Isaías 1:1-31
1 Amoz chachan Isaías*+ yoqaparojja kunatï Judá ukhamarak Jerusalén markanakarojj paskani ukwa Diosajj mä visionan uñjayäna, kunapachatï Uzías,+ Jotán,+ Acaz,+ Ezequías+ reyinakajj Judá+ marka apnaqapkäna uka urunakanwa uka visión uñjayäna:
2 alajjpachankirinaka istʼapjjam, oraqenkirinaka wali amuyump istʼapjjam,+kuna laykutejj Jehová Diosajj akham sasaw säna:
“Nayajj wawanakaruw uywta yaticharakta,+ukampis jupanakajj naya contraw saytʼasipjje.+
3 Torojja pachpa dueñoparojj uñtʼasiwa,asnojja kawkjarus dueñopajj manqʼa liwi uksa uñtʼasirakiwa.
Ukampis Israel markajj janiw nayarojj uñtʼkituti,*+pachpa markajajj jan amuytʼasisaw kuns luri” sasa.
4 ¡Ay jucharar marka,+pantjasitanak qʼeptʼat marka,jaqenakan jan wali wawanakapa, jan walinak lurir wawanaka!
Jumanakajj Jehová Diosaruw apanukupjjtajja,+Israelan Santo Diosaparuw jan respetomp uñjapjjtajja,jumanakajj Diosatwa jitheqtapjjtajja.
5 ¿Kunatarak jumanakajj jukʼamp castigatäpjjañamasti? ¿Kunatarak kutkatasirïsipkaktasti?+
Pʼeqenakamajj usuchjatawa,chuymanakamas usuntatarakiwa.+
6 Kayu plantat pʼeqekamajja janiw ni mä akchʼas sanöpktati.
Usuchjata, chhojjriñchjata ukhamäpjjtawa, llaganakamas* janiw jakkiti,ukanakajj janïraw qolltʼatäpkiti, janiw vendampis chʼoqtʼatäpkiti ni aceitempis qoñaptayatäpkiti.+
7 Jumanakan oraqemajj chʼusakiwa.
Markanakamajj ninamp phichantatawa.
Jumanak nayraqatanwa extranjero jaqenakajj oraqeman utjki uka manqʼañanak tuksupjje.+
Oraqemajj extranjero jaqenakamp qʼala tukjat oraqer uñtasitawa.+
8 Sionan phuchaparojja uvas yapunkir ramanakamp lurat carparjamaw jaytawayapjje,pepino yapun utjki uka pajat lurat carparjamaw jaytawayapjje,enemigonakamp muyuntat markarjamaw jaytawayapjje.+
9 Janitï ejercitonakan Jehová Diosapajj mä qhawqhanir jiltʼaykistaspäna ukhajja,jiwasajj Sodoma markjamaw uñjasisänjja,Gomorra+ markjamarakiw uñjasisänjja.
10 Sodoma marka apnaqerinaka, Jehová Diosan arunakap istʼapjjam.+
Gomorra markankir jaqenaka, Diosasan leyip* wali amuyump istʼapjjam.+
11 Jehová Diosajj akham siwa: “¿Kunatakirak walja sacrificionakamajj nayar servitusti?”.+
“Nakhantayat ofrendjam loqtapkta uka orqo ovejanakatsa+ suma manqʼayat animalanakan likʼipatsa+ amjatäjjtwa,torillonakana,+ corderonakana, cabranakan+ wilapajj+ janiw kusisiykituti.
12 Jumanakajj nayan ukaruw jutapjjtajja,+ukampis ¿khitirak jutapjjañamatak mayipjjtamsti?
¿Khitirak pationakaj taksupjjañamatak mayipjjtamsti?+
13 Jan kunatak servir grano ofrendanakjja jan jukʼamp apanjjapjjamti.
Jumanakan inciensomajj nayatakejj ajjtaskañawa.+
Jumanakajj machaq phajjsinaksa,*+ sábado urunaksa+ amtapjjtawa, tantachäwinakatakis jawsthapipjjaraktawa.+
Ukampis sagrado tantachäwinak amtkasinjja jumanakajj layqasipjjaraktawa, janiw nayajj uk aguantjjti.+
14 Machaq phajjsinakamsa* fiestanakamsa nayajj uñistwa.
Ukanakajja jathi qʼepiruw nayatakejj tukupjje,ukanak aguantkäwejj qaritäjjtwa.
15 Kunapachatï jumanakajj orasiñatak amparanakam loqtapkta ukhajja,janiw nayajj yäqapksmati.+
Walja oracionanaksa lurapkstajja,+janiw nayajj istʼkti,+walja jaqenakaruw jumanakajj jiwarayapjjtajja.*+
16 Jareqasipjjam, qʼomachasipjjarakim,+jan wali luratanakamsa nayraqatajat apanukupjjam,jan walinaksa jan lurjjapjjamti.+
17 Kunatï walïki uk lurañ yateqapjjam, kunatï cheqapäki uk thaqapjjam,+tʼaqesiyirirojj cheqañchapjjam,jan awkin wajcha wawanakan* derechonakapsa arjjatapjjam,viudanakarus yanaptʼapjjarakim”.+
18 Jehová Diosajj akham siwa: “Jutapjjam, kuna asuntonaksa jiwaskam askichañäni”.+
“Juchanakamajj llijkir wila colorjamäkchisa,khunur uñtasit janqʼor tukuyatäniwa.+
Juchanakamajj wila color isjamäkchisa,janqʼo tʼarwar uñtasit tukuyatäniwa.
19 Jumanakatï jankʼak nayar istʼapjjetäta ukhajja,kunanakatï oraqen sumäki ukanakwa manqtʼasipjjäta.+
20 Ukampis jumanakatï jan istʼasiñ munapkäta, naya contra saytʼasipjjarakïta ukhajja,espadampi tukjataw uñjasipjjäta,+kuna laykutejj Jehová Diosan lakapaw uk arsu”.
21 ¡Kunjamarak Diosat jan jitheqtiri markajj+ mä prostitutar tukuwayjjesti!+
Uka markajj kunatï cheqapäki ukamp phoqantatänwa,+kunatï cheqapäki ukaw ukan utjarakïna,+ukampis jichhajj jaqe jiwayirinakakiw utj-jje.+
22 Qollqemajj basuraruw* tukuwayjje,+cervezamajj* umamp mezclatarakiwa.
23 Principenakamajja jan istʼasirïpjjewa, lunthatanakampiw chikachasipjjaraki.+
Taqe jupanakajja qollqe chilltayasiñ wal munapjje, regalonakwa thaqapjjaraki.+
Jan awkini wajcha wawarojj* janiw cheqapar uñjapkiti,viuda warmin quejapjja janipuniw uñjapkiti.+
24 Cheqpach Tatitüki, ejercitonakan Jehová Diosapäki,Israelan Wali Chʼamani Diosapäki ukajj akham siwa:
“¡Istʼapjjam! Naya contra saytʼirinakatjja nayajj librasïwa,enemigonakajatsa vengasirakïwa.+
25 Nayajj castigämawa,qʼañunakamjja mä lejiampjamaw* qʼomachäjja,taqe qʼañunakamwa chhaqtayarakëjja.+
26 Kunjamtï qalltan juezanakamajj utjkayätamjja, ukhamarakiw juezanakamajj wasitat utj-jjätam,ewjjtʼirinakamas qalltanjamarakiw utj-jjätam.+
Uka qhepatjja jumarojj Cheqapar Lurir Marka, Diosat Jan Jitheqtir Marka sapjjätamwa.+
27 Sionajj cheqaparjam salvatäniwa,+kuttʼanipkani uka jaqenakajj cheqaparjam salvatäpjjarakiniwa.
28 Kutkatasirinakasa juchararanakasa taqeniw tukjatäpjjani,+Jehová Diosar apanukurinakasti tukusipjjarakiniwa.+
29 Jumanakajj munapkayäta uka jachʼa qoqanakatjja* jupanakajj phenqʼasipjjaniwa,+jumanakajj ajllisipkta uka jardinanakatjja* phenqʼasipjjarakïtawa.+
30 Kuna laykutejj jumanakajj wañsuskir laphinakani jachʼa qoqar* uñtasitäpjjätawa,+jan umani jardinar uñtasitäpjjarakïtawa.
31 Chʼamani jaqejj pajaruw tukuni,trabajopajj mä jiskʼa nina sankʼaruw tukurakini.
Ukanakajj ninanwa nakhapjjani,janiw khitis jiwtʼaykaniti”.
Notanaka
^ Uka sutejja, “Jehová Diosan salvacionapa” sañ muni.
^ Jan ukajja, “dueñoparojj uñtʼkiti”.
^ Jan ukajja, “ulceranakamas”. Ukajja llejjtir uñtasitawa.
^ Jan ukajja, “yatichäwip”.
^ Jan ukajja, “wawa phajjsinaksa”.
^ Jan ukajja, “Wawa phajjsinakamsa”.
^ Jan ukajja, “amparanakamajj wila phoqakiwa”.
^ Jan ukajja, “wajchanakan (iñunakan)”.
^ Jan ukajja, “trigot lurat cervezamajj”.
^ Hebreo arunjja, kunanakatï qollqetsa qoritsa umatatayatäsajj jalaqtki uka jan servirinakatwa parlaski.
^ Jan ukajja, “wajcharojj (iñurojj)”.
^ Jan ukajja, “jabonampjamaw”.
^ Jan ukajja, “arbolanakatjja”.
^ “Qoqanaka, jardinanaka” sasinjja, inas falso idolonakar adorañat (yupaychañat) parlaskchi.
^ Jan ukajja, “arbolar”.
