PICHIN antü mu, Salomon ñi kiñepülekünufiel ti rüf poyefiel ta Ngünechen, feymu Israel wüday epu ngünenien mu, chumngechi Jewba ñi feypikünuel. Salomon tañi fotüm, Reoboam pingelu, llowi ñi longko ülmen-ngen, welu fey kutranpiwkeyelafi tati pu che, feymew tati pikunchengelu (norte) mari trokiñ reñma (pu che) ayüyngün ñi püntüwküleal ta kakelu trokiñ. Tati epu trokiñ reñma püntütripanofilu David ñi reñma ñi ngünenien Jerusalen mu, üytungeyngün Juda ñi ngünenien waywen (sur) püle mülelu.

Kiñe ngünenien no rume nielay tüngün ka küme felen, tañi pu longko ülmen (rey) am feyentukenolu ka nienolu mupiltun engün. Welu doy wedake dungu niekefuy ti pikun-ngechi ngünenien Israel mu, ñi llitun mu fey tañi pu longko ülmen eluwingün ñi yenieal ti koylake feyentun. Ngünechen werkülelfi fentren pelon wentru, fey engün mu mülekefuy Elia ka Eliseo —ka wiñomongeltufi kiñeke pu che—, welu feyentukelayngün (müngelkelayngün) turpu. Af mew, Ngünechen eluñmay (eluwi) tati pu asirioche ñi apümafiel tati pu israelche.

Doy kiñe pataka tripantu rupalu wüla, Ngünechen ka kastigafi waywen (sur) püle trokiñ reñma mülelu Juda mu. Ngünechen ñi pu pelon wentru ngüfetufi (eypibi) tati pu longko ülmen, welu kiñeke müfu müten feyentuyngün, ka ayüyngün ñi yetuafiel tati pu che ñi wiño poyetuafiel ta Jewba. Kiñe dungu, ti longko ülmen Josia pingelu llituy ñi liftual Juda ti koylake adentun poyengelu, ka küme elngetuy Jewba ñi ngillatuwe ruka. Petu küdawmekelu engün, pefingün chi lifru nielu Moyse ñi Ley dungu. Josia ayüwlu ñi piwke, fey doy amuley ñi dungu ñi apümafiel ti koyla adentun poyengelu.

Welu Josia ñi pu inangechi longko ülmen, inalafingün ñi küme femken. Feymu Jewba eluñmay pu babilonia che ñi nüafiel ta Juda mapu mew, ka ñi apümafiel Jerusalen waria ka tañi ngillatuwe ruka. Welu tati pu langümngenolu nüngeyngün ka yengeyngün ta Babilonia mapu mu, kafey Ngünechen feypikünuy petu ñi wiñotunon engün tañi mapu mu, rupayay regle mari tripantu. Petu ñi rupalen tüfa, Juda mapu wellikünungey.

Welu kiñe longko ülmen no rume, tripalu David ñi reñma mu, ngünenielayafuy petu ñi akunon ti feypikünuelchi montulchefe, Mesia ürke. Epe kom longko ülmen wentru ngüneniekefulu Jerusalen mu, tañi weda femün pengelingün tati pu che pepilay ñi ngünenieal. Fey ngey, Mesia müten nieay feychi pepiluwün. Feymu llemay, Jewba feypifi ti inangechi longko ülmen: “Tati korona [...] ngen-ngelayay iney no rume, fey küpale wüla feychi rüf koneltulu ñi ngen-ngeal, ka tüfa müley tañi elelafiel kidu müten” (Ezequiel 21:26, 27).

(Tuwlu 1 Reyes, 2 Reyes, 2 Crónicas kapitulo 10 ka puwlu 36 ka Jeremías 25:8-11.)