Jesusajj oración toqetsa yaqha toqenakatsa mayampiw yatichäna. Galilean milagronak lurkäna ukhajja, Jesusarojj demonionakan apnaqeripan chʼamapampiw qolltajja sasaw kʼarintapjjäna. Jichhajja, Judeanjja mayampiw ukham Jesusar sapjjäna.

Amutuptayir mä demonior mä jaqet alissüna ukhajja, jaqenakajj wal musparapjjäna. Ukampis Jesús conträpkäna ukanakajja, jukʼampikiw kʼarintapjjäna, akham sasa: “Jupajj demonionakan Beelzebub sat apnaqeripan chʼamapampiw demonionakar alissu” sasa (Lucas 11:15). Yaqhepajja Jesusajj khitïnsa uk saspa ukwa munapjjäna, ‘mä señal alajjpachan uñachtʼayapjjeta’ sapjjarakïnwa.

Yantʼañ munapjjatap amuyasajja, Jesusajj kuntï Galilean siskäna uka pachpwa sarakïna. Kawkïri gobiernotejj tʼaqjtani ukajja, jan walinwa uñjasini sasaw säna. Ukatsti sarakïnwa: “Supayampejj uka kikparakiwa, jupa pachpa contra saytʼasisin tʼaqjtaspa ukhajja, ¿kunjamaraki gobiernopasti saytʼatäspasti?” sasa. Ukatjja Jesusajj qhan säna: “Nayatejj [Diosan lukʼanapampi] demonionakar alissta ukhajja, Diosan Reinopampiw jumanakajj katjayasipjjtajja” sasa (Lucas 11:18-20).

‘Diosan lukʼanapat’ parlasajja, kunatï Israel markan qalltapan paskäna ukwa jaqenakar amtaypachäna. Moisesajj mä milagro lurkäna ukhajja, faraonamp chikäsipkäna uka jaqenakajj “¡akasti Diosan luräwipawa! [jan ukajj ‘¡akajj Diosan lukʼanapawa!’, NM]” sasaw sapjjäna. Ukhamarusa, pä qalat lurat tablanakjjarojja Diosaw lukʼanapampi Tunka Mandamientonak qellqarakïna (Éxodo 8:19; 31:18). Ukhamarakiw Jesusajj “Diosan lukʼanapampi”, mä arunjja espíritu santompiw demonionakar alissuskäna, usutanakarus qollaskäna. Ukhamasti Diosan Reinopampiw uñisirinakajj katjayasipjjäna, mä arunjja Diosan Reinopan apnaqkani uka Jesusaw jupanak jakʼan milagronak luraskäna.

Demonionak alissusajja, Jesusajj Supayjjar wali chʼamanïtapwa uñachtʼayaskäna, kunjamtï palaciop uñjaskir mä chʼamani jaqerojj yaqha wali chʼamani jaqejj atipkejj ukhama. Jesusajj mayampiwa mä jaqet misturi demoniot parläna. Uka jaqetï kunatï sumäki ukanakampi jan phoqtʼatäkäni ukhajja, uka demoniojj yaqha paqallq demonionakampiw uka jaqer kuttʼanini. Ukhamatwa nayrat sipansa jukʼamp jan walinakan uñjasini sasaw säna (Mateo 12:22, 25-29, 43-45). Israel markajj ukhamanwa uñjasiskäna.

Uk istʼasajja, mä warmejj akham sasaw jachʼat artʼäna: “¡Kawkïr warmitejj purakapar apkayätam, ñuñuykarakiyätam ukajj kusispan!” sasa. Judía warminakajj mä profetana, cheqansa Mesiasan taykapäñwa suyapjjäna. Ukatwa uka warmejja, suma yatichirin María taykapajj wali kusisitäpachaw sasin amuypachäna. Ukampis Jesusajj uka warmirojj cheqañchänwa, kawkitsa cheqpach kusisiñajj juti uk akham sarakïnwa: “¡Janiwa, antisas khitinakatejj Diosan arunakap istʼapki phoqapkaraki ukanak kusisipjjpan!” sasa (Lucas 11:27, 28). Jesusajj janiw Mariar jachʼañchasiñap munkänti. Cheqansa janiw Jesusan familiapätap laykusa ni luratanakap laykusa maynejj cheqpach kusisiñ jikjjatkaspati, jan ukasti Diosar taqe chuyma servisakiw cheqpach kusisiñ jikjjataspa.

Galileanjamarakiw Jesusajj alajjpachat mä señal mayirinakarojj cheqañchäna. Ukatjja janiw kuna señalsa uñjapkätati, jan ukasti ‘Jonás profetan señalapakwa’ uñjapjjäta sasin säna. Jonasajj kimsa urunakaw mä jachʼa chawllan purakapankäna, Nínive markankirinakarus jan ajjsartʼasaw yatiyäna, ukhamatwa juchanakapat arrepentisipjjäna, ukanakaw mä señaljam  saytʼäna. Jesusajj sänwa: “Khititï Jonasat sipansa jukʼamp jilïrïki ukaw akankaski” sasa. (Lucas 11:29-32). Ukhamarus Jesusajj Salomonat sipansa jukʼamp jilïrïnwa. Salomonan yatiñapatjja, Seba cheqankir reinas istʼänwa.

Jesusajj saskakïnwa: “Mä michachuwa naktayasajja, janiw maynejj jamasar uchkiti, ni mä canastampis kʼumpjjatkiti, jan ukasti kawkirutï uchañäki uka patjjaruw apjjati” sasa (Lucas 11:33). Jesusan yatichatapasa milagronak luratapasa jupanakatakejj michachuwjam imantatäkaspas ukhamänwa, ukatwa ukham sispachäna. Kunatsa Jesusajj milagronak luräna uk janiw sum amuyapkänti, nayranakapajj janis uñjapkaspa ukhamänwa.

Jesusajj mä demonior alissusaw mä amut jaqer parlayäna. Uk uñjasajj jaqenakajj Diosaruw jachʼañchapjjañapäna, kuntï Jehová Diosajj lurkäna uksa yatiyapjjañaparakïnwa. Jesusajj jupa contrapkäna ukanakarojj akham sänwa: “Ukhamasti jumajj amuyasim, ukatarak juman utjki uka qhanajj chʼamakar tukuskaspa. Taqpach cuerpomatejj qhanächi, janirak mä cheqas chʼamakäkchi ukhajja, taqpach cuerpomaw sum qhantani, kunjamtï mä michachuwajj qhanapamp qhankatktam ukhama” sasa (Lucas 11:35, 36).