Biblian yatichäwinakapax wali chʼamaniwa

Vito Fraese sat jilatan arsutaparjama

INAS jumax Trentinara sat mark jan uñtʼkstati. Ukax Nápoles (Italia) markat aynach tuqinwa jikxatasi. Awk taykajasa ukat Angelo sat jilïr jilajas uka markatäpxiwa. Angelon nasitap qhipatwa awk taykajax Estados Unidos markar sarxapxatayna, Nueva York markankir Rochester markan utjasiñataki, ukanwa 1926 maran nasiwayta. Tatajax 1922 maranwa Jehová Diosan Qhanchirinakaparux uñtʼatayna (nayrax Bibliat Yatiqirinaka satapxänwa), jankʼakirakiw mamajamp chikax chiqa yatichäwinakarjam sarnaqapxäna.

Tatajax llampʼu chuymani ukat chʼikhi jaqïnwa, ukampis kunas jan chiqapar luratäki ukhax colertʼasirïnwa. Bibliat jan sum yatichapxatapatxa, walpun Iglesia pʼiqtʼirinakatakix colertʼasirïna. Ukatwa Biblian chiqa yatichäwinakapat kawkins parlapunirïnxa. Jubilasxäna ukhaxa, sapürunjam Diosatak irnaqañwa qalltäna, ukhamaw 74 marankamax irnaqtʼawayi, kunattix usutakixänwa ukat juyphi pachanx wali thayarakïnwa. Ukampis niya 90 maranïxasax sapa phaxsinx niya 40 ukat 90 horanakwa yatiyaskakïna. Tatajan irnaqtʼatap uñjañaw nayarux yanaptʼawayitu. Sawktʼasirïkchïnsa, luräwinakapxa phuqapunirïnwa. “Chiqa yupaychäwix janiw anatasiñäkiti” sirïnwa.

Phisqa wawanakapar Bibliat yatichañatakixa, walpunwa tatajamp mamajampix chʼamachtʼasiwayapxi. Nayasti 23 agosto, 1943 maranwa bautisasta, ukat junio 1944 maranwa precursorjam irnaqañ qalltawayta. Carmela kullakajax Fern sat kʼuchi kullakampiw Nueva York markankir Geneva sat markan precursorjam irnaqtʼaskäna. Uka kullakampiw jiwañkam jakawayäxa sirïtwa, ukat chiqapuniw jupampix agosto 1946 maran casarasipxta.

Misionerjamaw irnaqtʼawayapxta

Casarasxapxta uka qhipatxa, Geneva, Norwich ukat Nueva York markanakanwa precursor especialat irnaqtʼapxayäta. Agosto phaxsi, 1948 maranwa Escuela de Galaad sat 12 yatichäwir sarapxta. Ukat Nápoles (Italia) markaruw khitapxitäna, Carl ukat Joanne Ridgeway esposapampi kunaw misionerot sarapxta. Uka maranakanxa, guerran pasatapax janiw jayäkänti. Uta jikxatañax chʼamänwa. Ukampis mä jiskʼa utwa jikxatapxta, ukanwa mä qhawqha phaxsinak jakapxayäta.

Estados Unidos markankirinakjamas parlkchiyätxa, Italiano arutxa sumrak parltʼasiyäta, kunattix awk taykajax Nápoles arut parlapxapunirïnwa, uka aru istʼasaw jilsuwayta. Ukampis esposajatakix Italiano aru yatiqañax chʼamakïnwa, ukampis qhipatxa nayat sipans jukʼamp sumwa parlxäna.

Qalltanxa, Nápoles markan janikiw Bibliat yatiñ munapxirïkiti. Teresakiw familiapampi chikax yatiqañ munapxäna. Jupanakax sigarrompiw contrabando lurapxirïna. Irnaqir sarasaxa, alwax wali likʼïkaspas ukham misturïna,  ukat jaypʼurusti wali flakakiw kuttʼanxirïna, faldapax walja bolsillonakanïnwa, ukaruw sigarronak apirïna. Ukampis Biblian yatichäwinakapaw familiaparusa parientenakaparus ukanak jaytapxañapatakix yanaptʼawayi, jupanakatxa tunka suxtaniw Jehová Diosan Qhananchiripar tukuwayapxi. Jichürunxa, Nápoles markanx 3.700 yatiyirinakaw utjxi.

Arknaqataw uñjasipxta

Llätunka phaxsitxa, autoridadanakax munkir jan munikirwa Nápoles markat khitanukupxitu. Ukatwa mä phaxsix Suiza markar sarapxta. Ukatsti, turistjam visampiw Italia markar kuttʼapxta. Ukat Turín markaruw khitapxitu. Qalltanxa, mä warmiw cuarto alkilapxitu, bañosa cocinasa jupanakampitakix mayakïnwa. Qhipatxa, Ridgeway sat misioneronakaw purinipxäna, jupanakampiw jachʼpach ut jikxatapxta. Uka pasatatxa, phisqa casado misioneronakaw mä utanak jakapxayäta.

Khä 1955 maransti, munkir jan munkirwa Turín markat khitanukupxitu. Ukampis ukan, pusi tamanakaw utjxäna, ukat irpir jilatanakas utjxarakïnwa. Autoridadanakasti akham sapxänwa: “Jumanakatï sarxapxätaxa, janiw Bibliat yatiqañ munirinakax utxaniti” sasa. Ukampis Diosar yupaychirinakax jilxattaskakïnwa, ukhamaw Diosan yanaptʼaskatapas amuyasiwayi. Jichhürunakanxa, 4.600 jila Qhanañchirinakaw utjxi, ukat 56 tamanakaraki.

Florencia sat suma marka

Florencia markarurakiw khitapxitäna. Uka markat parlir istʼapxayäta, kunattix Carmela kullakajaw Merlin Hartzler sat esposopampix Diosatak irnaqtʼasipkäna. Uka markanxa, Piazza della Signoria, Ponte Vecchio, Piazzale Michelangelo ukat Palazzo Pitti sat sutini suma chiqanakaw utji, janiw ukhamäpachaniw sapkayätti. Ukat chiqa yatichäw taqi chuyma katuqasir uñjañax wali kusiskañänwa.

Mä familiaruw Bibliat yatichapxayäta, ukat chacha warmiw bautisasipxäna. Ukampis chachax janiw cigarro pitaña (fumaña) jaytkänti. 1973 maran misturi, Yatiyañataki sat revistanxa, cigarro pitañax mä qʼañu luräwiwa, jaytxapxam sasaw qhanañchasïna, ukhamasti, jilïri wawanakapax jan pitxamti sapxänwa. Ukat iyaw siskchïnsa, janiw arup phuqkänti. Ukatsti, mä arumax jan oración mayisakiw esposapax llätunk marani ispa wawanakapar ikintanxäpxam säna. Ukampis cuartopar uñjiriw saratayna. Ukat wawanakax oración lurasxaptwa  sasaw sapxatayna, ukat ¿kamsasarak mayisipxtasti? sasaw jisktʼäna. Wawanakasti, “Jehová Dios Awki, mirä ampsuma, tatajar cigarro pitañ jaytxañapatak yanaptʼam” sasaw mayisipxta sapxänwa. Ukatxa, uka mamax chachaparuw jawsanïna akham sasa: “Jutam wawanakaman oracionap istʼam” sasa. Ukat wawanakapan oracionap istʼasax jachaqtʼasïnwa, ukat “janiw mayamps cigarro pitxäti” sänwa. Ukhamatwa arup phuqäna, familiapatxa 15 Jehová Diosan Qhanañchiripäpxi.

África tuqinwa irnaqtʼapxarakiyäta

Khä 1959 maranxa, Somaliankir Mogadishu sat markaruw khitapxitu, ukarusti Arturo Leveris ukat Angelo jilajampiw sarapxta, jupanakax misioneronakäpxänwa. Puripxta ukhaxa, política tuqit jan waltʼañanakaw utjäna. Naciones Unidas sat markan aruparjamaxa, Italia markaw Somalia markarux jupanakpacha apnaqasxapxañapatakix yanaptʼañapäna. Ukampis jan waltʼäwinakax jukʼampikiw utjxäna. Bibliat yatichapkäyäta ukanakatxa Italia markat sarxapxänwa. Ukhamasti janiw mä tamsa ukan utʼayapkayätti.

Ukat superintendente de zona jilatan yanapiripjamaw irnaqxayäta. Ukhamasti uka jakʼankir markanakaruw tumptʼir sarapxayäta. Nanakamp Bibliat yatiqapkäna ukanakatxa, yaqhipax sumakiw sarantasipkäna, ukampis jarkʼat uñjasisax yaqha markaruw sarxapxäna. Ukat qhiparirinakax jan waltʼäwinakanwa uñjasipxäna. * Kunjamsa Jehová Diosar munasipxäna ukat taqi chuyma yupaychaskakiñatakis tʼaqhisipxäna, uk amtasax jachaqtʼasipxtwa.

Somalia ukat Eritrea markanakax sinti juntʼu ukat phututipuniwa. Yaqhip manqʼanakax wali jarupuniwa, jukʼampikiw jumpʼitatayapxirïtu. Bibliat mä yatiqirimpiw uka manqʼa malltʼapxta. Esposajästi, “jinchus wilaptxituwa” sasaw sawkat sirïna.

Tiempompixa, Angelompi Arturompix yaqha tuqiruw sarxapxäna. Fern espsajampikiw qhiparxapxayäta. Wali chʼamäxänwa, janiw khiti chʼamañchtʼiris utjxänti. Ukampis Jehová Diosar jukʼamp jakʼachasiña ukat jukʼamp atinisiñwa yanaptʼawayapxitu. Diosan Arupat yatiyañax jarkʼatäki uka markanakar visittʼañaw yanaptʼapxarakitäna.

Somalia markanxa, kunayman jan walinakanwa uñjasipxayäta. Niyakixay wali juntʼüchïnxa, janiw kunjamats manqʼax imasiñjamakänti. Ukhamasti sapa alwaw chawllanaksa, mangonaksa, papayanaksa, toronjanaksa, coconaksa, platanonaksa ukat yaqha frutanaksa alapxirïta. Ukat chhichhillankhanakas walïnwa,  Bibliat yatichasipkirïta ukhasa kunkanakajxaruw saytʼasipxiri. Ukat mä motonipxayätwa, ukampiw wali jayanaka lupins lupjata kayuk sarañat sipansa sarapxirïta.

Italia markaruw kutʼapxta

Khä 1961 maranxa, suma chuyman jilat kullakanakan yanaptʼapampiw Italia Markankir Turín sat markarux platanonak apiri barcot sarapxta, ukhamat Walja Markanakat Jachʼa Tantachäwir puriñataki. Ukanwa yaqha lurañaw jumatakix utji sasin yatiyapxitäna. Ukat septiembre phaxsin 1962 maranwa Italia markan tamanak tumptʼirit uttʼayapxitäna. Ukatwa mä auto alasisin pä circuiton phisqa maranak irnaqtʼawayapxta.

África tuqinxa, lupins lupjataw irnaqtʼapxayäta, jichhax thaya chiqan irnaqañaw waktʼapxitäna. Nayrïr juyphi pachanxa, jachʼa qullu thiyankir mä tamar tumptʼiriw sarapxta, juyra imañ utanwa ikipxayäta, janiw kunamp juntʼuptayañas utjkänti, ukatwa isintatpach ikintapxayäta. Ukärmaxa, pä anumpi pusi wallpampiw uka jakʼanakan luxuntat jiwapxatayna.

Qhipatsti tamanak tumptʼirinakan añjiripat irnaqxayäta. Uka maranakanxa Italia markpachanwa yatiyapxirïta. Sañäni Calabria ukat Sicilia uksanakaruxa, walja kutiw tumptʼir sarawayapxta. Waynanakaruxa, irpir chuymanita, tamanak tumptʼirita, jan ukax betelitjam irnaqapxañapatakiw chʼamachtʼapxirïta.

¡Taqi chuym, jan jithiqtas Diosar luqtir jilat kullakanakatxa walpun yatiqawayapxta! ¡Wali suma jaqïpxapunïwa! Diosar taqi chuyma yupaychiri, wali munasiri, kunay munaschi ukarjam irnaqtʼiri ukat mayninakan askip thaqhiri ukhamäpxiwa. Italia markanxa, Jehová Diosan Qhanañchirinakapax Tantachasiñ Utanakan casarasipkäna ukarus sarapxaraktwa. Gobiernon permiso churataw jilatanakax uka casarasirinakar jaqichapxäna. Janiw ukhamäniw sapkayätti. Tantachäwinakanxa, janiw Turín markanjam jilat kullakanakax tablanakar quntʼasxapxiti, ni cocinanakansa apasxiti. Jichhax Jehová Diosar jachʼañchkiri wali suma Tantachasiñ Utanakanwa tantachasxapxi. Janirakiw aliq teatronakan tantachasxapxti, jan ukasti, Jachʼa Tantachasiñ Utanakanwa tantachasipxta. Ukhamarus 243.000 yatiyirinakaw utjxi, puripxayät ukhax 490 yatiyirinakakiw utjäna, ¡ukanak uñjañax wali kusiskañapuniwa!

Askirjamapuniw amtawayapxta

Jan waltʼäwinakax utjakipunïnwa. Usuntañasa, sapaki jikxatasiñas utjakipunïnwa. Fern esposajax lamar qut uñjasax utapat llakthapisirïna, ukat kims kutirakiw wal usuntasax operayasïna. Mä kutixa, Bibliat yatichir sarkipanwa mä jaqix kimsa puntani herramientampix  amanut usuchjatayna, ukatwa hospitalan uñjasirakïna.

Awispachax llakitaw uñjasipxirïta, ukampis Lamentaciones 3:24, (NM) qillqatarjamaw chuymachir Jehová Diosar ‘suyapxirïtaʼ. Mä kutix esposajax llakimp aynachtʼataw uñjasïna, ukhamaruw Nathan Knorr jilatat mä carta katuqäna. Uka cartanxa, Pensilvania markan jakapki uka Alemania markat jitirinakjam jan axsariri, chʼamani kullakätawa sasaw qillqanitayna. Kunats parlaskäna ukxa esposajax sum yatiskäna, kunattix Pensilvania markanwa nasitayna, Bethlehem markäna. Ukanwa precursorjam irnaqañ qalltawayatayna. Yaqha jilat kullakanakax Nathan Knorr jilatjamarakiw kunaymanit chʼamachtʼawayapxitu.

Jan waltʼäwinakankkasasa, taqi chuyma yatiyañatakiw chʼamachtʼasiwayapxta. Esposajäx Diosar taqi chuyma luqtañax Italiankir Lambrusco sutini vinomp sasiw siriwa. Ukat “Diosar luqtäwisanxa, Lambrusco vinjamaw llijtaskakiñasa, janiw aynachtʼañasäkiti” sasaw sawktʼasirïna. Pusi tunka maranak jilaw tamanak tumptʼirjama ukat tamanak tumptʼirinakan uñjiripjamax irnaqtʼawayapxta, ukat yaqha arunak parlir tamanaksa gruponaksa uttʼayapxaraktwa, ukanakan yanaptʼasax wal kusisipxta. Jupanakaw aka markat jutir jaqinakarux yatiyapxi: Bangladesh, China, Eritrea, Etiopía, Filipinas, Ghana, India, Nigeria ukat Sri Lanka. Kunjamsa jaqinakax khuyapayasir Diosat yatiqasasa ukat Biblian yanaptʼatas nayra jakäwinakap jaytawayapxi, ukanakat parlañ munasax walja libronakaw qillqasispa (Miq. 7:18, 19).

Ukat sapürupuniw Jehová Diosat yatichir sarañatakix chʼam churapxita, chuymachtʼapxita sasin mayisipxirïta. Kusisit Jehová Diosaw chʼamañchtʼapxitu. Juparakiw chuymas chuymäñatakix yanaptʼapxitu ukat wayn tawaqutpach Biblian yatichäwinakap yatiyir sarañ amtawayapkta ukanakax jan inamayätapwa amtayapxarakitu (Efe. 3:7; Col. 1:29).

[Qhanañchäwi]

[27-29 jananakan tablapa/fotonakapa]

(Sumpach amuytʼañatakejj qellqatan mistki uk uñjjatañamawa)

Tatajampi mamajampi, Rochester markana (Nueva York)

1948

South Lansing markana, Escuela de Galaad 12 yatichäwitaki

1949

Italia markar janïr sarkasina, Fern esposajampi

Capri (Italia)

1952

Turin ukat Nápoles sat markan yaqha misioneronakampi

1963

Fern ukat Bibliat mä qhawqha yatiqirinakapampi

“Diosar luqtäwisanxa, Lambrusco vinjamaw llijtaskakiñasa”