‘Chaw Dios eluaeymünmew kom tamün ngillatufiel iñche ñi üy mew’ (Juan 16:⁠23).

Tüfa Jesus ñi feypin tati. Fey kimeltueiñmu kiñe falin dungu. ¿Chem dungu am? Jewba ayükey taiñ ngillatuafiel ta kidu, Jesus tañi üy mew müten. Jewba ayükelay taiñ ngillatuafiel kiñe rewe mew, kiñe santo kam adentun mew no rume. Ka femngechi kiñe la kam kiñe püllü ñi üy mew no rume. Llellipufiel mu ta Chaw Dios Jesus ñi üy mew, pengelkeiñ taiñ falintukefiel kidu tañi femün iñchiñ mew. Feymu Jesus feypi: “Iñche mew pepi puwün-ngey ta Chaw mew” (Juan 14:⁠6).

“Chaw Dios ñi adkiñ mew nülanentumün reke tamün piwke” (Salmo 62:⁠8).

Chumngechi kiñe pichiche nütramkakefi tañi Chaw, ka femngechi iñchiñ nütramkayafiyiñ ta Jewba. Feymu papeltulayaiñ chem taiñ ngillatual ka wiño feypimekelayaiñ taiñ ngillatuel. Doy may piwke mew tripape taiñ ngillatun.

“Ngillatufiliyiñ chem rume taiñ duamtuel kidu ñi piel mew, fey allküñmayaeiñmew taiñ ngillatukefiel” (1 Juan 5:⁠14).

Biblia mew, Chaw Jewba feypieiñmu chem müley taiñ femal iñchiñ femngechi taiñ ayüwülafiel. Feymu taiñ allkütungeal, müley taiñ llellipuafiel ta Chaw Ngünechen chumngechi ñi ayükeel kidu. ¿Chumngechi kimafuiñ? Müley taiñ chillkatual ta Biblia. Femliyiñ kom tüfa, taiñ llellipun mew ayüwülafiyiñ ta Ngünechen.

Ngillatuafiyiñ chem no rume taiñ faltalenoal. Llellipuafuiñ ta Chaw Dios taiñ eluaetew iyael, takun kam chew mongeleam. Kafey llellipuafuiñ taiñ eluaetew kimün, femngechi taiñ küme dullial chem chumal. Kafey taiñ eluaetew newen, femngechi taiñ chaftuafiel fillke wedake dungu mu taiñ rupameken. ¿Ka chem dungu mu llellipuafuiñ? Taiñ kelluaetew doy feyentual, taiñ perdonayaetew ka taiñ kelluaetew küme trekayawal taiñ mongen mew (Luka 11:⁠3, 4, 13; Santiaw 1:⁠5, 17).

Ngillatuñmanieafimi kakelu che. Biblia feypi: “Ngillatuñmawmün welukonke” (Santiaw 5:⁠16). Pu chaw rume ayükey ñi piwkeyewken tañi pu pichikeche. Iñchiñ Chaw Jewba tañi yall, fey welukonke piwkeyeniewliyiñ ka duamtuniewliyiñ, Chaw Jewba rume ayüway. Eymi llellipuafuymi ta Chaw Dios ñi kelluafiel tami füta, tami domo, tami familia, tami pu yall kam tami pu weni.

Crasia may pifinge. Chaw Jewba eli kom tati mülelu. Ngüneduamnge ñi feypin Biblia kidu mew: “Chumkawnorume elkünulay ñi pengelal ti kümeke dungu ñi femken, kidu tati werkülkeeymünmew ta mawün ka küme ngelkaketranün ka elukeeymünmew tamün duamtuelchi iyael, femngechi tamün ayüwküleam” (Hecho 14:⁠17). Rakiduamliyiñ kom ti kümeke dungu taiñ eluetew Jewba, doy eluwküleaiñ taiñ mañumafiel ngillatun mew. ¿Ka chem chumafuiñ taiñ mañumafiel ta Chaw Dios? Inanieafiyiñ kidu tañi werkün dungu (Kolosense 3:⁠15).

Kiñeke mu weda duamnagafuiñ taiñ pürüm wiñoldungunoetew Jewba. Fey rakiduamafuiñ: “Chaw Dios duamtukelaenew”. Welu ¿rüfngepey may tüfa? Femlay tati. Inaduamaiñ kiñeke che ñi rupan pengeli chumngelu fente falin-ngen fentekünunoal taiñ ngillatuken.

Ti wünen trokiñ tüfachi revista mu, inaduamiyiñ Esteban tañi rupan, ¿acordaymi kay? Kidu feypi: “Af duamkülefun, welu fente tañi ngillatun mew ayüwkületun” pi. ¿Chem kellueyew? Eluwi tañi papeltuafiel ta Biblia, fey kimürpuy fente falin-ngen llellipual ka fentekünulay ñi femal. Esteban feypi: “Iñche tañi pu weni müna piwkeyeenew ka dapikeenew, feymu mañumtukefiñ ta Chaw Dios. Fente tañi tremün, turpu pekelafun femngechi ayüwün”.

¿Acordaymi ñi rupan Jeni? Kidu wedake dungu femkefuy kuyfi. Fey rakiduami turpu allkütunoaetew ta Chaw Dios. Fente tañi weda duamkülen mew, chengewelafuy. Kimlafuy chumngelu ñi fente weda duamkülekefel, feymu ngillatufi ta Ngünechen. Fey ¿chumngechi kellueyew ta Chaw Dios? Jeni feypi: “Ngillatufiñ ta Chaw Dios, fey doy culpantukuw-welan. Fey tunte culpantukuwfuli iñche, Chaw Jewba femngechi rakiduamkelay. Fey tüfa küme duamelkeenew ka kellukeenew ñi ayüwküleal tañi mongen mu”. ¿Ka chumngechi kellueyew llellipual? Kidu feypi: “Fewla kiñe küme chaw reke niefiñ ta Jewba, ka fente küme weniyefiñ. Kimnien Jewba fente piwkeyekeenew. Feymu adniekeenew ka kellukeenew femal tañi pin”.

Ngüneduamnge ñi rupan kiñe domo, Isabel pingelu. Niepüñeñkülelu Isabel, ti doctor feypieyew ñi püñeñ ñi lañmaleal ñi cuerpo. Fey af duamkülewey. Kenü ngülamtungey ñi angkanentupüñeñal kütu. Kidu feypi: “Latripayalu reke fente tañi kutrankawün” pi. ¿Chumi kidu? Feypi: “Fentekünulan ñi ngillatuafiel ta Chaw Dios” pi. Rupalu chi antü choyüy tañi püñeñ, Gerard pintukuleleyew. Fey lañmalefuy ñi cuerpo. Isabel, ¿rakiduampey may Chaw Dios ñi wiñoldungunoetew? Femlay. Doy may kidu feypi: “Lañmalelu rume ñi cuerpo, tañi püñeñ ayüwkülekey. Jewba allkütuenew ka kümelkaenew iñche tañi püñeñ mu”.

Taiñ inaduampeel rakiduameleiñmu chem pin tati Biblia. Fey feypi: “Awem Jewba, eymi allkütuñmayafimi pu ñomngelu ñi ngillatun. Yafülpiwkeyeafimi ka ngüneytunieafimi engün” (Salmo 10:⁠17). ¿Kümenoafulu ngillatuafiel ta Ngünechen?

Biblia mew wirintukungey fillke llellipun ñi feypiel Jesus. Kiñe tüfa fey tati padrenuestro pingechi llellipun. ¿Chem kimürpuafuiñ tüfachi llellipun mu?