Pu ngüneduamquelu ti callfü huenu tañi pelontual, astrologo pingelu, feyentuquei pu huangülen, cüyen ca pu planeta ñi coneltulequen com pu che ñi mongen meu. Pu adümquelu tüfachi pelontun dungu feipiquei choyüngelu quiñe che, ñi chumlen com ti müleyelu callfü huenu meu adcünuquei tañi chumngechi chengeal ca tañi chumlerpual.

Tüfachi quimeltun rume cuifi tuhun-ngei Babilonia mu, huelu petu adümngequei. Fentren che feyentuquei ñi feipiqueel pu ngüneduamquelu ti callfü huenu. Huelu, ¿manelfalngepei mai? ¡Femlai tati! Ngüneduamaiñ chumngelu.

• Pu astrologo feipiquei pu planeta ca huangülen adcünuquefi pu che tañi mongen, huelu feingelai.

• Quisu engün cüme quimfalcünuquelai chem ñi rupayal, feimu tañi feipicünuel engün legtripayafui chem che rume tañi mongen mu.

• Pu pelontuchequelu entuquei tañi feipiqueel cuifi quimeltun mu: pu planeta tañi huallon rupaquen inafül mapu. Huelu feingelai tüfa, tati planeta huallon rupaquei inafül antü.

• Caquerumei ñi feipicünuqueel pu pelontuchequelu tañi chumlerpual ñi mongen quiñe che.

• Troquingequei tati signos zodiacales quimfalquei pu che tañi chumngen. Huelu rüfngelai tüfachi dungu, feichi pu che trür choyüngelu quiñe antü mu, caquerumequei ñi chumngen engün. Feimu pu pelontuchequelu rüf quimnienofilu rume pu che, pecan feipicünuquei tañi chumngen ca femquen engün. ¿Ayüafuimi tami femngechi juzgangeal tami quimngenon mu rume?

Fütra cuifi, pu che ramtuquefi tati pelontuchequelu. Tüfa engün tañi pelontual ngüneduamquefui pu che ca pu culliñ ñi llauquetu cam chumngechi ti alca ñi pitrongquefiel tañi quetran. Caquelu che inaduamquefui tañi chumlen tapül te ca ñi chumlehuen ta cafe. Famülque mu, pu pelontuchequelu adümniequei carta de tarot, bola de cristal, dados, ca caquelu chemcün tañi feipicünual ñi chumlerpual ta che. ¿Manelfalngepei mai tüfa? Femlai tati. Ngüneduamaiñ chumngelu.

Quiñeucülelai tañi feipiqueel engün. Huelulcadunguuquei pu pelontuchequelu adümniequelu caque rume dungu tañi pelontual. Ca adümnielu rume quiñe dungu müten, quiñeucülelai tañi feipin engün. Raquiduamnge tüfa, quiñe che ayüfule tañi pehutuaeteu carta mu epu pelontuchequelu, mür femngeafulu ñi feipin engu. Huelu, müte femquelai tüfa.

Fentren che feipiquei pu pelontuchequelu ñi cüdauquenon cüme duam mu. Quiñeque che pecan chemcün müten troquiquefi ti carta ca bola de cristal. Ca feipiqueingün ti pelontuchequelu ngüneduamquelai rume tañi chemcün, huelu mai re leliniequefi ñi chumngentuhual ta che. Quiñe adümuucülechi pelontuchequelu ramtucaquefi ti che ca ngüneduamüñmaquefi tañi huiñoldungun ca tañi femün, femngechi quimquei tañi chem pial. Feimu pelontufaluhun mu, re feipiquei tañi quimfalcünuleteu ti che fei tañi quimnon rume. Quiñeque pelontuchequelu fentren plata cofraquefi ta che, deu maneluucülelu tañi cüdau mu engün.

Ti pelontun dungu quimeltuquei ñi deu feipicünungeel com taiñ chumal mongen mu ca taiñ chumlerpual. Huelu, ¿rüfngepei mai? Biblia feipiquei taiñ elungeel dullial chem chumal ca chem taiñ feyentual iñchiñ, feimu taiñ dulliel cümelcayafeiñmu cam huesalcayafeiñmu (Josué 24:15).

Huelu fei ca müten no, Chau Ngünechen üdequefi com dungu nüucülelu pelontun dungu mu, feimu pu poyequefilu ta Chau Dios famentuquei feichi quimün. Biblia ta feipilei: “Ngelai ñi müleal eimi meu [...] inei no rume pelontuchequelu, adümcantuquelu ti calcu dungu, pehutuhun, calcu che, inei no rume dauquelu, inei no rume ramtuquelu tati rangiñelhuelelu ta pu huesaque püllü meu ca pu che engün meu, cam amuquelu quiñe pelontuchequelu meu, ca inei no rume ramtuquelu tati pu la. Com ti che femquelu tüfachi dungu, ünufalngei ta Jehová a mu” (Deuteronomio 18:10-12).