Sapa mara tantachäwi

Mayachtʼat tantachäwi ukat wakiskir amtanaka

SAPA maraw Watch Tower Bible and Tract Society of Pennsylvania corporacionan tantachäwipan kunas yatiyasini ukajj wali suyatajja. Ukhamarakiw 127 tantachäwip suyasïna, ukasti octubre 1, 2011 maranwa Jachʼa Tantachasiñ Utan Jersey City (Nueva Jersey, Estados Unidos) markan apasiwayi, ukarusti oraqpachatwa jilat kullakanakajj sarapjjäna.

Oraqpachan Jilïr Irpirinakat Gerrit Lösch jilataw 85 markanakat jutir kusisit invittʼatanakar katoqtʼäna. Mayachtʼatäpjjatasajj wali askipuniwa ukat Jehová Diosarojj jachʼañcharakiwa sasaw tantachasirinakar amtayäna. Ukat niya jila partejja mayachtʼatäñatwa tantachäwin parlasïna.

MÉXICO MARKAT SUMA YATIYÄWINAKA

Jehová Diosan markapajj kunja mayachtʼatas ukwa nayraqat parlasïna. México Betelankir Baltasar Perla jilataw uka sucursalankir kimsa jilatar entrevistäna. Centroamérica toqenkir sojjta sucursalanakajj México makankir sucursalampi mayachtʼasipjjatapajj kunjamakisa sasaw jisktʼäna. Betel familianjja kunayman markata ukat kunayman saräwini jilat kullakanakaw utji ukat jukʼampiw maynit mayni yanaptʼasiñajj utjaraki. Ukat Diosas mä jachʼa gomampi qorpanak chhaqtaykaspa ukhamawa sasaw jupanakajj qhanañchapjjäna.

Sucursalajj jan utj-jje uka markanakankir jilat kullakanakajj Jehová Diosan markapat jayartʼatäpkaspas ukham jan amuyasipjjañapataki yanaptʼañaw chʼamäna. Ukatakisti sapa tamatakiw México sucursalampi parlañatakejj mä correo electrónico jistʼararapipjje.

JAPÓN MARKAN ORAQ KHATHATI

Marzo 2011 maran mä jachʼa oraq khathatisa ukat lamar qotat umajj llumstanisin Japón marka tukjkäna ukhajj kunjamsa jilat kullakanakajj jikjjatasipjjäna ukwa Japón markankir sucursalat James Linton jilatajj qhanañchäna. Walja jilat kullakanakan familiaranakapaw jiwapjje ukat yänakapsa aptʼasiwayapjje. Uka cheqan jan jakapki ukanakajj 3.100 jila utanaka ukat patak patak autonakwa maytʼapjjäna. Comités Regionales de Construcción ukankirinakajj walja yanapirinakwa jilat kullakanakan utanakap askichapjjañapatak khithapjjäna. Taqenejja, 1.700 jilaw kawkhantï yanapajj wakiskäna ukan yanaptʼapjjäna. Ukat 575 ukhanirakiw Tantachasiñ Utanaka askichapjjäna, Estados Unidos markat mä grupos utjarakïnwa.

Ukat jan walin uñjasiwayapki ukanakar Diosar yupaychañ toqet yanaptʼaña ukat chuymachtʼañaw wakisïna. 400 jila irpir chuymaninakaw kawkhantï yanapajj wakiskäna uka cheqanakar sarapjjäna. Oraqpachan Jilïr Irpirinakajj munasiñampiw sucursalanak tumptʼiri pä jilatarojj chuymachtʼapjjañapatak khithapjjäna. Ukat chuymachtʼkir arunak oraqpachat apayanipkäna ukanakajj wali chʼamañchtʼkirirakïnwa.

JUICIO ATIPJÄWINAKA

Juicio atipjäwinakatjja, wali muspharataw tantachasirinakajj Gran Bretañankir sucursalat jutiri Stephen Hardy jilataru ukat yaqha jilatanakar istʼapjjäna.  Francia markankir gobiernojja 82 millón dolaranakwa Jehová Diosan Qhanañchirinakaparojj impuestot apsuñ munapjjäna. Ukampisa, Francia markankir gobiernojj Convenio Europeo 9 Articulon kuntï siski uka kamachi pʼakintawayapjje sasaw Tribunal Europeo de Derechos Humanos ukankirinakajj qhanañchawayapjje. Ukat ukarjamajja, janiw Jehová Diosan Qhanañchirinakapajj impuesto pagañ jan munapkänti, jan ukasti ukan akham siwa: “Mä religionan utjañap jan munañasa, chhaqtayañ munañasa ukat uka religión contra jan walinak parlañasa kuntï Convenio Europeo 9 Articulopan siski uka contrawa” sasa.

Tribunal Europeojj ukhamarakiw Armenia markankir Jehová Diosan Qhanañchirinakapajj jan kuna jan wal lurapjjatap qhanañchawayäna. Uka markankir tribunalajja, Europeo Conveniorjamajj taqeniw cuartelar sarapjjañapa sasaw 1965 marat säna. Ukampisa, Tribunal Europeo de Derechos Humanos ukan utjki uka Gran Salankir jilïri autoridadanakajja, Europeo Conveniorjamajj “jan walipunïkani ukat janirak lurañjamäkaniti ukhajj janiw cuartelar sarapjjañapapunejj wakiskiti” sasaw qhanañchapjjäna. Uka arunakarjamajja Armenia markansa ukhamaraki Azerbaiyán ukat Turquía markansa uka derecho respetapjjañapawa.

UTANAK LURAÑAW AMTASISKI

Oraqpachan Jilïr Irpirinakat Guy Pierce jilataw ukjjarojj arstʼarakïna. Kuntï Nueva York markan lurañ amtasiski uk taqeniw yatiñ munapjjpachätajj sänwa. Ukat videompiw kunsa Wallkill ukat Patterson ukhamaraki Warwick ukat Tuxedo (New York) markan jichhak alaski uka oraqenakansa lurasiski uk uñachtʼayäna. Wallkill sucursalanjja, 300 cuartonakani machaq edificiow lurasiski ukat 2014 maran tukuyasiñapatak amtatawa.

Warwick markanjja, 100 hectareanakanwa utachasiñ amtasiski. Pierce jilatajj akham sänwa: “Warwick markan kun lurañjjay Jehová Diosajj amtaskchi ukjja janiw yatipkti, ukampis utachañatakejj oraqejj wakichasiskiwa. Brooklyn markankki uka oficinanakajj uka cheqar jittayañwa amtasiski. Ukat Warwick markat 10 kilometronak alay toqerojja niya 20 hectareanakanwa maquinanaka ukat utachañatak materialanak imañ amtasiski” sasa. Ukat akham sarakïnwa: “Kunapachatï lurasiñapataki permiso katoqañäni ukhajja, pusi maran tukuyasiñapwa amtasipkta. Ukjjarojj Brooklyn markan utjkistu uka utanak alj-jjañäni” sasa.

Ukat akham jisktʼäna: “¿Oraqpachan Jilïr Irpirinakajj janiw jachʼa tʼaqhesiñ urun jakʼankatap amuyapkiti sañti ukajj munpacha?” sasa. Ukat jupa pachpaw qhanañchtʼäna: “Janiwa. Jachʼa tʼaqhesiñ urutï kuntï lurañ munktan uk saytʼaychinejja, ¡ukajj wali khusapunïspawa!” sasa.

LEONAT AMUYASIÑÄNI

Ukjjarojj Oraqpachan Jilïr Irpirinakat Stephen Lett jilataw 1 Pedro 5:8 qellqatat arstʼäna, ukan akham siwa: “Wali amuytʼasirïpjjam, jankʼakïpjjarakim, jumanakar uñisir Supayasti mä leonar uñtataw warartʼasisa sarnaqaski khitiru manqʼantañatakisa”. Mä leonajj kunjamäkitï uk amuytʼasaw Pedrojj kuntï siskäna uk amuytʼañäni sasaw säna.

Leonajj jiwasat sipansa jukʼamp chʼamaniwa ukat jukʼamp ratukiw tʼijtaraki. Supayajj ukhamarakiwa. Ukhamasti janiw chʼamasampikejj atipjksnati ni tʼijtksnasa. Jan ukasti Jehová Diosamp yanaptʼatäñaw wakisi (Isa. 40:31). Leonajj mä akatjamatwa animal katji, ukhamasti Supayampi jan katjayasiñatakejj janiw Diosan markapat jitheqtañasäkiti. Kunjamtï leonajj tarujaru jan ukajj cebra qallur katjkejja ukhamwa Supayajj manqʼantañ munistu. Ukat leonampi manqʼjatäsajj janiw kuna animalätapas yatisjjeti, ukhamarakiw Diosar yupaychañ toqet  Supayamp katuntatäktan uka “qhepatjja” “nayra jakañanaka[s]at sipansa jukʼampi jan walëjj[tanjja]” (2 Ped. 2:20). Ukatwa kuntï Biblian yateqtan ukarjam sarnaqasajj Supay contra saytʼañasa (1 Ped. 5:9).

DIOSAN UTAPANKAÑ WALI ASKIRJAM UÑJAPJJAÑÄNI

Ukjjarojj Oraqpachan Jilïr Irpirinakat Samuel Herd jilatarakiw arstʼäna. Ukat akham sänwa: “Taqeniw Diosan markapanjja mä lugaranïtanjja” sasa. Cheqasa, khitinakatï Jesucriston loqtasïwipar iyawsäwinïpki ukanakakiw kunjamtï Diosajj yupaychayasiñ munki ukham yupaychapjjaspa. Ukjja wali askirjamaw uñjañasa. Davitjamarakiw “jakañ urunaka[s]an [Jehová Diosan] utapan utjasiña” muntanjja (Sal. 27:4).

Herd jilatajj Salmo 92:12-14 liytʼasajj akham jisktʼäna: “¿Kunjamsa Jehová Diosajj ‘panqarayistu’?” sasa. Ukat akham qhanañchtʼäna: “Jehová Diosampi sum apasiñajja, jan walinakatwa jarkʼaqestu ukat cheqa yatichäwinakwa yaticharakistu”. Ukat akham ewjjtʼäna: “Wal yuspärañasawa ukat kusisitäñasawa Jehová Diosan markapankasajja, janiw mä jukʼa tiempotakiki, jan ukasti wiñayataki” sasa.

DIOSAN ARUP RESPETAPJJEWA

Ukatsti, Oraqpachan Jilïr Irpirinakat David Splane jilatarakiw arstʼäna. Cheqpach cristianonakajj Diosan Arup respetapjjapunïnwa sasaw qhanañchtʼäna. Khä patak maranakanjja, circuncisión toqet jan waltʼäwi askichañatakejja Bibliampiw yanaptʼayasipjjäna (Hech. 15:16, 17). Ukampis 100 maranakanjja, cristianöpjjtwa sirinakajja, Bibliar respetañat sipansa, griego jaqenakan yatjjatäwinakaparukiw wali askirjam uñjapjjäna. Qhepatjja, Biblian yatichäwinakap lantejj Iglesian Awkipa sasin uñtʼatäpki ukanakana ukat Romankir emperadoranakan amuyunakapakwa yatichapjjäna, ukhamatwa kʼari yatichäwinak uñstayapjjäna.

Apostolanakan urunakapat aksarojj qollan ajayun ajllit cheqpach cristianonakajj Oraqen utjapuniniwa, jupanakaw cheqa yatichäwi arjjatapjjani sasinwa Jesusajj mä uñachtʼäwin qhanañchäna sasaw Splane jilatajj sarakïna (Mat. 13:24-30). Khitinakäpjjänsa uk janis sisksnajja, nayratpachajj waljaniw  kʼari yatichäwinaka contra parlapjjäna. Mä qhawqhanejj akanakawa: Agobardo de Lyon 800 maranakana; Pedro de Bruys, Henry de Lausana, ukat Valdès (Valdo) 1100 maranakana; John Wyclef 1300 maranakana; William Tyndale 1500 maranakana; Henry Grew ukat George Storrs 1800 maranakana. Jichhürunakanjja, Jehová Diosan Qhanañchirinakapaw Biblian kamachinakapar respetapjje ukat Diosan Arupakiw kunatï cheqäki uk yatichi sasin atinisipjje. Ukatwa Oraqpachan Jilïr Irpir jilatanakajj 2012 maratakejj Juan 17:17 qellqat ajlliwayapjje: “Arunakamasti cheqawa”.

ESCUELANAKAN MAYJTʼÄWINAKA

Oraqpachan Jilïr Irpirinakat Anthony Morris jilataw kuna mayjtʼäwinakas misioneronakataki ukat precursor especialanakatak utjawayi uk qhanañchtʼäna. Cristiano Matrimonionakan Bibliat Yatjjatapjjañapatak Escuelajja, yaqhep markanakanjja septiembre 2012 maratwa apasiñ qalltasiskani. Maysa toqetsti, pasïr octubre phajjsitjja, Galaad escuelarojj khitinakatï precursor especialäpki, tamanak tumptʼirïpki, Betelankapki ukat Galaad escuelar jan sarasin misioneröpki ukanakakiw sarjjapjje. Ukat misturinakajja, kawkhantï walja jaqenakajj jakapjje uka cheqanakanwa sucursalanakana, tamanak tumptʼirjama ukat tamanak tumptʼirinakan uñjirinakapjamajj jukʼampi yatiyasiskakiñapatak Diosan markapar chʼamachtʼasipkani.

Precursor especialanakajj jukʼampiw jaya cheqanakan utjani. Enero 1, 2012 maratjja, Soltero Jilatanakana ukat Cristiano Matrimonionakan Bibliat Yatjjatapjjañapatak Escuelat misturinakarojja, yaqheparojj kawkhantï jilat kullakanakajj jan utjki jan ukajj jukʼanikïpki uka cheqanakaruw precursor especialjam khithasi, ukhamata Diosan arunakap jukʼampi yatiyasiñapataki. Jupanakarojj mä marataki jan ukajj kimsa maratakiw khithasi. Ukat khitinakatï sum irnaqtʼasin tam jiltayapkani ukanakajj jukʼamp tiempotakiw precursor especialjam uttʼayatäpjjani.

2011 maran tantachasiwayapki ukajj wali kusiskañapunïnwa. Diosan markapajj oraqpachan jukʼampi yatiyasiskakiñapataki ukat jilat kullakanakajj mayachtʼatäpjjañapatakiw irnaqtʼaski. Ukham chʼamachasitas Jehová Diosajj bendispan ukat Jupar jachʼañchañatakïpan sasaw mayipjjta.

[18, 19 jananakan recuadropa/fotonakapa]

DIOSAR TAQE CHUYMA SERVIR KULLAKANAKA

Tantachäwi tukuyañatakejja, Oraqpachan Jilïr Irpirinakampi casadöpkäna ukat chachanakapajj jiwatäjjapjje uka llätunka kullakanakat phesqaniruw entrevistapjjäna: Marina Sydlik, Edith Suiter, Melita Jaracz, Melba Barry ukat Sydney Barber. Kunjamsa Diosan markap uñtʼawayapjje, kunjamsa Diosatak sapürutjam serviñ qalltawayapjje ukat kuna askinaksa esposopampïsipkäna ukhajj jikjjatawayapjje uk qhanañchtʼapjjäna. Entrevista tukuyarojja, 86 qʼochu qʼochtʼañajj taqenitakiw chuymar purtʼkiripunïnjja, pʼeqeñchäwipajj akawa: “Diosat jan jitheqtir warminaka, cristian kullakanaka”.

[Fotonaka]

(Alaya) Daniel ukat Marina Sydlik; Grant ukat Edith Suiter; Theodore ukat Melita Jaracz

(Aynacha) Lloyd ukat Melba Barry; Carey ukat Sydney Barber

[16 janankir mapa]

(Sumpach amuytʼañatakix qillqatn mistki uk uñxatañamawa)

Sojjta sucursalanakaw México markankir sucursalamp mayachtʼasiwayi

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[17 janan fotopa]

Kawkhattï oraqpachan yatiyasiñapatak pʼeqtʼasiski ukajj Warwick (Nueva York) markan akhamäñapwa amtasiski