Jesusajj Pereanwa mä qhawqha tiempo quedasïna, ‘Jordán Jawir khurkatana’ (Juan 10:40). Ukatjja Jerusalenaruw saräna aynach toqeru.

Jesusajj discipulonakapampiw saräna, “walja jaqenakaw” juparojj arkapjjarakïna, impuesto cobririnakasa jucharar jaqenakas sarapjjarakïnwa (Lucas 14:25; 15:1). Ukatjja Jesusan luratanakapa yatichäwinakapa jiskʼachir fariseonakasa escribanakasa arkapjjarakïnwa. Jesusajj chhaqat ovejata herencia tukuntir waynat ukhamarak qamir jaqempita Lazarompit parlkäna uka uñachtʼäwinakjja jupanakajj istʼapjjänwa, ukhamajj walja toqenakatwa lupʼipjjañapäna (Lucas 15:2; 16:14).

Jesusajja inas jupa contra parlapkäna jiskʼachapkäna ukanak amtasin discipulonakapar parlañ qalltchïna. Jupajja kunanaktï Galilean yatichkäna ukanakatwa parläna.

Amuytʼañataki, Jesusajj sänwa: “Kunatï juchar puriyki ukajj kunjamatsa utjapuniniwa. Ukampis ¡juchar puriyir jaqejj ay kamachkakini! [...] Jumanakajj wal amuyasipjjam. Jilatamatejj mä juchar purini ukhajja, cheqañcham. Arrepentisini ukhajj perdonarakim. Jupatï paqallqo kuti mä urun juma contra juchachasini, ukatjja ‘arrepentistwa’ sasin paqallqo kutiraki juman ukar jutani ukhajja, jumajj ukhamarakiw jupar perdonañama” sasa (Lucas 17:1-4). Uk istʼasajja, Pedrojj inas ¿paqallqo kutit perdonañäspa? sasin Jesusar jisktʼkäna uk amtchïna (Mateo 18:21).

Discipulonakajj ¿Jesusan ewjjaparjamat lurapjjpachäna? Jupanakajja Jesusarojj akham sapjjänwa: “Diosar jukʼamp confiyañ yanaptʼapjjeta” sasa. Jesusasti sarakïnwa: “Mä mostaza jatha ukchʼaksa Diosar confiyapjjasma ukhajja, aka mora arbolarojj ‘saphitpach jikʼstam, qotar ayruntasim’ sasaw sapjjasma, uka arbolajj jumanakar istʼapjjeristamwa” sasa (Lucas 17:5, 6). Cheqansa Diosar confiyasajja, musparkañanakwa maynejj luraspa.

Jesusajj kunatsa humilde chuymanïpjjañapa ukwa apostolonakapar parlarakïna, akham sasa: “Jumanakat maynin esclavopajj vacamp yapu luraskaspa jan ukajj ovej awatiskaspa ukhajja, ¿kunjamsa pampat purinipan esclavopar katoqaspa? ¿‘Jankʼakiy jutam, mesan qontʼasisin manqtʼasim’ saspati? Janiwa. Jan ukasti akham saspawa: ‘Manqʼa wakicharapita, serviñ isimp uchasim, nayajj manqtʼasiñ umtʼasiñ tukuyjjä ukhakam servita, ukjjaruw jumajj manqʼaskäta, umaskäta’ sasa. Lurañanakapamp phoqatap laykojja, ¿uka esclavopar yuspäraniti? Janiwa. Ukhamasti jumanakajj lurañanak katoqapjjäta, taqe ukanakamp phoqapjjarakïta ukhajja, akham sapjjarakim: ‘Jan kunatak servir esclavöpjjtwa. Kuna lurañatï wakiskäna ukakwa lurapjjta’ sasa” (Lucas 17:7-10).

Diosar serviñajj kunatsa nayrankañapa ukjja, sapa mayniw amuytʼañapa. Ukatjja Diosan markapankkasin jupar serviñajj kunja sumasa uksa janiw armañapäkiti.

Amuyatajja, uka qhepatwa Mariampin Martampin khitanit jaqejj purinïna. Jupanakajj Lazaron kullakanakapapjjänwa, Judeankir Betania markanwa jakasipjjäna. Uka jaqejj akham sasaw Jesusarojj säna: “¡Tata, uñjam! Khitirutï jumajj munaskta ukaw usuntata” sasa (Juan 11:1-3).

Jesusajja Lázaro amigopajj wali usuntatätap yatisajja, janiw añcha llakiskänti. Jupajj sänwa: “Uka usojj janiw jiwañar apkaniti, jan ukasti Diosar jachʼañchañatakiwa, ukhamat Diosan Yoqapajj uka usu taypi jachʼañchatäñapataki”  sasa. Jesusajj pä urumpiw uka cheqan quedasïna, ukatjja discipulonakaparuw akham säna: “Mayamp Judear sarañäni” sasa. Discipulonakapasti sapjjarakïnwa: “Rabí, jichhakirakis Judeankir jaqenakajj qalampi kʼupjañatak thaqasipkayätamjjä, ¿mayampit jumajj ukar saräta?” sasa (Juan 11:4, 7, 8).

Jesusajj sarakïnwa: “Uru qhanajja tunka payan horanakaniwa, ¿janich ukhamäki? Uru qhanan sarnaqki ukajja, janiw kunampis lanktʼaskiti, akapachan qhanap uñjatap layku. Arum sarnaqki ukajja lanktʼasiwa, qhanajj jupan jan utjatap layku” sasa (Juan 11:9, 10). Amuyatajja, Jesusajj yatiyañapäkäna uka tiempojj janïraw tukuskänti, uka toqetwa Jesusajj parlaskpachäna. Ukañkamajja, jaqenakar yatichañatakejj wal chʼamachasiñapäna.

Jesusajj sänwa: “Lázaro amigosajj ikiskiwa, jupar sartayiriw nayajj ukar saraskta” sasa. Discipulonakajja Lazarojj ikiskpachawa sasaw amuyapjjäna, ukatwa akham sapjjäna: “Tata, ikiskchejja waliptaskaniwa” sasa. Ukatwa Jesusajj jupanakar qhan säna: “Lazarojj jiwatawa [...]. Jupan ukar sarapjjañäni” sasa (Juan 11:11-15).

Jesusajja Judear sarasajj jiwayataw uñjasispäna, ukwa Tomás discipulojj amuyäna, ukatwa Jesusar jan jaytañ munasajj mayni discipulonakar akham säna: “Jiwasajj sararakiñäni, jupamp chik jiwañasataki” sasa (Juan 11:16).