Wall Mapu mu fentren che trokikey tati Navidad mu kawiñmangekey Jesukristo ñi choyüngen. Welu pu weniyefilu ta Jesus, pu apostol ka ñi inanieetew, ¿kawiñmakefuyngün tati Navidad? Ka ¿rüf kimnieymi Biblia ñi feypilen ti puwültripantun mu? Peal ti wiñoldungun tüfachi ramtun kelluaeiñmu taiñ kimal ñi kümen kam ñi kümenon pu kristiano ñi kawiñmayal ti Navidad.

Wüne, ti Biblia feypilay ñi kawiñmangekefel ñi choyüngen Jesus kam kakelu poyekefilu ta Chaw Dios. Biblia nütramkay epu che müten kawiñmakefulu ñi puwültripantun, ka wedake dungu rupay tüfa mu, fey engu poyekelafuyngu ta Chaw Jewba, tati rüfngechi Ngünechen (Génesis 40:20; Marku 6:21). Femngechi feypiley kiñe lifru, pu wünen kristiano famentukefuyngün “ti koyla wimtun ñi kawiñmangeal ti puwültripantun” (Encyclopædia Britannica).

Tati Biblia feypilay chem antü ñi choyüngen Jesus. Kiñe lifru feypi: “Ti Nuevo Testamento ka chem lifru no rume feypilay chumül ñi choyüngen Jesus” (Cyclopedia ñi entuel McClintock ka Strong). Jesus ayüfule tañi pu inanieetew ñi kawiñmayal tañi puwültripantun, feypiafuy chi chumül ñi choyüngen.

Epungelu, Biblia feypikelay Jesus kam tañi pu inanieetew ñi kawiñmakefel ti Navidad. Tati wünen rupa ñi kawiñmangeel ti Navidad wirintukungey “Filócalo ñi Cronógrafo mu, tüfa ta kiñe kalendario Roma tuwün-ngelu ka 336 tripantu [taiñ mülen antü] ñi dewmangeel”, feypi ti lifru New Catholic Encyclopedia pingelu. Fey llemay, tüfa rupay fentren tripantu ñi dewelkalen ti Biblia ka fentren warangka tripantu Jesus ñi mülepan Mapu mu. Feymu McClintock ka Strong feypingu: “Tati kawiñmangekeelchi antü Navidad pingelu, Chaw Ngünechen werkükelaeiñmu ñi kawiñmangeal, ka tati Nuevo Testamento tuwlay”. *

Jesus, ti Fütra Kimeltuchefe, küme werküfi tañi pu inanieetew chem ñi femal engün, ka tüfa Biblia mu müley. Welu ñi kawiñmangeal ti Navidad Biblia mu tuwlay. Kiñe kimeltufe ayükey tañi pu chillkatukelu ñi doy amulkünunoal tañi werküetew ñi femal. Ka femngechi Jesus werküfi tañi pu inanieetew ñi “doy amulkünunoael tati wirilechi dungu mew” (1 Korintio 4:6).

Welu may, tati pu wünenke kristiano rume falintukefuyngün ti trawün ñi akordangeal Jesus ñi lan. Jesus feypifi tañi pu inanieetew chumngechi ñi femngeal ka chumül ñi trawüluwal engün. Tüfachi werkün dungu ka ti antü ñi lan Jesus müley Biblia mu (Luka 22:7, 19; 1 Korintio 11:25).

Chumngechi taiñ ngüneduampeel nga, tati Navidad kiñe puwültripantungey, ka pu wünenke kristiano famentukefuyngün tüfachi koyla wimtun. Doy may, Biblia feypikelay Jesus kam kakelu che no rume ñi kawiñmakefel ti Navidad. Feymu fentren kristiano wall Mapu mu kimürpuyngün ñi kümenon kawiñmayal ti Navidad.