Aka revista liytʼirinakan jisktʼäwinakapa

Mä kullakax taman jan ukax jachʼa tantachäwinakansa Bibliat apstʼat arstʼäwinak amparamp parlañ aruru jaqukipañatakixa, ¿pʼiqip chʼuqtʼasiñapati?

Taqi kullakanakaw chachapan luräwipa jan ukax tamankir mä jilatan luräwipa lurañatakix pʼiqip chʼuqtʼasipxañapa. Apóstol Pablon qillqataparjamaw kullakanakax pʼiqip chʼuqtʼasipxi, “warmitix jan pʼiqi chʼuqtʼasisa oración lurchi jan ukax Diosan arunakapsa parlchi ukaxa, jan chʼuqtʼasitapax pʼinqarakikiwa chachapatakixa”, kunattix chachax warmin pʼiqipawa (1 Cor. 11:3-10). Chiqansa, mä warmitix askirjam ukat kunatï wakiski ukhamarjam pʼiqip chʼuqtʼasi ukhaxa, Diosan apnaqat markapar istʼatapwa uñachtʼayi (1 Tim. 2:11, 12). *

Ukampisa, mä kullakax arstʼir jilatan arstʼäwipa amparamp parlañ aruru jaqukipani ukhaxa ¿pʼiqip chuqtʼasiñapati? Chiqansa, kuntï arstʼir jilatax siski ukakwa saskaraki, ukhamasti janiw uka kullakax yatichkiti. Ukampisa, amparamp parlañ aruru jaqukipañampi parlat aruru jaqukipañampixa janiw kikpäkiti. Tantachasirinakax arstʼir jilatar wali amuyumpi uñtkasaxa, jaqukipirirux istʼapxarakiwa. Mä arut yaqha arur jaqukipir kullakanakax janiw astʼirit sipansa taqinin uñjatäñ munapkiti, ukhamwa uqaranakatak jaqukipir kullakanakax lurapxaraki. Awisax inas quntʼatäskakiñ amtapxchispa, saytʼatäpxaspa ukhaxa, tantachasirinakar uñtañat sipansa arstʼir jilataruw uñtapxi. Ukhamasti, janiw pʼiqip chʼuqtʼasipxañapax wakiskaspati.

Ukhamarusa, aka qhipa maranakanxa jachʼa televisionanak uñstatapatxa, arstʼir jilatar uñtañat sipansa amparamp parlañ arur jaqukipirirukiw tantachasirinakax jukʼamp uñtapxi. Amparamp jaqukipir kullakax mä jachʼa telivisionanwa uñsti, ukampis inas arstʼir  jilatarux jan uñjasxchiti. Ukatwa, jaqukipir kullakanakax pʼiqip chʼuqtʼasipxañapax wakisi, ukhamatwa arstʼirit sipans jan jukʼampïñ munapxatap uñachtʼayapxi.

Aka machaq qhanañchtʼäwirjamaxa, Yatiyañataki Diosan Yatichäwipa sat tantachäwina, demostracionanakana, Taman Bibliat Yatxatañataki sat tantachäwin arstʼäwinakana, Yatiyañataki Tantachäwina, jan ukax Yatiyañataki sat revistat yatxataskani ukhasa, ¿amparamp parlañ arur jaqukipir kullakanakax pʼiqip chʼuqtʼasipxañaparakïspati? Awisax janiw wakiskaspati, kunattix janiw tantachäw saraykiti, tantachasirinakax ukx amuyapxiwa. Amuytʼañataki, tantachasirinakan arstʼäwinakapa, kullakanakan arstʼäwinakapa jan ukax demostracionak jaqukipañatakis janiw pʼiq chʼuqtʼasipxañapax wakiskaspati. Ukampisa, kunapachatï mä jilatan tamatak arstʼäwipa, Yatiyañataki sat revistat yatxatäwi, Taman Bibliat Yatxatañataki sat wakichäwinak sarayki uka jilatanakataki, jan ukax amparamp parlirinakan arktanipxañapatak qʼuchunak jaqukipki ukhaxa, pʼiqip chʼuqtʼasiñapawa. Ukat inas tantachäwinakan jilat kullakanakataki, wawanakataki jan ukax irpir chuyman jilatanakataki amparamp parlañ arur jaqukipañapax wakischini. Ukhamaxa, inas tantachäwinxa qalltat tukuykamax pʼiqip chʼuqtʼatäsipkakiñapax wakischini.

[Qhanañchäwi]