PABLO kristianongerpulu ayüwün mu, eluwi ñi amuldunguael Ngünechen ñi Ngünenien. Welu fewla kidu müley ñi rupayal fütra kayñetuwün mu. Tüfachi apostol turpu ürkulay rume, rupay fentren mapu mew ñi dungual wechurpual Ngünechen ñi wünen duam niefel kom pu che mu.

Wüne amuy Listra pingechi mapu mu, feymew tremolfi (mongelbi) kiñe küntro wentru choyüngelu (llegingelu). Ti fütra kechan che pefilu ti apostol ka ñi kompañ Bernabe tañi femün wiraringün dio trokifilu engu am. Ngellu tüngün-nagümfingün pu che ñi wülngenoal chalintukun. Welu feyti pu che feyentufi (müngeltubi) engün Pablo ñi pu kayñe af mew ütrüftungey kura mew. Feymew lalu trokifingün, welu ti apostol petu mongeley, pichin antü wüla wiñotuy ti waria ñi yafültukuafiel ti pu inaniekelu.

Mülen antü mu, kiñeke pu kristiano judiongelu kidu engün amul feypiley tati pu kristiano judiongenolu ñi feyentuafiel kiñeke Moyse ñi Ley dungu. Feymu lle Pablo amuy Jerusalen waria mu, ñi pemeafiel tati pu disipulu ka pu longkolelu ñi norümal ti dungu. Fey küme ngüneduamlu engün ti wirintukun mu ka ngillatufingun ta Ngünechen ñi kelluaetew ñi lif küme püllü, feymu wirilelfingün tati pu trawünche ka feypifingün ñi kiñepülekünual ti koylake dio ka ñi inoael ti ilo kulliñ mollfüñngelu, ka ñi femnoael podümngechi dungu. Tüfachi werkün dungu müten “duamfalngey”, welu Moyse ñi ley dungu newe duamngelay ta inayentual (Hecho 15:28, 29, TNM).

Epungechi mew, miawlu Pablo amuy Berea pingechi waria mu, fewla Gresia mapu ngetulu. Tati pu judioche mülekefulu feychi waria mu küme llowi ti werken dungu, welu fill antü chillkatukefuyngün ti wirin dungu femngechi tañi kimael ñi rüfngen Pablo tañi feypiken. Pichin antü wüla, Pablo wiño lefmawi tañi pu kayñe mu. Fey amuy Atena mapu mu, ka wülpuy kiñe tutengechi ka yamün wewpin tati pu kimchengelu mu.

Külangechi mu miawlu ñi amuldungun mew, Pablo amuy Jerusalen waria mu. Feymew amulu ti ngillatuwe ruka mu, tati wedake che ayüy (küpa) langümafiel. Welu tati pu soltaw tuwlu Roma mu, katrütufi tati pu che, feymu yengey ta Pablo ñi ramtukadungungeal. Pablo romache wentrungelu, eluñmangey ñi ingkañpewal ti longkolelu mu Felik pingelu. Tati pu judioche pelayngün chem weda dungu no rume feypingelu ta Pablo. Welu tati Festo—ti inan longkolelu Felik mu—fey ayüy ñi wültukuafiel tati pu judioche. Pablo ñi montual pu judioche mu duamtufi tati emperador tañi inaramtulaetew kiñe kuisio mew, feymew ti longkolelu wiñoldunguy (llowdunguy) “Tati emperador mew ta amuaymi” (Hecho 25:11, 12).

Ti ramtukan dungu ruparkeafuy Roma mu. Feymew Pablo eluwi ñi amual Italia mapu mu, welu ti farku ñamkoni, feymew mülewi Malta pingechi wapi kom pukem mew. Af mew akulu ti Roma mapu mu ka mülepuy kiñe Alkilan ruka mu epu tripantu. Welu püresulelu rume, chumkawnorume (chumngechi no ume) ngoymalay ñi küdaw ñi amuldungual Ngünechen ñi Ngünenien kom ñi pemengeetew ñi mülen mu.

(Tuwlu chi lifru Hecho 11:22–28:31.)