KUNJAMSA PARLAÑ QALLTASMA
4 YATICHÄWI
Humildëñasawa
Bibliajj akham siwa: “Mayninakarojj humilde chuymamp uñjapjjam, jumanakat sipansa jilankapkaspas ukhama” (Filip. 2:3).
Kunsa Pablojj luräna
1. VIDEO uñtäta, jan ukajj Hechos 26:2, 3 liytʼäta. Ukatsti, aka jisktʼanakaruw qhanañchtʼäta:
-
¿Pablojj kunjamtï Agripa reyir parlkäna ukajj kunjamsa humilde chuymanïtap uñachtʼayäna?
-
Pablojj jupa pachpa jachʼañchasiñat sipansa, ¿kunsa Jehová Diosaru ukat Diosan Arupar jachʼañchañatakejj luräna? (Hechos 26:22 liytʼäta).
¿Kunsa Pablot yateqassna?
2. Jiwasatï respetompi, humilde chuymampi jaqenakar parlañäni ukhajja, jupanakajj istʼapjjestaspawa.
Pablot yateqasim
3. Mayninakat jilankkasmas ukham janiw amuyayañamäkiti. Jupat sipans jumakis taqe kun yatkasma ukham janiw amuyayañamäkiti. Respetompipuniw parltʼañama.
4. Kuntï yatichkta ukajj Bibliankatap qhanwa uñachtʼayañama. Bibliajj jaqenakan chuymaparuw purtʼaspa. Bibliampi yatichtan ukhajja, Diosar jukʼamp confiyapjjañapatakiw yanaptʼtanjja.
5. Llampʼu chuymanïñamawa. Jumapunis razonanïkasma ukham janiw uñachtʼayañamäkiti. Janiw jupanakamp chʼajjwir sarktanti. Humilde chuymanïñaw jan chʼajjwañatakisa, kunapachas sarjjañajj wakisispa uk amuytʼañatakis yanaptʼätam (Prov. 17:14; Tito 3:2). Jumatï munasiñampi llampʼu chuymamp parläta ukhajja, mayan visittʼkäta ukhajj istʼiristamwa.
