• TRIPANTU ÑI CHOYÜNGEEL: 1941

• CHEU ÑI TUHUN: BENÍN

• ÑI RUPAN: NIEFUI FENTREN DOMO CA CAIÑETUQUEFUI JEHOVÁ ÑI PU CHE

TAÑI CUIFI MONGEN:

Choyüngen quiñe fütra huaria mu Cotonou pingelu, Benín troquiñ mapu mu. Quimeltungen pu catolico ñi feyentun, huelu quiñeque rupa müten amuquefun iglesia mu. Fentren catolico niefui alün domo, cümelu troquingequefui ta tüfa. Iñche ca nierquefun meli domo.

1970 tripantu, Benín troquiñ mapu mu pu che pofolcahuingün. Doi cümeletuai tañi pais piquefun. Feimu quelluntucuquefun ti pofolcahun, fei conquefun politica dungu mu. Pu pofolcaquelu huesa troquiquefingün Jehová ñi pu che ñi coneltulenon politica dungu. Feimu quiñentrür caiñetuquefuiñ engün. 1976 tripantu huemünentungei pu misionero tañi pais mu, turpu huiñotulayai engün piquefun.

TI BIBLIA CÜME ELCÜNUTUENEU ÑI MONGEN:

1990 tripantu fentepui ti pofolcan dungu. Fei pichiñma rupalu huiñotui pu misionero testigongelu. Afmatulehuen, ¿quellupelaeyu Chau Dios? piquefun. Feichi mu nietun cangelu cüdau, quiñe tañi chaf cüdaufe Dunguquelu Ineingen Jehová ngei, fei dungueneu chem tañi feyentuqueel. Papeltuleneu quiñeque versiculo feipilu Jehová nor dungu femquei ca piuqueyechequei (Deuteronomio 32:4; 1 Juan 4:8). Rume ayüfiñ ñi allcütuel tüfa. Ayüfun ñi doi quimal, feimu cümelu troquifiñ ñi quimelngeal Biblia.

Feimeu müten eluhun ñi trahuluhual pu Dunguquelu Ineingen Jehová engün. Afmatuleneu ñi rüf piuqueyeuquen engün. Inei no rume illamngequelai tañi tuhun cam tañi nieel. Doi mülelu iñche fei engün meu, doi ngüneduamquefun ñi rüf inaniefiel ta Jesús (Juan 13:35).

Ngüneduamün ñi duamfalngen elcünual ti iglesia catolica, fei ñi serfiafiel ta Chau Jehová. Cüdaungefui, chem piafui pu che raquiduamquefun. Jehová ñochiquechi quelluqueneu ñi nehuen piuquecünuhual, fei elcünun ti iglesia.

Huelu mülefui ñi femal cangelu cüdaungechi dungu. Tati Biblia feipi Chau Dios eluquelai quiñe che ñi nieal fentren afcadi (Génesis 2:18-24; Mateo 19:4-6). Chau Jehová ayüquei iñche ñi nieafiel tañi hunen domo müten. Feimu niehuiyu chumngechi feipi ti ley. Feipifiñ tañi caquelu cüla domo ñi amutual. Huelu elufiñ com tañi duamnieel. Rupalu ta antü, epu tüfachi domo Dunguquelu Ineingen Jehová ngerpuingu.

CHEM CÜMELCAN LLOHUN:

Tañi domo petu coneltulei ti iglesia catolica, huelu caiñetulaeneu iñche ñi serfifiel ta Chau Jehová. Trür ngüneduamqueyu ñi doi cüme huentrungen iñche.

Cuifi cüpa coneltulefun politica dungu mu, femngechi ñi com cümecünutual. Huelu felehuelai. Feula quimnien, Chau Ngünechen ngünenietule ta Mapu, fei müten com cüme feletuai (Mateo 6:9, 10). Rume mañumniefiñ ta Chau Ngünechen ñi quimeltueteu iñche. Feula rüf ayüucülequen.

• TRIPANTU ÑI CHOYÜNGEEL: 1977

• CHEU ÑI TUHUN: BRASIL

• ÑI RUPAN: PASTOR PENTECOSTAL

TAÑI CUIFI MONGEN:

Iñche tremün Itu huaria, São Paulo troquiñ mapu mu. Tüfa mu rume huesalcalei ta che.

Conquefun pecan cudumuhun, rume quehuaquefun ca fendequefun droga. Huelu ngüneduamün carceltucungeafun quiñe antü cam layafun. Feimu com elcünufiñ. Fei hula conün ti iglesia pentecostal, pastorngerpun.

Raquiduamquefun conli ta iglesia mu, quelluchean piquefun. Feimu nierquefun quiñe programa radio mu. Feichi lof püle cüme quimngerpui tañi üi. Huelu ñochiquechi ngüneduamün ti iglesia ñi duamtuquenofiel tañi pu che. Püramyelafingün rume ta Chau Dios. Re falintuquefingün ñi trapümal plata. Feimu elcünun ti iglesia.

TI BIBLIA CÜME ELCÜNUTUENEU ÑI MONGEN:

Hue quimelngelu iñche Biblia pu Dunguquelu Ineingen Jehová engün, ngüneduamün ñi trürnon caquelu religion mu. Epu dungu afmatuleneu: 1) Re nütramcaquelaingün ñi piuqueyeafiel ta Chau Dios ca tañi chafche, doi mai pengelqueingün tañi piuqueyen. 2) Conquelai engün politica dungu mu, hueichan no rume (Isaías 2:4). Tüfachi epu dungu raquiduameleneu ñi pefiel ti rüf religion. Tüfa tati pichi rupachi hulngiñ yeniefilu ta che rumel mongen meu (Mateo 7:13, 14).

Ngüneduamün ñi duamfalngen cüme elcünutual tañi mongen. Femngechi ñi ayühuelafiel ta Chau Dios. Mülefui ñi ñom piuquengeal ca doi müleal quiñentrür tañi familia iñchiñ. Cüdaungefui cüme elcünutual tañi cuifi mongen. Huelu Chau Jehová quellueneu tañi femürpual. Tañi domo hune eluhui ñi quimelngeal Biblia. Fei afmatulehuei iñche tañi femün mu, yafüluhui ñi doi hueniyeafiel ta Chau Dios. Pichiñma mu feipicünuhuiyu tayu Dunguquelu Ineingen Jehová ngeal, trür fautizahuiyu.

CHEM CÜMELCAN LLOHUN:

Tañi domo iñchiu quelluquefiyu tayu cüla yall ñi hueniyeafiel ta Chau Jehová. ¡Rume ayüucüleiñ! Chau Dios quimeltueneu ti rüf dungu, feimu mañumniefiñ. Ti Biblia cüme elcünutuquei pu che ñi mongen, ca femngechi quelluqueneu ta iñche.

• TRIPANTU ÑI CHOYÜNGEEL: 1957

• CHEU ÑI TUHUN: AUSTRALIA

• ÑI RUPAN: HUESAQUE DUNGU RUPAI PICHICALU

TAÑI CUIFI MONGEN:

Nien cayu lamngen, iñche tati hunen-ngelu. Tremümngen Newcastle huaria, Nueva Gales del Sur troquiñ mapu mu. Tañi chau quehuafengefui ca ngolliquefui. Tañi ñuque ca illcufengefui, fei huesa che piquefeneu ca hulelcaquefeneu. Fill antü feipiquefeneu ñi lüpümngeal infierno mu. Fente tañi aneltungen, müllmüllquiyauquefun llican mu.

Fentren rupa tañi ñuque allfüleneu. Fei pepi amuquelafun chillcatuhue mu. Nielu iñche 11 tripantu, pu autoridad eluquelafi tañi pu chau ñi tremümaeteu. Doi mai elcünungen quiñe convento mu. Huelu nielu 14 tripantu lefmahun. Ayüquelafun huiñotual tañi ruca mu, feimu mülepun calle püle, Kings Cross pingelu, Sydney huaria mu.

Mülelu iñche calle püle, drogatuquefun, rume putuquefun, pequefun podngechi dungu ca cofraquefun ñi cudumngeal. Quiñe rupa rume llicalefun, umauquefun cheu ñi mülen quiñe huentru nielu quiñe discoteca. Fei pun meu ngepai epu huentru, pieza mu amutuaimi pingen, huelu allcün ñi feipin engün. Ti huentru cüpa fendeeneu iñche, fei ellcangeafun quiñe farcu mu ca yengeafun ta Japón ñi cüdahual quiñe bar mu. Fente tañi llican ütrüfnagün ventana mu, fei lefmahun tañi quellungeal.

Pefiñ quiñe huentru huitran-ngepalu ti huaria, nütramcalelfiñ chem tañi rupan, femngechi ñi eluaeteu plata. Huelu mangeleneu cheu ñi umamequen tañi müñetual ca tañi iyal. Mülecan feichi huentru iñchiu. Quiñe tripantu rupalu niehuiyu.

TI BIBLIA CÜME ELCÜNUTUENEU ÑI MONGEN:

Doi chillcatulu Biblia pu Dunguquelu Ineingen Ngen Jehová engün raquiduameleneu fillque dungu. Quimlu iñche Satanás mu ñi cüpan huesaque dungu rume illcunagün. Rumel feipingequefun Chau Dios cutrancachequei. Cafei pichicalu iñche, quimeltungequefun Chau Dios ñi castigachequen infierno mu. Müna llicalcaquefeneu tati, huelu quimürpulu ti rüf dungu müna cüme duamcületun.

Pu Dunguquelu Ineingen Jehová inaniequei ñi feipin Biblia tañi mongen mu. Pengelqueingün tañi feyentulen. Afmatulehuen, iñche cüme yeucülelafun caquelu che engün. Huelu chem feipiafun ca chumafun rume, Jehová ñi pu che piuqueyenquechi dungueneu ca yamnieneu.

Doi cüdaungefui cüme elcünutual tañi raquiduam. Falinolu troquiuquefun ca quisu üdeuquefun. Fautizaulu rume iñche, huesa duamelquefeneu feichi raquiduam. Quimniefun ñi piuqueyefiel ta Chau Dios, huelu Chau Dios turpu poyelayafeneu iñche piquefun.

Mari quechu tripantu deu ñi fautizahun caletui ñi raquiduam. Quiñe Trahunhue Ruca mu allcün quiñe hueupin ngüneduamlu ñi feipin Santiago 1:23 ca 24. Feipi Chau Dios ñi dungu comütuhue reque felei. Tüfa mu leliuqueiñ chumngechi taiñ penieteu Jehová. Ramtuhun, chumngechi peuquen iñche, ¿ca femngechi penieneu Chau Dios? Cüdaungefui cüme elcünutual ñi raquiduam, petu raquiduamquefun Chau Dios ñi piuqueyenofiel ta iñche.

Quiñeque antü rupalu papeltufiñ Isaías 1:18. Rume ayühuleneu. Tüfa mu Jehová feipi: “Cüpamün mai, ca cümelcautuaiñ [...]. Tamün culpan huilüf quelülefule rume, ligcünungetuai tati pire reque”. Chau Jehová dungumequefeneu pifun. “Cüpange Vicky” pieneu reque, “cümelcautuayu, quimnieyu, quimnieñmayu tami culpan ca chem mülei tami piuque mu. Iñche piuqueyeyu”.

Feichi pun pepi umautulan. Petu raquiduamquefun, ¿rüf piuqueyeneu Chau Dios? Huelu eluhun ñi raquiduamal ñi chumün ta Jesús. Fei quimtucun fentreñma mu Chau Jehová cutranpiuqueyeneu ca fillque dungu mu pengeleneu tañi piuqueyen. Iñche feipiquefun reque ta Chau Dios: “Eimi piuqueyelayafen, tami Fotüm ñi lan puulayafui tañi rulpacünungeal iñche tañi culpan”. Rüfcünu illamcaquefun reque ñi femün Jesús taiñ montulaeteu. Huelu feula raquiduamtuculu ñi femün Chau Jehová, rüf piuqueyeneu piquen.

CHEM CÜMELCAN LLOHUN:

Cüme chengetun, nien ayühun ca tüngün. Doi cüme yeucülen tañi füta iñchiu. Cafei rume ayühun tañi quelluquefiel caquelu che iñche tañi rupan mu. Fill antü doi fülconcülen Jehová mu.

• TRIPANTU ÑI CHOYÜNGEEL: 1974

• CHEU ÑI TUHUN: RUSIA

• ÑI RUPAN: RUME AYÜQUEFI TI HEAVY METAL

TAÑI CUIFI MONGEN:

Choyüngen Vótkinsk huaria mu, cheu ñi choyüngen quiñe musico cüme quimniengelu Piotr Ilič Chaikovski pingelu. Tañi familia pofrengefui, cüme chengei ñi chau, huelu ngolliquefui. Feimu cüme yeucülelafuiñ.

Ayüquelafun ñi chillcatual. Feimu rupalu ta tripantu, falinolu troquiuquefun. Ayüquelafun quiñentrür müleal caquelu che engün. Maneluuquelafun ta inei no rume. Rume cüdaungefui amual escuela mu. Quiñeque mu com tañi pu compañ ñi adquiñ mu mülefun ñi nütramcayal, huelu pepi entuquelafun tañi ayüel, pichin-ngefule rume. Huelu cañpüle mülelu iñche cüme nütramcaquefun. Doi tremlu iñche, tucungei tañi libreta de nota mu tüfachi feipin: “Cüme dunguquelai, cüme entuquelai tañi ayüel”. Tüfachi dungu rume huesa duameleneu, ngamno troquiuquefun. Ramtuhun chumal mongelen.

Pichi tremlu iñche, eluhun ñi putual. Cüme duamelquefeneu pichi putual, huelu ngollilu iñche tüngcülequelafui tañi raquiduam. Chumal mongelen piquefun. Rumeñma hueñancüquefun. Ruca meu müten mülequefun fentreñma mu, cüpa langümuufun cütu.

Nielu iñche 20 tripantu, pen chem tañi cüme duamelaeteu: ti musica heavy metal. Tüfa nehuentucuquefeneu. Fei hueniyefiñ caquelu che ca ayüquelu tüfachi musica. Fei cupiluuhuelan, catanfiñ ñi pilun ca inafiñ chumngechi ñi tucutuuquen tati pu fütraque roquero. Ñochiquechi illcufengerpun ca llicaquelafun ñi chumal chem no rume. Feimu rume yafcauquefun tañi familia iñchiñ.

Caletui ñi chumngechi chengen. Ti heavy metal ayühuelaeneu pilefun, huelu doi hueñancüleneu. Quimürpun ñi femün huesaque dungu tati pu musico ñi ayüqueel, feimu huesa duamün.

Feichi mu rüf ayüfun ñi langümuhual. Huelu raquiduamün ñi ñuque meu, feimu langümuulan. Fei rume piuqueyeneu ca quelluntucuqueneu. Quimlafun ñi chem chumal. Ayühuelafun ñi mongeleal, huelu langümuulayafun.

Tañi ca raquiduam nieal, eluhun ñi papeltuafiel cuifique lifru ñi nentuel pu ruso. Quiñe lifru mu nütramcangei quiñe religioso. Fei eluhun ñi raquiduamal chumngechi quellucheal ca ñi fülconal Chau Dios mu. Com piuque mu llellipufiñ ta Chau Dios, turpu femquelafun. Fei feipifiñ ñi quelluaeteu tañi cüme mongen nieal. Fei tüngduamcülehuen. Epu hora müten rupalu quiñe Dunguquelu Ineingen Jehová cüpai tañi ruca mu, fei feipieneu ñi chillcatual Biblia. Afmatulehuen, Chau Ngünechen allcütueneu ñi llellipun. Feichi antü eluhun ñi ayühun mongen nieal.

TI BIBLIA CÜME ELCÜNUTUENEU ÑI MONGEN:

Cüdautun rume, pod mu ütrüftucun com ñi chemcün nüucülelu ti heavy metal mu. Huelu fentreñma mu pepi nentulafiñ tüfachi musica tañi lonco mu. Rupalu iñche cheu ñi allcüngequen feichi musica, contupaquefeneu huesaque raquiduam. Feimu rupahuelan feiti püle. Ayülafun ñi podümüñmangeal tañi hue cümeque raquiduam. Cafei acordarumelu iñche tañi cuifique rupan, com piuque mu llellipuquefun. Femngechi llohun “Chau Dios ñi cüme tüngün” (Filipenses 4:7).

Biblia mu quimürpun pu cristiano mülei ñi nütramcalelafiel tañi feyentun ta caquelu che (Mateo 28:19, 20). Turpu femlayan piquefun. Huelu chem tañi quimürpuel ayühueleneu ca cüme duameleneu. Caquelu che ca duamniefui ñi quimafiel ta Chau Dios. Feimu llicalelu rume, eluhun ñi nütramcalelafiel pu che chem tañi quimürpuel. Femlu iñche doi faliutun ca piuquentucufiñ Biblia ñi quimeltuel.

CHEM CÜMELCAN LLOHUN:

Tañi domo iñchiu ayüucüleyu. Ayühueleneu ñi quimeltulelfiel ti rüf dungu tañi lamngen, tañi ñuque ca caquelu che. Tañi serfiniefiel ta Chau Ngünechen ca tañi quimeltulelfiel pu che rume cüme duameleneu.