ከሦስት አራተኛ በላይ የሚሆነው የዓለም ሕዝብ የሚኖረው በመንግሥት ፖሊሲ ወይም በሕዝብ ጥላቻ ምክንያት በሃይማኖት ላይ ከፍተኛ ገደብ በተደረገባቸው አገሮች ውስጥ ነው። አናሳ በሆኑ ሃይማኖታዊ ቡድኖች ላይ ጥቃት የሚፈጸምባቸው አገሮች ቁጥር በቅርቡ ባሳለፍናቸው አምስት ዓመታት ውስጥ በእጥፍ ገደማ ጨምሯል።

እስቲ አስበው፦ አንዳንድ ሰዎች ለሃይማኖት ጥላቻ የሚኖራቸው በየትኞቹ ተቃራኒ ምክንያቶች ሊሆን ይችላል?—ማቴዎስ 23:27, 28፤ ዮሐንስ 15:19

የቀድሞው ጠቅላይ ሚኒስትር ቶኒ ብሌር ኦብዘርቨር በተሰኘ ጋዜጣ ላይ እንደጻፉት ከቅርብ ጊዜ ወዲህ ለሚታዩት የሽብር ጥቃቶች ዋነኛው መንስኤ ሃይማኖታዊ ጽንፈኝነት ነው። እንዲህ ብለዋል፦ “በ20ኛው ክፍለ ዘመን እንደነበረው ሁሉ በዚህ ክፍለ ዘመን ለሚደረጉት ጦርነቶችም መንስኤው ፖለቲካዊ ጽንፈኝነት ነው ብሎ ማሰብ የማይመስል ነገር ነው፤ ከዚህ ይልቅ ጦርነቶቹ በባሕል ወይም በሃይማኖታዊ ልዩነቶች ምክንያት በቀላሉ በሚቀሰቀሱ ውዝግቦች ሳቢያ የተነሱ ናቸው።”

እስቲ አስበው፦ ሃይማኖት ብዙውን ጊዜ ለግጭት መንስኤ የሆነው ለምንድን ነው?—ማርቆስ 7:6-8

የአውስትራሊያ ስታቲስቲክስ ቢሮ ባወጣው ሪፖርት መሠረት ከ5 የአውስትራሊያ ዜጎች 1ዱ የየትኛውም የሃይማኖት ድርጅት አባል እንዳልሆነ ይናገራል። በዚያ ላይ ደግሞ ሪፖርቱ እንደገለጸው ከሆነ “አንድ ሰው የአንድ ሃይማኖት ድርጅት አባል እንደሆነ መናገሩ በሃይማኖታዊ እንቅስቃሴዎች ውስጥ ንቁ ተሳትፎ እንደሚያደርግ አያሳይም።” ሃይማኖት እንዳላቸው ከተናገሩት ሰዎች መካከል በሃይማኖታዊ እንቅስቃሴዎች ላይ አዘውትረው እንደሚሳተፉ የገለጹት 15 በመቶ የሚሆኑት ወንዶችና እና 22 በመቶ የሚሆኑት ሴቶች ብቻ ናቸው።