Kostas feipi: “Sofía a iñche tañi domongefui doi 39 tripantu mu, huelu fentreñma cutrancülefui, fei larpui. Tañi pu hueni quelluqueneu ca fillque dungu femquefun, huelu ti hunen tripantu rume hueñancülequefun, calerumequefui tañi chum duamcülen. Deu rupai cüla tripantu, huelu quiñeque mu hueñancürumequen”.

Eimi, ¿layeluhuimi cai? Feingele, feichi huentru reque duamcüleimi chi. Rume huesa duamelqueiñmu ñi lan taiñ afcadi, quiñe taiñ pu che cam hueni. Femngechi pengeli pu estudiaquelu pu che ñi layeluhun. Quiñe revista feipi: “Tati layeluulu raquiduamquei turpu ñi pehuetunoafiel tañi che lalu, fei rume cutrantupiuqueleingün” (revista The American Journal of Psychiatry). Fei quiñe che rupalu femngechi dungu mu ramtuhuafui: “¿Tunteñmayai tañi hueñancün? ¿Huiño ayüucületuan mai? ¿Chumngechi huiño nehuencontuan?”.

Tüfachi revista mu peaimi ti huiñoldungun. Ti cüpalechi troquiñ mu nütramcangei quiñeque dungu tami rupayafel tami layeluhun mu. Caquelu troquiñ mu peaimi quiñeque ngülam tami cüme duamtual.

Ayüleiñ com pu layeluulu ñi peal quellun ca yafüluhun tüfachi revista mu.