Jupanakajj taqe chuymaw sarapjjäna Brasil markaru

MÄ QHAWQHA maranak nayrajja, Rúbia (1) sat kullakaw Brasil markan precursorjam irnaqtʼir Sandra (2) sat kullakar visittʼir saratayna, uka kullakajj mä jiskʼa tamankänwa. Rúbia sat kullakajj 30 maranëjjew jichhajja. Ukampis mä kutejja, walpun mayjtʼasïna. ¿Kunas kamachpachäna? Jupa pachpaw akham sasin qhanañchi.

“JANIW CHEQAW SAÑJAMÄKÄNTI”

“Bibliat yatichaskäna uka warmir visitañatakiw Sandrajj irpitu. Ukat Bibliat yatjjatasipkayäta ukhajja, akham sasaw uka warmejj Sandrar säna: ‘Trabajojan kimsa tawaqonakaw Bibliat yatichayasiñ munapjje, ukampis niyakejjay jumajj aka maran jan tiempon Bibliat yatichaskstajja, jutïr maran yatichapjjätam sasaw jupanakar sista’ sasa.  ¡Janiw cheqaw sañjamäkänti! Bibliat yatichayasiñ munirinakajj waljapuniw Sandratakejj utjäna. Ukampis kawkhantï yatiyaskta ukanjja, janiw Bibliat yatichayasiñ munirejj utjkiti. Uka warmin utapankkasajja, uka cheqan jakir jaqenakar walpun yanaptʼañ munayäta. Ukatwa mä jukʼarojj kawkïr jiskʼa markantï Sandrajj Bibliat yatichaskäna ukar sarjjta.”

¿Kunanaks ukan lurpachäna? Jupajj akham siwa: “Pä phajjsitjja, tunka phesqaniruw Bibliat yatichjjayäta. Ukat Sandranjamarakiw Bibliat yateqerinakajj wal utjitäna” sasa.

DIOSAN ARUNAKAP JUKʼAMPI YATIYAÑATAKIW AMUYKIPTʼASÏNA

Diego (3) jilatajj 20 jila maranïkäna ukhaw precursorjam irnaqtʼir jilat kullakar visittʼir saratayna, jupanakajj aynach toqenkir Prudentópolis (Brasil) sat jiskʼa markankapjjänwa. Ukanwa Diosan arunakap jukʼamp yatiyañatakejj amuykiptʼasïna. Tamapanjja, phajjsin mä qhawqha horanakakiw yatiyir sarirïna, ukampis precursor jilat kullakar visitasinsa ukat kusiskañ experiencianakap istʼasinsa, kunja kusisitas jupanakajj jakasipjje ukas qhanaw amuyasïna. Jilatajj akham sarakiwa: “Jupanakar wali kusisita ukat sum jakasipjjatap uñjasajja, nayajj jupanakjamarakiw jakasiñ munayäta” sasa. Utapar kuttʼasajja, Diego jilatajj jankʼakiw precursorjam irnaqtʼañ qalltäna.

¿Jumajj Diego jilatjamarakïtati? Inas wayn tawaqjamajj Diosan arunakap yatiyir sarsta ukat tantachäwinakarus sararaksta, ukampis ukanakajj sapa kutis pachpa lurañäkaspas ukhamäspawa. Ukhamächi ukhajja, wali kusisit jakasiñatakejj kawkhantï Diosan Reinopat yatiyirinakajj wal munaski uka cheqaruw sarasma. Cheqas utas jaytañajj chʼamakïspawa. Ukampis jumjam wayn tawaqonakajj waljaniw ukham lurapjje. Jupanakajj jan ajjsartʼasaw amtanakapsa ukat luräwinakaps maysar apanukupjje ukat Jehová Diosatakiw jukʼamp irnaqtʼapjje. Kunjamsa Bruno jilatajj ukham luratayna uk jichhajj uñjarakiñäni.

¿MÚSICA TOCAÑTI YATICHÄJJA, JAN UKAJJ DIOSAN ARUNAKAPCHA YATICHÄJJA?

Bruno (4) jilatajj 28 maranëjjewa, jupajj mä jachʼa orqestan sarayiripjamaw wal irnaqtʼañ munäna, ukatwa  música tocañ yatichapki uka jachʼa escuelan yatiqaskäna. Ukat wali sum toctʼirïtap laykojj orquesta sinfónica satäkis ukan sarayañapatakiw walja kuti invittʼapjjerïna. Cheqas wali aytat jaqësapänwa. Ukampis jupajj akham siwa: “Jehová Diosarus jakäwejj katuyaskchiyätjja, janis jupatak kunsa lurkirista ukhamwa amuyasiyäta. Mä arunjj janiw chuymas chuymäkayätti, llakitakiw awisajj sarnaqayäta. Ukatwa Jehová Diosarojj oracionan maytʼasta ukat wali experienciani jilat kullakanakampis parltʼarakta. Ukat wal amuykiptʼasisajja, Jehová Diosatak jukʼamp irnaqtʼañ amtawayta. Ukhamatwa música tocañ jachʼa escuela jaytawayta ukat kawkhantï Diosan Reinopat yatiyirinakajj wal munaski uka cheqaruw sarta”. ¿Ukham luratapajj walikïskänti?

Bruno jilatajj Guapiara sat jiskʼa markaruw sarjjäna, uka markajj São Paulo sat markat 260 kilometronak sarañankiwa ukat niya 7.000 jaqenakaw ukan jakasipjje. Cheqas jupatakejj mayjtʼasiñjamänwa. Ukat akham sarakiwa: “Utajj wali jiskʼakïnwa, janiw televisionas, Internetas, ni refrigeradoras utjkänti. Ukampis mä huertonïnwa, ukanwa kunayman alinakajj utjäna” sasa. Bruno jilatajj mä jiskʼa tamankänwa. Ukat Bibliat apstʼat qellqatanaka, ukhamarak manqʼamp umamp mä bolsar apjjarusisajja, semanan mä uruw motot wali jayankir jiskʼa markanakar yatiyir sarirïna. Ukhamatwa Diosan Reinopat jan yatipkäna ukanakar yatichäna. Jupajj akham saskakiwa: “Tunka paqallqonir Bibliat yatichañasa ukat kunjamsa sum sarnaqjjapjje uk uñjañajj wali kusiskañänwa. Cheqas Diosan Reinop nayrar uchasakiw kusisit jakassna. Nayatejj munañajar sarnaqaskakiriskayäta ukhajja, janipuniw akham kusisit jakaskiriskayätti” sasa. Ukhamajj ¿kunampis jakañatak yanaptʼasïnjja? Akham sasaw lartʼasis qhanañchi: “¡Guitarrampiw música tocañ yatichayäta!” sasa. Ukhamajj ¡music tocaskakïnwa!

“¡UKAN QHEPARAÑAJAJJ WAKISIPUNÏNWA!”

Mariana (5) kullakajj Bruno jilatjamarakiw jikjjatasïna. Jupajj abogadjam trabajasajj walsa qollqe ganaskchïnjja, janiw kusisit jakaskänti. Ukat akham sarakiwa: “Ukhamsa jakaskchiyätjja, ‘amuyatajjat thayarusa katthapï siskirista ukhamänwa’” sasa (Ecl. 1:17). Juparojj walja jilat kullakanakaw precursorjam irnaqtʼañapatak chʼamachtʼapjjäna. Ukat wal  amuykiptʼasisajja, Bianca (6), Caroline (7) ukat Juliana (8) kullakanakampejj mä qhawqha phajjsitakiw Barra do Bugres sat jiskʼa markankir tamar yanaptʼir sarapjjäna, ukajj Bolivia markan jakʼapankiwa ukat utapat wali jaya kilometronak sarañankarakiwa. ¿Kuns ukan lurapjjäna?

Mariana kullakajj akham sasaw qhanañchi: “Kimsa phajjsitakikiw ukar sarañ amtayäta. Ukampis niya kuttʼañampëjjayäta ukhajja, tunka phesqaniruw Bibliat yatichaskayäta ukat Jehová Diosar yupaychañan nayrar sartapjjañapatakejj wal yanaptʼañajaw wakisïna. Uk amuyasajj janiw sarjjäwa sañjamäkänti. Ukhamajj ¡ukan qheparañajajj wakisipunïnwa!” sasa. Ukatwa pusinpachajj ukan qheparapjjäna. Mariana kullakajj wali kusisitaw akham saraki: “Cheqas Jehová Diosan yanaptʼapampikiw jaqenakan sum jakasipjjañapatak nayajj yanaptʼarakta, ukat tiempsa, chʼamsa kunatejj wali wakiskirïki uk lurañatakiw apstʼasirakta, ukapï wali kusiskañajja” sasa. Kunjamsa uka pusi kullakanakajj jikjjatasipjje ukjja, Caroline kullakajj akham sasaw qhanañcharaki: “Jornälpach Diosan Reinopat yatiyasiñapatak taqe chuyma yanaptʼasajja, wali kusisitaw arumanakajj jikjjatasta. Bibliat yateqerinakar yanaptʼañatakiw wal chʼamachasta ukat nayrar sartapjjatap uñjasajj wal kusisirakta. Kuntï Biblian ‘yantʼapjjam, uñjapjjarakim, Jehová Diosan munasirïtapjja’ siski uka arunakajj cheqäskapuniwa” sasa (Sal. 34:8).

Jehová Diosajja, kunjamsa oraqpachankir wayn tawaqonakajj taqe chuyma Reinot suma yatiyäwinak jaya cheqanakan yatiyasipki, uk uñjasajj walpun kusispacha (Sal. 110:3; Pro. 27:11). Ukat ukham taqe chuyma irnaqtʼir wayn tawaqonakajj walja bendicionanak katoqapjjaraki (Pro. 10:22).

[5 janan recuadropa/fotopa]

“Janipuniw kunas faltapkituti”

Kunapachatï João Paulo jilatampi ukat Noemi kullakampejj kawkhantï Diosan arunakapat yatiyirinakajj wal munaski uka cheqar sarañat parlapkäna ukhajja, yaqhepajj janikiw ukar sarapjjañap munapkänti. Yaqhep jilat kullakanakajj akham sasaw jupanakar sapjjerïna: “Mä jiskʼa markarutï sarapjjätajja, ukanjj qollqets pistʼapjjasmawa”, ukat: “¿Kunarus ukar sarapjjäta?, aka tamasan walja lurañanakaw utjaski” sasa. Ukat jilatajj akham sarakiwa: “Cheqas munasiñatwa ukham sapjjetäna, ukampis ukham arunakampejj aynachtʼapjjakirïtwa” sasa. Ukampis niyakejjay Jehová Diosatak jukʼamp irnaqtʼasipkchejja, kawkhantï yatiyirinakajj wal munaski uka cheqan walja maranak yanaptʼasajja, João Paulo ukat Noemi kullakampejj wali kusisitaw jikjjatasipjje. Jilatajj akham saskakiwa: “Aka cheqar purinipkta ukhat jichhakamajj janipuniw kunas faltapkituti. Ukat kunanakatï cheqpachapuni munaski ukanakatjja, jukʼampiw jichhajj utjapjjetu” sasa. Ukat “ukham chʼamachasiñajj janiw inamayäkiti” sasaw Noemi kullakajj saraki.

Mä jiskʼa markan jakasiñajj chʼamakïspawa. Ukhamajj jaya markanakan jakasiñatakejj ¿kunsa jilat kullakanakajj lurapjje? Kuns lurapjjakiwa. Yaqhepanakajj inglés aru, jan ukajj yaqha aru yatichapjje, utaparuw jiskʼa wawanakar yatichir sarapjje, chʼukupjje, utanak pintapjje, jan ukajj kunanakatï jukʼa tiempon luraskaspa ukanakanwa trabajapjje. Ukampis jupanakatakejja, taqe kunat sipans Jehová Diosatak jukʼamp irnaqtʼañaw wali askejja.

[6 janan recuadropa/fotopa]

Jupanakajj janiw llakimp apayasipkänti

Kawkïr markarutï Tiago jilatajj purkäna uka tamanjj jilat kullakanakajj jukʼanikïpjjänwa, ukat janirakiw kusistʼañanakas wal utjkänti. Ukatwa jupajj utapat llakisjjäna. Ukampis jan ukham sarnaqaskañatakejj tamankir jilat kullakanakamp jukʼamp uñtʼasiñ amtäna. Ukaw jupar wal yanaptʼäna. Ukatwa Tiago jilatajj akham saraki: “Ukham lurasajj walja amigonak jikjjatawayta ukat utajanjamaw kusisit jakasjjarakta” sasa.

[3 janan fotopa]

Noemi ukat João Paulo, Ascurra jiskʼa markana (Santa Catarina)