Isaías 39:1-8
-
Babilonia markat khitanit jaqenaka (1-8)
39 Uka tiemponjja Babilonia markan reyipajja, mä arunjja Baladán chachan Merodac-Baladán sat yoqapajja, Ezequiasajj usutätapa ukhamarak waliptjjatapwa yatïna,+ ukatwa cartanakampi mä regalompi jupar apayäna.+
2 Ezequías reyisti reyin khitanit jaqenakarojj wali sum katoqäna, wali valoraninak imañ utapwa uñachtʼayarakïna,+ mä arunjja qollqe, qori, bálsamo sat aceite, wali valorani yaqha aceitenaka, guerran nuwasiñatak armanakajj imaski uka lugaranaka, kunanakatï wali valorani imañ lugaranakapan utjkäna taqe ukanakwa uñachtʼayäna. Ezequías reyejja kunanakatï utapansa* taqe reinopansa* utjkäna ukanakjja, jan kun imtʼasaw taqpach uñachtʼayäna.
3 Ukatjja Isaías profetajj Ezequías reyin ukar mantasaw akham sasin jisktʼäna: “¿Kamsapjjes uka jaqenakajja? ¿Kawkitsa jutapjje?” sasa. Ezequiasajj akham sarakïnwa: “Jupanakajj wali jaya markat jutapjje, Babiloniata”+ sasa.
4 Ukjjarusti jupajj akham sasaw jisktʼarakïna: “¿Kunanaksa utaman* uñachtʼayta?” sasa. Ezequiasajj sarakïnwa: “Jupanakajj utaj* taqpach uñjapjje. Jupanakarojj wali valorani imañ lugaranakajan kunanakatï utjki ukanakjja jan kun imtʼasaw taqpach uñachtʼayta” sasa.
5 Ukatsti Isaiasajj akham sasaw Ezequías reyir säna: “Ejercitonakan Jehová Diosapan arunakapar istʼam:
6 ‘Urunakajj jakʼachasisinkiwa, taqe kunanakatï utaman* utjki ukanakasa, taqe kunanaktï nayra awkinakamajj jichhürkam jikjjatapki taqe ukanakasa, Babilonia markar apatäniwa. Janiw kunas jiltʼkaniti’+ siw Jehová Diosajja.+
7 ‘Jumat jutir yaqhep yoqanakamajj Babiloniar apataw uñjasipjjani, ukanjja jupanakajj palacion trabajir jilïrinakäpjjaniwa, Babilonia markan reyipan palaciopanwa trabajipjjani’ sasa”.+
8 Uk satasti Ezequías reyejj akham sasaw Isaiasarojj säna: “Jehová Diosan arunakap yatiykista ukajj walikiwa” sasa. Ukatjja akham sarakïnwa: “Nayan jakañajkamatï* sumankañasa jan kuna llakini jakasiñas utjanejja, walikïniwa”+ sasa.
Notanaka
^ Jan ukajja, “palaciopansa”.
^ Jan ukajja, “gobiernopansa”.
^ Jan ukajja, “palacioman”.
^ Jan ukajja, “palacioj”.
^ Jan ukajja, “palacioman”.
^ Hebreo arunjja, “urunakajantï”.
