты машинага салып турганчас ла бистеҥ 20 метр кире јерге ракета келип тӱшкен. Мынаҥ улам тыҥ коркый бергем, је ака-эјелерге оноҥ ло ары коркыбай болужарга, кере ле тӱжине Иегованаҥ болуш сурагам».

¹³ Виталий ака мынайып куучындайт: «Мында коркышту јалтанбас болор керек болгон. Мениҥ баштапкы јоругым 12 частыҥ туркунына улалган. Бӱдӱн јол Иеговала куучындашкам». Виталий јалтанбас болгон, је бу ок ӧйдӧ ајарыҥкай болгон. Ол айдат: «Мен јаантайын Иегованаҥ ойгор болорго ло јобош болорго болуш сурагам. Мен јӱк ле јаҥдар јарадып салган јолдорло маҥтадып туратам. Ака-эјелердиҥ бир эт-кан чылап бирлик иштенип турганын кӧрӱп, бӱдӱмјим тыҥыган. Олордыҥ кезиги биске јолдордыҥ маршруттарын тургузып туратан, кезиги гуманитарный болуш јууп, машинага салып туратан, а кезиги дезе Виктор ло мени азырап, амырадып туратан».

ИЕГОВАГА ЧЫНДЫК АРТЫГАР

14. Бистиҥ сӱӱген кижибис Иегованы артыргызып салза, бисте кандый сезимдер болот?

¹⁴ Бистиҥ најыбыс эмезе тӧрӧӧнис Иегованы артыргызып салза, коркышту кӱч болот (Сар. 78:40; Укаа 24:10). Канча ла кире јуук болгон болзоос, ончо ло кире ачу болот. Слерде мындый сезимдер болгон болзо, Цадоктыҥ чындык болгоны слерге ийде-кӱч берер.

15. Цадокко Иеговага чындык артарга нениҥ учун јалтанбас болор керек болгон? (1 Каандар 1:5—8).

¹⁵ Цадоктыҥ јуук најызы Авиафар садынып ийерде, Цадок Иеговага чындык артып калган. Бу учурал Давидтиҥ башкарган ӧйиниҥ учында болгон. Давид карый берерде, оныҥ уулы, Адония, адазыныҥ јаҥын блаажарга сананган. Је бу јаҥды Иегова Соломонго берер болгон (1 Лет. 22:9, 10). Андый да болзо, Авиафар Адонияныҥ јанын талдаган. (1 Каандар 1:5—8 кычырыгар.) Анайып, ол јӱк ле Давидти эмес, је Кудайды да садып ийген. Сананып ийзеер де, Цадокко кандый ачу болды не! Ол Авиафарла 40 јылдаҥ ажыра теҥ-тай кожо иштегендер: олор абыстар болгон ло «чындык Кудайдыҥ ковчегин» кичееген (2 Сам. 8:17; 15:29). Бу канча јылдардыҥ туркунына олор экӱ Давидтиҥ каандыгына јӧмӧшкӧн лӧ кӧп-кӧп немени кожо эткилеген (2 Сам. 19:11—14).

16. Иеговага чындык артарга Цадокко не болушкан?

¹⁶ Авиафар садынып ийерде, Цадок Иеговага чындык артып калган. Цадоктыҥ чындык артып каларына Давид бир де алаҥзыбаган. Адонияныҥ сӱмелӱ планы јартала берерде, Давид Цадокко, Нафанга ла Бенаяга Соломонды каан эдип  кӧстӧзин деп јакарган (1 Каан. 1:32—34). Цадоктыҥ јанында мындый јакшы улус болгонынаҥ улам ого олор јаан јӧмӧлтӧ болгон ло Иеговага чындык артарга болушкан (1 Каан. 1:38, 39). Кийнинде Соломон каан болуп отурарда, Цадокты Авиафардыҥ ордына абыс эдип тургузып салган (1 Каан. 2:35).

17. Слердиҥ најыгар эмезе тӧрӧӧнӧӧр Иегованы артыргызып салза, Цадоктоҥ кандый тем алараар?

¹⁷ Цадоктыҥ теминеҥ слер кандый ӱредӱ алар аргалу? Слердиҥ најыгар эмезе тӧрӧӧнӧӧр чындыкты артыргызып салган болзо, Иегованаҥ ла тудунарга бек шӱӱп алыгар (Иис. Н. 24:15). Ол тушта Кудай слерге ийде-кӱч берер ле чын неме эдерге јалтанбаска болужар. Ого иженигер, мӱргӱгер ле Иеговага чындык иштеп турган улустыҥ јанында болугар. Иегова слердиҥ чындык болгоноорды баалап јат ла слерди кыйалта јогынаҥ кайралдаар (2 Сам. 22:26).

18. Марко ло Сидсениҥ теминеҥ неге ӱренедигер?

¹⁸ Ма́рко ло оныҥ ӱйиниҥ, Си́дсениҥ, темин кӧрӱп ийектер. Олордыҥ јаанап калган кыстары чындыкты артыргызып салган. Марко куучындайт: «Балаҥды баштапкы ла катап колыҥа алып ийзеҥ, тыҥ карузый бередиҥ. Балаҥды корулаарга, нени ле эдериҥ деп оҥдоп јадыҥ. Оныҥ учун кыстарыс Иегованы артыргызып саларда, айдары јок ачу болгон». Марко оноҥ ары айдат: «Иегова јаантайын бистиҥ јаныста болгон. Ол бисти бой-бойыстыҥ кӱӱн-санаасты кӧдӱрижип турзын деп кӱӱнзеткен. Качан менде ийде-кӱч јок болзо, меге ӱйим болушкан. Ол уйадай берзе — мен ого». Сидсе айдат: «Иегованыҥ болужы јогынаҥ бу ченелтени ӧдӱп болбос эдис. Мен бу ончо немеде бойымды бурулап, Иеговага куучындагам. Бир канча кӱннеҥ Каандыктыҥ Туразына келеримде, канча јыл кӧрбӧгӧн эје меге јууктап келеле, мени кучактап, кӧзиме кӧрӱп, айткан: „Кару Сидсе, мында сениҥ бурууҥ јок“. Иегова мени бир де артыргыспай јат ла сӱӱнчимди јылыйтпаска болужат».

19. Бу јӧрмӧлди ӱренеле, кандый амадулар тургузып алдаар?

¹⁹ Иегова ончо ишчилерин Цадок чылап коркыбас болзын деп кӱӱнзеп јат (2 Тим. 1:7). Је бу јӱк бойыстыҥ ийде-кӱчиске иженерин кӧргӱспей јат. Бистиҥ Кудайыс бисти ого ижензин деп кӱӱнзеп јат. Слерге јалтанбас болоры јетпей турган болзо, Иегованаҥ сурагар. Ол слерге Цадоктый коркыбас болорго болужар! (1 Пётр 5:10).