Isaías 9:1-21
9 Ukampis uka chʼamakajj janiw nayrjamäkaniti, janiw oraqejj llakisiñan uñjaskäna ukhamäkaniti, janirakiw Zabulón oraqesa Neftalí oraqes jiskʼachatäkäna ukhamäkaniti.+ Ukampis tiempompejja jupajj* uka oraqeruw jachʼañchani, mä arunjja lamar qotar sarir thakiru, Jordán toqena, yaqha markankirinakan Galileaparuw jachʼañchani.
2 Chʼamakan sarnaqkäna uka markajja,mä jachʼa qhana uñjäna.
Wali chʼamak oraqen jakirinakarojja,mä qhanaw jupanakjjar qhantʼäna.+
3 Markarojja jumajj jachʼaptaytawa,kusisiñapsa jachʼaptayaraktawa.
Juma nayraqatanjja jupanakajj wal kusisipjje,kunjamtï jaqenakajj cosecha tiempon kusisipki ukhama,kunjamtï jaqenakajj saqueysutanak wali kusisit jaljasipki ukhama.
4 Jupanakajj apapkäna uka yukjja jumajj tʼunjtawa,kallachinakapankkäna uka varjja tʼunjtawa, capatazankkäna uka thujrjja jumajj tʼunjtawa,kunjamtï Madián markajj atipjat uñjaskäna uka urun lurkayäta ukhama.+
5 Marchasin oraq khatatiyapki taqe uka botasanakasa,taqpach wilarar isinakasa,ninampi phichantatäpjjaniwa.
6 Kuna laykutejj mä wawaw jiwasatak nasi,+mä yoqall wawaw jiwasarojj churasistu,apnaqäwejj* jupan amparapankaniwa.+
Jupajja Yatiñani Ewjjtʼiri,+ Wali Chʼamani Dios,+ Wiñay Awki, Sumankañan Principepa satäniwa.
7 Apnaqäwipajj jiltaskakiniwa, janiw tukuskaniti,sumankañas janiw tukuskaniti,+Davidan tronopansa+ reinopansa,*ukhamat uka reino justiciampi+ cheqapampi,+sum uttʼayañataki+ ukhamarak katjjasiñataki,jichhat uksarusa wiñayatakisa.
Cheqpachansa ejercitonakan Jehová Diosapaw uk lurani.
8 Jehová Diosajj Jacob contraw mä yatiyäwi apayanïna,uka yatiyäwejj Israel contraw jutäna.+
9 Taqpach markaw uk yatini,Efrainampi Samaria markankirinakampiw uk yatipjjani,jupanakajj jachʼa jachʼa tukusa jan respetompiw akham sapjje:
10 “Ladrillot lurat utanakajj liwirtjjapjjewa,ukampis nanakajj kʼutsut qalanakampiw mayampi saytʼayapjjäjja.+
Sicómoro qoqanakajj* khuchuratäpjjewa,ukampis uka qoqanak lantejj cedro qoqanakwa nanakajj uchapjjäjja”* sasa.
11 Jehová Diosajja Rezín chachan enemigonakaparuw Efraín contrajj sartayani,pachpa enemigonakaparuw Israel marka contrajj saytʼayani,
12 Siria markajj inti jalsu toqetwa sartani, filisteonakajj inti jalanta toqetwa sartapjjarakini,+jupanakaw lak jistʼarasin Israel markar manqʼantapjjani.+
Ukhampachas Diosajj janiw colerap apjtayaskiti,jan ukasti castigañatakejj amparapajj loqtatakïskiwa.+
13 Kuna laykutejj markajja janiw castiguiripan ukarojj kuttʼkiti,ejercitonakan Jehová Diosaparojj janiw jupanakajj thaqapkiti.+
14 Jehová Diosajja Israel markaruw khuchoqani,pʼeqsa, wichʼinksa, chʼichtanir alsa, cañsa* mä urunakwa khuchoqani.+
15 Pʼeqejja wali respetat ancianonakawa,wichʼinkasti kʼarinak yatichir profetanakawa.+
16 Aka markar irpirinakajja thakipatwa jupanakar saranukuyasipki,khitinakatï irpatäpki ukanakarojj pantjasiyapjjewa.
17 Ukatwa Jehová Diosajj uka markankir waynanakampejj* jan kusiskaniti,janirakiw jan awkini wajcha wawanakatsa* viuda warminakatsa khuyaptʼayaskaniti,kuna laykutejj taqe jupanakajj apostatanakäpjjewa,* jan walinak luririnakäpjjarakiwa,+kunanakatï jan walïki ukanakwa taqenejj parlapjjaraki.
Ukhampachas Diosajj janiw colerap apjtayaskiti,jan ukasti castigañatakejj amparapajj loqtatakïskiwa.+
18 Kuna laykutejj kunatï jan walïki ukajj mä ninjamaw aqaski,chʼapinakampiru jan wali qoranakampiruw nakhantaski.
Montenkir* walja alinakaruw nakhantani,nakhantat alinakan jewqʼepajj qenayanakar uñtasitaw makatarakini.
19 Ejercitonakan Jehová Diosapajj wali coleratawa,ukatwa jupanakan oraqepajj nakhantaski,markajj ninampi qʼala nakhantatäniwa.
Janiw khitis khuyaptʼayaskaniti, ni pachpa jilapatsa khuyaptʼayaskaniti.
20 Maynejja kupi toqenkir aychwa khareqani,ukampis manqʼat awtjatakïskaniwa.
Maynejj chʼeqa toqenkir aychwa manqʼani,ukampis janiw sistʼaskaniti.
Sapa mayniw pachpa amparapan aychap manqʼantani.
21 Manasesajj Efrainaruw manqʼantani,Efrainasti Manasesaruw manqʼantarakini.
Panpachanejj Judá conträpjjaniwa.+
Ukhampachas Diosajj janiw colerap apjtayaskiti,jan ukasti castigañatakejj amparapajj loqtatakïskiwa.+
Notanaka
^ Ukajja, Diosatwa parlaski.
^ Jan ukajja, “gobiernojj; principjam apnaqañajj”.
^ Jan ukajja, “gobiernopansa”.
^ Ukajja, “ayrupjjäjja (mallkipjjäjja)” sasaw jaqokipasirakispa.
^ Jan ukajja, “arbolanakajj”.
^ Ukajja, “palmera qoqan (arbolan) ramapsa” sasaw jaqokipasirakispa.
^ Jan ukajja, “wayn tawaqonakampejj”.
^ Jan ukajja, “wajchanakatsa (iñunakatsa)”.
^ Jan ukajja, “Bosquenkir”.
