KHÄ 1919 maranjja, Cedar Point (Ohio, Estados Unidos) markanwa Bibliat Yatjjatirinaka sasin uñtʼatäpkäna ukanakajj mä jachʼa tantachäwi apapjjäna, ukanwa awk taykajajj uñtʼasipjjatayna ukat uka pachpa maraw casarasipjjatayna. Nayajj 1922 maranwa nasta ukat Paul sullkajajj pä mara qhepatwa nasiraki. Grace warmijajj 1930 maranwa nasitayna ukat awk taykapjamarakiw Diosar yupaychir familian jilsutayna. Awkipajja Roy ukat mamapasti Ruth Howell satawa. Warmijan achachilapampi awichapampejj Charles T. Russel jilatan amigopäpjjänwa.

Warmijampejj 1947 maranwa uñtʼasipjjta ukat julio 16, 1949 maranwa jaqechasipjjta. Casarasiñatak uñtʼasisipkayät ukhaw kuntï lurañ amtapkta uk qhan parltʼasipjjerïta. Ukatjja, jan wawanïñataki ukat Jehová Diosatak sapürunjam irnaqtʼañatakiw amtapjjta. Octubre 1, 1950 maranwa precursorjam irnaqtʼañ qalltapjjta ukat 1952 maranjja, tamanak tumptʼirjam irnaqañatakiw invittʼapjjetu.

Warmijas nayasa, janis lurañanakamp phoqhañatak wakichtʼatäpkirista ukham amuyasipjjayäta. Ukat experienciani jilatanakat yateqasiñatakiw chʼamachasta ukat warmijar yanaptʼapjjañapatakis yanaptʼa mayiraktwa. Ukatsti, Marvin Holien jilatamp parltʼañ amtta, jupajj walja maranakaw tamanak tumptʼirjam irnaqaskäna. Juparojj nayratpachwa familiajan mä amigjam uñjapjjayäta. Ukat jupar akham sistwa: “Warmijajj tawaqöskiwa ukat janiw suma wakichtʼatäkiti. ¿Khitich jupar mä jukʼa yanaptʼaspa?” sasa. “Jïsa, Edna Winkle walja maranak precursorjam loqtir kullakaw yanaptʼaspa. Jupampejj wali sum yateqani” sasaw jupajj situ. Ukajj ukhamapunïnwa. Qhepatjja, warmijajj akham sitänwa: “Edna kullakamp yatiykasajj janiw ajjsarayaskti. Jan istʼañ munapki ukanakampejj jupajj sum parltʼi. Ukat kuntï sapki uk nayraqat sum istʼañamaw wakisi ukhamat sum parltʼañataki sasaw yatichitu. ¡Ukpun munayätjja!” sasa.

Pä circuitonwa tamanak tumptʼirjamajj Iowa markan irnaqtʼapjjayäta, Minnesota ukat Dakota  del Sur uka markanakat yaqhep cheqarus sarapjjarakiyätwa. Ukatjj Nueva York markan utjki uka tamanakat nayrïr circuitoruw tamanak tumptʼirjam khitapjjetu. Ukatjja Brooklyn ukat Queens sat markanakarus sarapjjarakiyätwa. Ukanjj wal ajjsarayasipjjayäta, uk janipuniw armasipkäti. Brooklyn Heights tamaruw visittʼapjjañajäna. Uka tamajj Betelankir Tantachasiñ Utanwa tantachasipjjäna, ukat Betelan walja maranak irnaqtʼasipki uka jilat kullakanakaw uka tamankapjjäna. Nayrïr arstʼäwi uka tamar visittʼasin arstʼañ tukuyjjta ukhajja, Nathan Knorr jilataw jutasin akham situ: “Malcolm, kunansa irnaqtʼapjjañaja uk mä qawqha ewjjtʼapkista ukajj wali askipunïnwa. Jan kuns ewjjtʼapkitasmajja, janiw Diosan markaparojj sum yanaptʼkasmati, uk janipun armasimti. Sum irnaqtʼasktajja. Ukham luraskakim” sasa. Tantachäw tukuyarojj warmijaruw uk yatiyta. Niyakejjay ajjsartʼayasisa ukankapjjchiyätjja, Betel utan qorpachatäpkayäta ukar purisajja, jachaqtʼasipjjtwa.

Mä qawqha phajjsitjja, mä cartwa katoqapjjta. Ukanjja, Galaad escuelar 24 yatichäwir sarañatakiw invittʼapjjetäna. Uka escuelajja, febrero phajjsin 1955 maranwa tukuyañapäna. Ukat janïr sarapkäyät ukhaw akham sapjjetäna: uka escuelajja, janiw misionerjam irnaqtʼapjjañamatakipunïkiti, jan ukasti luräwinakam jukʼamp sum phoqhañatakiw yanaptʼapjjätam sasa. Ukan yateqañajj wali askipunïnwa, ukat altʼat chuymanïñwa yatichapjjetu.

Escuelajj tukuyjjäna ukhajja, tamanak tumptʼirinakan uñjiripjamaw khithapjjetu. Ukatakisti Indiana, Michigan ukat Ohio uka cheqanakanwa tumptʼapjjañajäna. Ukat diciembre phajjsin 1955 maranjja, Knorr jilatan cartapwa katoqapjjta, ukanjja akham sänwa: “Jumanakat may yatiñ munta, jan imtʼasa qhan sapjjetäta: ¿Betelan irnaqtʼañ munapjjasmati [...], jan ukajj mä qawqha tiempo irnaqtʼir jutapjjasmati, ukat Jehová Diosar yaqha markan serviñatak sarapjjasmati. Jan ukajj kunantï jichhajj irnaqtʼasipkta ukan irnaqtʼaskakiñcha munapjjta?” sasa. Kawkinjjay irnaqtʼañajj wakischispa ukajj nanakatakejj walikïniwa sasaw jupar taqe chuym sapjjta. Ukat jankʼakiw Betelar jawsapjjetu.

Betelan irnaqtʼkayät uka maranakanjja, walja tamanakana ukat jachʼa tantachäwinakanwa markpachan arstʼta. Ukat waynanakar luräwinak sum phoqhapjjañapatak wakichaski ukampis yanaptʼaraktwa. Jupanakajj qhepatjja, walja luräwinakwa katoqapjje. Qhepatjja, oraqpachan yatiyasiñapatak wakichaski ukanwa Knorr jilatan secretariopjam irnaqjjarakta.

 Departamento de Servicio ukan walja maranak irnaqawaykta uk amtapuntwa. Ukanjja, Thomas (Bud) Sullivan jilatampiw irnaqtʼta, jupajj walja maranakaw ukanjj irnaqtʼatayna. Ukat yaqha jilatanakatwa yateqasirakta. Maynïrejj Fred Rusk jilatawa, jupaw kunjam lurañajas uk yatichitäna. Mä kutejja, akham sasaw jisktʼta: “Fred, ¿kunatsa yaqhep cartanakaj wal askichtʼta?” sasa. Uk satajj lartʼasïnwa ukat akham situwa: “Malcolm, maynimp parlktan ukhajja, kuntï sañ munktan ukjja, yaqha arunakampiw qhanañchsna, ukampis akan qellqktan ukajja, qhanäñapawa ukat amuytʼkayäñaparakiwa” sasa. Ukat munasiñampiw akham sistu: “¡Jan llakisimti! Sumwa lurasktajja ukat tiempompejj jukʼamp sumwa lurjjätajja” sasa.

Betelankasipkayät uka maranakanjja, warmijajj kunayman luräwinwa irnaqtʼäna. Cuartonak qomachtʼasa, ukat ukanjj kusisitaw irnaqtʼäna. Uka maranakan waynäsipkäna uka jilatanakajja, “jumaw ikiñ sum jantʼaktʼañ yatichistajja, ukat mamajajj uk yatisajj wal kusisi” sasaw jikisipkta ukhajj kusisit sasipkaki. Ukatjja, Correo, Revista ukat Producción de Cintas ukansa irnaqtʼarakïnwa. Diosar kawkinsay serviñajj waktʼchistu, Jupan markapan irnaqtʼañajj wali askiwa ukat mä bendicionarakiwa ukwa warmijajj kunayman lurañanakan irnaqtʼasajj amuyawayi. Jichhakamas ukhamwa amuyaskaki.

Khä 1975 maranakanjja, awk taykanakajajj jukʼamp chuymankipstatäjjapjjänwa ukat yanaptʼañaw wakisjjäna. Kuns lurapjjä uk amtañajj wali chʼamänwa. Betelan irnaqtʼaskakiñ munapjjayäta ukat amigonak jaytañsa janirakiw munapkayätti. Ukampis awk taykanakajar uñjañaw waktʼapjjetu, ukatwa Betelat sarjjapjjta. Taqe kunas sumakëjjani ukhajj kuttʼanjjañäniwa sasaw sapjjayäta.

Ukat utat uta seguronak aljasaw irnaqañ qallta. Ukan irnaqañatak yatichapkitäna ukhajj kuntï supervisoranakat maynïrejj siskitäna, uk amtasipuntwa. Jupajj akham sitänwa: “Jaypʼunak visitir sartan ukatwa aka negociojj utjaskaki. Uka horanakaw jaqejj utapan jikjjatasipjje. Ukhamajja, uka horanak punkup leqtʼañajj wali askipuniwa” sasa. Ukat nayajj akham sistwa: “Uka toqenakat sum yatitamatwa ukham sistajja, ukajj wali askiwa. Ukampis janipuniw religionajan kuna luräwinakatï utjkitu uk jaytirïkti, ukat jichhas janirakiw jaytañ amtkti. Yaqhep arumanakajj irnaqaskäwa, ukampis martes ukat jueves arumanakajj wali wakiskir tantachäwir sarañajawa” sasa. Taqe tantachäwinakar jan jaytas saratajatjja, Jehová Diosajj bendicituwa.

Mamajajj julio phajjsin 1987 maranwa jiwjje, chuymankipstatanakar uñjapki uka utana. Jiwjje ukhajj jupamp chikäsipkayätwa, ukatwa enfermeranakan jilïripajj warmijar jakʼachasisajj akham säna: “Mama utamar sarjjam mä jukʼa samartʼanim. Jumajj suegramar uñjañatakejj jutapuntawa  uk taqeniw uñjapjjta. Jan llakisimti, qawqhtï yanaptʼirjamäkayäta ukwa lurawaytajja” sasa.

Ukat uka pachpa maraw diciembre phajjsin Betelar kuttʼañatak solicitud phoqhantapjjta, ukankañ wal munapjjayäta. Ukat mä qawqha urutjja, warmijarojj lankhu jiphillanwa canceranïta sasaw doctoranakajj sapjjäna. Ukatjja, operapjjewa ukat waliptjjän uka qhepatjja, janiw canceranëjjtati sasaw sisjjapjjäna. Ukhanakarakiw mä carta sucursalat katoqapjjta, ukanjja uka pachpa taman irnaqtʼasipkakim sasaw sapjjetu. Ukat Diosan arunakap jukʼamp yatiyaskakiñatakiw amtapjjta.

Mä qawqha tiempotjja, Texas markanwa trabajo jikjjatta. Niyakejjay uka markajj juntʼüchïnjja, ukanjj sumaw jakasiñäni sasaw uka markar sarjjañ amtapjjta, ukat ukhampunwa jakasipjjta. Ukanjja, 25 maranakaw Diosar servisipkta. Jilat kullakanakajj wali sum uñjapjjetu, ukat suma amigonakäpjjaraktwa.

Grace warmijajj lankhu jiphillapan canceranïnwa, niya mallqʼapa ukhansa ukhamaraki ukat jichhakirakiw ñuñupan canceranïtaw sapjjaraki. Ukat ukham jikjjatasisajj janiw aynachtʼawaykiti. Jupajj taqe chuymaw yanaptʼitu ukat respetarakitu. Kunjamatsa kusisita jakasipjjta ukat sum apasipjjta uk jupar walja kutiw jisktʼapjje. Ukat jupajj akham siriwa: “Malcolm chachajajj wali suma amigöjjawa; sapa kutiw parltʼasipjjta; panijapuniw kuns lurapjjta; janipuniw mä kutis jachjtayasit ikipkti” sasa. Cheqas awisajj kunat toqtasiñas utjiwa, ukampis perdonasiñataki ukat uk armjjañatakiw chʼamachasipjjta. Ukaw wal yanaptʼapjjetu.

Jan waltʼäwinakan uñjasisajj akanakwa yateqawayapjjta:

1. Jehová Diosarupuniw confiyañasa ukat kunantï uñjasktan uks aguantañasawa. Janipuniw yatiñasaruk confiyañasäkiti (Pro. 3:5, 6; Jer. 17:7).

2. Bibliampiw irpayasiñasa ukat kunansay jikjjataskchiñänejja, Jehová Diosan ewjjanakaparojj istʼañasawa. Istʼasirïñäniti jan ukajj janicha ukajj jiwasatäjjewa, janiw paypach lurksnati (Rom. 6:16; Heb. 4:12).

3. Taqe kunat sipansa Jehová Diosamp askit uñjatäñaw jukʼamp wakiskirejja. Yänakat sipansa, Diosan Reinopwa nayrar uchañasa (Pro. 28:20; Ecl. 7:1; Mat. 6:33, 34).

4. Diosar serviñan jan aynachtʼañatakejj Juparuw yanap mayiñasa. Kuntï lurirjamäktan ukaruw chuym uchañasa janiw kuntï jan lurirjamäktan ukarojja (Mat. 22:37; 2 Tim. 4:2).

5. Diosan markapakiw Jupan askit uñjatajja, ukat bendicionapsa katoqaraki (Juan 6:68).

Grace warmijas nayas 75 maranak jilaw Jehová Diosar servipjjta, ukat casarasjjasajj niya 65 maranakwa sirvipjjta. ¡Uka maranakajj nanakatakejj wali sumapunïnwa! Oraqpachankir jilat kullakanakajj Jehová Diosar confiyas walja bendicionanak katoqapjjarakispa ukatakiw Diosar mayipjjta.