Rakiduamnge tüfachi rupan dungu: Nicolas küpa amulay fachantü ti colegio mew. Wüle ka küpa amülay. Küpa amuwekelay. Küla küyen yeniey ñi weda rupameken, feyti mu tañi pu kompañ koylake dungu witrameleyew. Fey wedake üy tukulelngey. Kiñeke mu, tañi pu kompañ tampawfaluwkeyngün tañi rültrekayafiel ta Nicolas ka ütrüfnakümüñmakefingün tañi lifru, ayünolu reke ñi femal femfaluwkeyngün. Kafey, kiñe trokiñ mu kiñe che rültreeyew ñi furi püle, fey wiñokintulu Nicolas, femfaluwingün ñi femkenon. Welu wiya doyeli ñi dungu: Nicolas aneltungey internet mu...

Eymi Nicolas reke rupafulmi tüfachi dungu mu, ¿chumafuymi?

¡Eymi wewafuymi tati! Ngüfeñpewafuymi kewanon mu. ¿Chumngechi?

•   TÜNGKÜLENGE. Biblia feypiley: “Tati wedwedngelu, ngünenielafi tañi rakiduamkülen ñi piwke, welu tati kimchengelu ñi tüngün mu ngünenieyerpukefi” (Proverbios 29:11). Tüngkülefulmi, femfaluwülmi rume tami llükalenon, femngechi tami dikümtukukeetew afeluwafuy.

• WEDA FEMKEFILNGE. Tati Biblia feypiley: “Wesa femngelmün, wesa femün wiñoleltukelayafimün” (Romanu 12:17). Weda femün wiñoleltufilmi, doyelafimi ti dungu.

• FAMENTUFINGE TI WEDA DUNGU. Ti Biblia feypi: “Feychi che kimün nielu ngüneduamkey ti kuñiwün dungu, fey ellkawkey” (Proverbios 22:3). Pepilülmi, lefmawnge tami pu dikümtukeetew mu ka tati kuñiwün-ngechi dungu mew.

• WIÑOLDUNGUFINGE ÑI AFMATUWAL ENGÜN. Tati Biblia feypiley: “Tati wiñoldungulu tüngkülen mu, kiñe püle künukey ti illkun” (Proverbios 15:1). Ayengentukünuafuymi kütu. Kiñe dungu: feypingelmi tami motrilen, trükoykünuwafuymi ka feypiafuymi: “Kümeafuy tañi doy tronglileal tati”.

• LEFMAWNGE. Kiñe üllcha domo 19 tripantu nielu Nora pingey, kidu feypi: “Amutulmi ñüküfkülen mu, pengelaymi tami kimchengen, tami yafüluwkülen ka tami kim ngünewken, welu tami dikümtukukeetew femngechi che ngelayngün” (2 Timotew 2:24).

• DOY MANELUWNGE EYMI MU. Tati pu dikümtukuchekelu ngüneduamkeyngün kiñe che ñi kidutu maneluwkenon ka pu ngüfeñpewkenolu. Welu eluwnolmi tami llükalkayaetew, tüfa engün ngüneduamayngün, fey dikümtukuwelayaeymu.

• FEYPILELAFIMI KAKELU CHE. Kiñe domo kimeltuchekefulu, feypi: “Yafültukukefiñ kom tati dikümtukungelu ñi feypial iney am tañi dikümtukumekeetew. Tüfa ñi femafel, ka femngechi kelluay kakelu che ñi dikümtukungewenoal”.