1. ¿Kunsa chʼollqhe iyawsäwinïskakiñatakejj lursna?

JAQENAKAJJA, kuntï uñjapki ukarukiw iyawsapjje. Ukampis Biblianjja, “janiw kunapachas Diosarojj khitis uñjkiti” sasaw qhanañchi (Juan 1:18). Ukhamajj Diosar jan iyawsapki ukanakarojja, ¿kunjamsa Jehová Diosar iyawsapjjañapatak yanaptʼsna? ¿Ukat kunjamsa jiwasajj ‘jan uñjkay Diosan’ utjatap iyawsktan uk chʼollqheñchaskaksna? (Col. 1:15.) Jehová Diosat kunatï cheqäki uk jan iyawsapjjañapatakejj kunanakas jaqenakarojj chʼamaktʼayi ukwa nayraqat amuyañasa. Ukatjja, kuna yatichäwinakatï ‘Diosan arunakap jan uñtʼapjjañapatak jarkʼki’ ukanak jan cheqätap qhanañchañatakejj Biblia sum apnaqañwa yateqañasa (2 Cor. 10:4, 5).

2, 3. ¿Kuna pä kʼari yatichäwis jaqenakarojj kunatï Diosat cheqäki uk chʼamaktʼayi?

² Jaqejj monot jutatätanwa siski uka kʼari yatichäwiw kunatï Diosat cheqäki uk chʼamaktʼayi. Jaqen uñstayata uka kʼari yatichäwejja, kuntï Biblian siski ukajj kʼarïkaspasa ukat jaqejj janis mä suytʼäwinïkaspa ukhamwa amuyayi. Uka yatichäwejja, jaqejj ina chʼusataksa uñstkaspa ukhamwa yatichi, ukampejja jaqejj janis mä amtampi jakkaspa ukham uñachtʼayapjje.

³ Maysa toqetjja, cristianöpjjtwa sapki ukanakat yaqhepajja, alajjpachasa aka Oraqesa ukat taqe kunatï ukan utjki ukanakasa, mä qawqha waranq maranak nayrakiw lurasiwayi sasaw yatichapjje. Ukham yatichirinakajja, Diosajj taqe kunsa 24 horanakani sojjta urunakansa lurawaykaspa ukhamwa sapjje, ukat yatjjattʼatanakajj uka yatichäwinakan jan cheqätap qhanstayapki ukhajj janiw istʼañ munapkiti. Ukat inas Bibliar respetasipkchi, ukampis yatichäwinakapampejja, Bibliajj janis cheqäkaspa ukat chʼama amuytʼañjamäkaspas ukhamwa amuyayapjje.  Jupanakajja, Diosar nayrïr patak maranakan yupaychapkäna ukanakatwa amtayistu, jupanakajj taqe chuymas Diosar yupaychapkchïnjja, kunatï cheqäki uk janiw yatipkänti (Rom. 10:2). Jaqejj monot jutatätanwa siski uka yatichäwisa ukat mayni kʼari yatichäwis jan cheqätapjja, ¿kunjamsa jaqenakarojj Diosan Arupamp amuytʼaysna? * Ukatakejja, kuntï Bibliajj yatichki uk sum yatjjatañatakiw chʼamachasiñasa.

4. ¿Iyawsäwisajj kunarjamäñapasa?

⁴ Diosan Arupajj yatiñanïñasatakiw chʼamañchtʼistu (Pro. 10:14). Jehová Diosajja, iyawsäwisajj luratanak uñjasa ukat kunatï cheqapäki ukarjamäñapwa muni, janiw jaqen uñstayat amuyuparjamsa ni kʼari yatichäwinakarjamsa (Hebreos 11:1 liytʼasiñapawa). Jehová Diosar taqe chuym iyawsañatakejja, Jupan cheqapun utjatapat janiw pächasiñasäkiti ( Hebreos 11:6 liytʼasiñapawa). Janiw Diosarojj aleq ukhamatak iyawsktanti, jan ukasti Jupan utjatap sum yatjjatasa ukat sum amuytʼasaw Jupar iyawstanjja.

5. ¿Diosajj cheqapuniw utjaski sasajj kunatsa sissna?

⁵ Jehová Diosarojj janis uñjkstanjja, kunatsa Jupajj utjapuniwa sasin sissna, ukwa apóstol Pablojj akham sasin qhanañchäna: “Diosan jan uñjkay yänakapajj jupan luratanakap toqew uñachtʼayasi. Qhanpachwa uñachtʼayasi kunapachatejj aka Oraqejj luratäkäns ukürutpacha jupajj Diosätapa, chʼamapajj jan tukuskirirakïtapa” sasa (Rom. 1:20). Diosan utjatapat pächaski ukarojja, ¿kunjamsa Biblian uka jiskʼa tʼaqapajj cheqätap amuyañapatak yanaptʼsna? Jehová Diosan luratanakapat akjjar qhanañchaski ukanakat qhanañchtʼañajj inas wakischispa.

6, 7. ¿Kunjamsa Oraqer muyuntki uka samanasa ukat campo magnético satäkis ukas Jehová Diosan chʼamap uñachtʼayi?

⁶ Jehová Diosan jachʼa chʼamapajj aka pä toqet qhan amuyasi: mayajj Oraqer muyuntki uka samanawa (atmósfera) ukat yaqhasti campo magnético satarakiwa, ukanakaw Oraqer jarkʼaqe. Atmósfera satäki ukajja, janiw samanak utjaykiti, jan ukasti alajjpachat wali jachʼa qalanakar uñtat jalaqtasinki uka meteoritonakatsa jarkʼaqarakiwa. Oraqempi pasjasipki uka jachʼa qalanakajj kunayman jan waltʼäwinakwa Oraqen utjayaspa. Ukampis janiw ukajj paskiti, kunattejj atmósfera satäkis ukar mantasinwa uka qalanakajj nakhantjjapjje. Ukasti arumajj wali suma kʼajkir qhanjamaw alajjpachan uñjasi.

⁷ Campo magnético satäkis ukajj Oraqer jan walinakat jarkʼaqarakiwa. Ukasti Oraq manqha chik chika taypitwa mistu. Uka manqhanjja, umatatayata nakkir hierromp ukat yaqha ukhamanakampiw muyuski. Ukhatwa campo magnético ukajj alajjpachar mistu, ukat Oraqerojj llawuntkaspas ukhamwa imjjati. Ukaw Intin jan wali qhanapatsa ukat ukan phallki ukanakatsa jarkʼaqestu. Ukat phallkis ukanakaw jan waltʼayir qhananak aka Oraqer antuttʼani. Ukampis Oraqejj campo magnético satäkis ukamp jarkʼaqatätapatjja, uka jan waltʼayir qhananakajj janiw kunanakatï aka Oraqen utjki ukanakar nakhantaykiti. Jan ukasti campo magnético satäkis ukaw uka jan waltʼayir qhananak chʼamthapi jan ukajj maysar jaqonuku. Ukat ukham pasaskatapajj arumanakaw alajjpachan kunayman coloranakani qhanajj thoqhopkaspas ukham polo Sur ukat polo Norte uksa toqenakan uñjasi. Cheqansa, Jehová Diosajj ‘wali jachʼa chʼamaniwa’ (Isaías 40:26 liytʼasiñapawa).

8, 9. ¿Kunanakatï jakañatak wakiski ukanakajj kunjamsa Diosan yatiñkankañap uñachtʼayi?

⁸ Kunanakatï jakañatak wakiski ukanakanwa Diosan yatiñkankañapajj qhan amuyasi. Uk amuytʼañatakejja, walja jaqenakan phoqhantata ukat jachʼa perqanakamp muyuntat mä markat parltʼañäni. Perqanakapajja, anqäjjat jukʼamp uma mantaniñap jarkʼiwa ukat tʼunanak apsuñsa jarkʼarakiwa. ¿Uka markajj kunjamäjjaspas mä qawqha tiempotjja? Qʼañu phoqhakëjjaspawa ukat janirakiw khitis ukan jakjjaspati. Aka Oraqejja, jachʼa perqanakamp muyuntat markar uñtasitarakiwa: jukʼa umanikiwa ukat tʼunanakas janirakiw kunjamatsa apsuñjamäkiti. Ukampis Oraqejja, waranq waranqa maranakaw kunayman animalanakaru, alinakaru ukat jaqenakar jakayi. Taqe ukanakjja, kunanakatï jakañatak wakiski uk wasitat machaqar tukuyasaw luri.

⁹ Kunjamsa aka Oraqejj samana utjayi uk amuytʼañäni. Millón millón jakirinakaw uka samanampejj jakapjje ukat bióxido de carbono, mä arunjja, qʼañu samana (“tʼuna”) samsupjje. Ukampis samanajj janipuniw tukuskiti ukat atmósfera satäkis ukajj janipuniw “tʼunanakamp” phoqharantkiti. ¿Kunatsa? Kunattejj chʼojjña alinakaw bióxido de carbono, uma, Intin qhanapa ukat yaqha wakiskirinak chʼamthapi ukat chʼamañchtʼkir alimentonakaru ukat qʼoma samanar tukuyi. Ukat qʼoma samana samtʼktan ukharuw ukajj tukuyjje, ukasti fotosíntesis sasin uñtʼatawa. Diosaw chʼojjña alinakjja, jaqenakaru “jakañsa, samañsa” churañatak wali sum lurtʼatayna (Hech. 17:25). ¡Ukajj wali muspharkañawa!

10, 11. Monarca sat kasta pilpintusa ukat chhejjwiririsa, ¿kunjamsa Diosan yatiñkankañanïtap uñachtʼayi?

¹⁰ Jehová Diosan yatiñkankañapajja, aka Oraqen jakapki uka luratanakapanwa uñjasiraki. Aka Oraqenjja, pä millonat patak millón kunayman kasta laqʼonaka ukat animalanakaw utji sasaw yatjjattʼatanakajj sapjje (Salmo 104:24 liytʼasiñapawa). Jehová Diosajj kunja yatiñkankañanisa ukjja, mä qawqha luratanakapat yatjjattʼasakiw amuysna.

¹¹ Monarca sat kasta pilpintut amuytʼañäni. Uka pilpintun lejjwipajja (lajjwi), boligrafon puntap ukchʼakiwa. Ukhamäkchisa, uka pilpintunakajj 3.000 kilometronakwa yaqha cheqarojj Inti qhan uñtas sarapjje. ¿Kunatsa? Kunattejj Jehová Diosaw ukham sarapjjañapatakejj jiskʼa lejjwip lurawayi. Jichhajj chhejjwiririt amuytʼarakiñäni. Uka laqʼojj pä nayraniwa, ukat sapa nayrapanjja niya 30.000 jiskʼa lentenakaw utji. Ukat jiskʼa lejjwipampejj kunanaktï lentenakapajj uñjki uk sum katoqe ukat jupa jakʼanakan mä kunas turpak onjjti uksa sum amuyaraki.

12, 13. Jehová Diosajj jaqen cuerpopan utjki uka celulanak lurawayki ukatjja, ¿kunas wal muspharaytamjja?

¹² Jehová Diosajj kunjamsa celulanak lurtʼawayi ukaw jukʼampi muspharkañajja, uka celulanakajj taqe kunatï aka Oraqen jakki ukanwa utji. Amuytʼañataki, cuerposanjja patak  billón (100.000.000.000.000) celulanakaw utji. Ukanakat sapa mayanjja, ADN (ácido desoxirribonucleico) satäkis ukaw utji. Cuerposajj kunjamänis uka yatiyäwinakat jilpachajj ukanwa utji.

¹³ ¿Qawqha yatiyäwis ADN ukan utji? Uk sum amuytʼañatakejja, disco compactot (CD) amuytʼañäni. Mä disconjja, qawqha yatiyäwitï mä diccionarion utjki ukjpachaw imasispa, ukajj wali muspharkañapuniwa, kunattejj discojj mä sillpʼa plasticokiwa. Ukampis mä gramo ADN ukanjja, qawqha yatiyäwinakatï mä billón disconakar imaskaspa ukha yatiyäwinakaw imata. Mä arunjja, mä cucharilla ADN ukanjja, qawqha yatiyäwitï niya 2.500 billón jaqenak lurañatak wakiski ukhaw utji.

14. Kuntï ciencia toqet yatjjatatanakajj qhanstayawayki uk uñjasajja, ¿kunsa Jehová Diosat amuyta?

¹⁴ Kuna yatiyäwitï jaqe lurañatak wakiski ukajj mä libron qellqatäkaspas ukhamwa David reyejj amuyäna. Jehová Diosat parlkasajja, akham sänwa: “Nayranakamajj lurat janchejj uñjäna; ukanakasti taqpachaw qellqatamar qellqantasïna. Jakañ urunakajjajj suma jakhutänwa, nayrïr uru janïr purinkipana” sasa (Sal. 139:16). Cuerpopajj kunjam lurtʼatänsa ukanakat lupʼisajja, kunatsa Jehová Diosarojj wal jachʼañchañ munäna uk sumwa amuysna. Ukat jichhürunakan ciencia toqet yatjjattʼatanakajj kuntï qhanstayapki ukajj jukʼampiw muspharayistu. Ukat Salmo qellqerjam amuyañasatakiw yanaptʼistu, jupajj akham sänwa: “Jumaruw yuspagarsma, muspharkañpun [‘nayarojj luristajja’, NM], ¡uksti sumpun yatista!” sasa (Sal. 139:14). Kunjamtï amuyktanjja, luratanakapaw Diosan cheqpachapun utjatap uñachtʼayi.

15, 16. 1) ¿Kunjamsa Bibliat apstʼat qellqatanakasajj Jehová Diosan luratanakapat yatjjatapjjañapatak jaqenakar yanaptʼawayi? 2) “¿Casualidad o diseño?” sat yatichäwinakatjja, ¿kawkïris wal muspharaytamjja?

¹⁵ Walja maranakaw ¡Despertad! revistajj millón millón jaqenakar kuntï Diosan luratanakapajj Jupat qhanstayki uk amuyapjjañapatak yanaptʼawayi. Amuytʼañataki, 2006 maran septiembre phajjsin mistkäna uka revistan pʼeqeñchäwipajj akänwa: “¿Existe un Creador?”. Ukat khitinakatï jaqejj monot jutatätanwa siski uka kʼari yatichäwiru ukat ukham yaqha kʼari yatichäwir iyawsapki jupanakan amuytʼasipjjañapatakiw uka qellqatajj apsusïna. Mä kullakajja akham sasaw Estados Unidos markankir sucursalar qellqatayna: “Aka ajllit yatichäwejja yatiyañatakejj wali askipuniwa. Mä warmejj pä tunk revistanakwa mayitu. Jupajj Biología toqet yatichiriwa ukat sapa mayni yateqerinakapan revistanïpjjañapwa jupajj munäna” sasa. Mä jilatajj akham sarakiwa: “Nayajj 1940 mara tukuyanakatpachwa Diosan arunakap yatiyaskta ukat niyarakiw 75 maranakanëjjta, ukampis janipuniw kunjamtï aka phajjsin ¡Despertad! revistan ajllit yatichäwimp yatiyas jikjjataskta ukham jikjjatasirïkti” sasa.

¹⁶ ¡Despertad! revistanjja, 2008 maratwa aka yatichäwejj mistuwayi: “¿Casualidad o diseño?”. Uka jiskʼa yatichäwinakajja, kunjamsa Diosajj taqe kuns wali sum lurtʼawayi uk qhanstayi, ukat jaqenakajj uka kikpa lurañ munapjjatapsa qhanstayarakiwa. Ukat 2010 maranjja, ¿Es la vida obra de un Creador? sat folleto katoqawaytanjja. Uka folletojja, jaqenakan Diosar jachʼañchapjjañapatak yanaptʼañatakiw lurasiwayi. Ukan utjki uka suma fotonakasa ukat qhanstayir dibujonakasa, kunjamsa Jehová Diosajj yatiñkankañamp taqe kuns lurawayi ukanak wali askirjam uñjapjjañapatakiw lurasiwayi. Ukat sapa yatichäwi tukuyan utjki uka jisktʼanakajja, kuntï liytʼki uka toqet jukʼamp amuykiptʼapjjañapatakiw yanaptʼi. Utat uta, callenakana jan ukajj yaqha cheqanakan yatiykasajja, ¿uka folletompejj parltʼirïtati?

17, 18. 1) ¿Kunjamsa awk taykanakajj wawanakaparojj mä Luririn utjatap iyawsapki uk jan pächasis qhanañchapjjañapatak yanaptʼapjjaspa? 2) ¿Kunjamsa uka pä folletomp familian yatjjatapjjta?

¹⁷ Awk taykanaka, ¿familiana Diosar yupaychkasajj uka suma folletot wawanakamamp  yatjjatapjjtati? Ukhamatwa Diosar jachʼañchapjjañapatak yanaptʼapjjäta. Inas wawanakamajj qʼajjo wayn tawaqöpjjchi, jupanakarojja jaqejj monot jutatawa siski uka kʼari yatichäwjja sapa kutiw yateqañ utan yatichapjje. Cientificonakasa, yatichirinakasa, videonakansa ukat televisionansa, jaqejj cheqapunis monot jutatäksna ukhamwa uñachtʼayapjje. Wawanakamarojj uka kʼari yatichäwinakat jarkʼaqasipjjañapatakejja, El origen de la vida. Cinco cuestiones dignas de análisis sat folletojj 2010 maran mistkäna ukamp yanaptʼapjjam. Ukat ¿Es la vida obra de un Creador?, sat folletojj ukhamarakiw wayn tawaqonakar amuytʼasipjjañapatak yanaptʼi (Pro. 2:10, 11). Ukat kuntï yateqañ utan istʼapki ukajj cheqati janicha uk amuytʼapjjañapatakiw yaticharaki.

¹⁸ Awisajj yatiyäwinakanjja, nayra tiempon jakapkäna ukanakan chʼakhanakapwa cientificonakajj jikjjatapjje, ukaw jaqejj cheqapun monot jutatäskatap uñachtʼayi sasaw yatiyapjje. Jan ukajj jaqejj aleq ukhamatak uñstatätapjja laboratorionakan uñachtʼayapjje sasaw yatiyapjjaraki. Uka yatiyäwinakajj cheqapunïskiti janicha uk jupanak pachpa amuytʼasipjjañapatakiw wawanakarojj El origen de la vida sat folletojj yanaptʼi. Awk taykanaka, uka folletompiw wawanakamarojj kunatsa mä Luririn utjatap iyawsapki uk jan pächasis sum qhanañchapjjañapatak yanaptʼapjjañama (1 Pedro 3:15 liytʼasiñapawa).

19. ¿Kunsa taqenis lursna?

¹⁹ Kuna qellqatanaktï Diosan markapajj sum yatjjatasin apayankistu ukajja, Luririsajj kunjam Diosasa uk luratanakapan uñjasa sum amuytʼañatakiw yanaptʼistu. Ukanak yatisaw Jehová Diosarojj chuymatpach jachʼañchañ muntanjja (Sal. 19:1, 2). ¡Jehová Diosar jachʼañchañajj jiwasatak wali askipuniwa! (1 Tim. 1:17.)