TUNKA maranak nayrajja, Gregorio ukat Marilou chacha warmi jilat kullakajja, 30 jila maranïpjjänwa ukat precursorjamaw Manila markan irnaqtʼasipkäna. Ukat jornalarakiw trabajopan irnaqapjjäna. Ukajj chʼamäkchïnsa, nayrar sartasipkakïnwa. Ukat trabajkäna uka banconjja, kullakarojj gerentetwa uttʼayapjjäna. “Wali sum qamasipjjayäta” sasaw jupajj amtaraki. Ukatwa kawkhantï qamirinakajj jakapki ukawjan mä suma uta lurayasiñ amtapjjäna, Manila markat Inti jalsu toqerojj niya 19 kilometronak sarañankänwa. Ukat uta aljir mä empresampiw contrato firmapjjäna ukat tunka maran sapa phajjsi pagañatakiw amtapjjäna.

Marilou kullakajj akham siwa: “Gerentjam irnaqasajj jukʼamp tiempo ukat chʼam aptʼasiyäta, ukat Diosar yupaychañatakejj kuntï lurañajäki uk janiw lurañ munjjayätti. Jehová Diosarus tiempo lunthatkirista ukhamwa amuyasiyäta”. “Jehová Diosarojj janiw kunjamtï wakiskäna ukham servjjayätti” sasa. Ukhaman jikjjatasisajj llakisipjjänwa, ukat kunsa jakäwipampejj lurapjjani uka toqetwa mä urojj parltʼasipjjäna. Gregorio jilatajj akham siwa: “Janiw ukham jakañ munapkayätti, ukampis kunsa lurapjjä uk janiw yatipkayätti. Kunjamsa Jehová Diosatakejj  jukʼamp irnaqtʼapjjerista uka toqetwa parlapjjta, kunattejj janiw wawanïpkti. Ukat Jehová Diosaruw yanaptʼa mayisipjjta”.

Uka tiempotakejja, kuna cheqanakansa jukʼampi yatiyirinakajj munasi uka toqet arstʼäwinakwa istʼapjjatayna. “Jehová Diosas mayisitanakaj jaysankaspa ukhamwa amuyasipjjayäta” sarakiw jilatajja. Ukat mä suma amtar puriñatakejja, jukʼampi iyawsäwinïñataki ukat jan ajjsarañatakiw Diosar mayisipjjäna. Ukampis mä jan walinwa uñjasipjjäna: ukajj utapänwa. Kimsa maranakaw pagjjapjjäna. ¿Kuns lurapjjpachäni? Kullakajj akham siwa: “Contrato ukharuk saytʼayapjjeriskayäta ukhajja, kuntï pagapkayäta uk qʼalwa aptʼapjjeriskayäta, ukat ukajj walja qollqerakïnwa. Ukampis Diosan munañap phoqhañti jan ukajj munañanakaj lurañakcha ajllipjajja ukwa amuyasipjjayäta” sasa. Kunjamsa apóstol Pablojj Diosan Reinop laykojj taqe kun aptʼasiwayäna uka toqet lupʼisajja, ukharukiw contrato saytʼayapjjäna, trabajonakapatsa mistjjapjjänwa ukat taqe kunapatï utjkäna ukanakat jila part alj-jjapjjänwa ukat Palawan sat islaruw sarjjapjjäna, ukasti Manila markat aynach toqer 480 kilometronak sarañankiwa (Fili. 3:8).

Palawan islar janïr sarkasajja, kunatï wakiski ukampik jakasiñatakiw wakichtʼasisipkäna, ukampis ukham jakasiñajj kunjamapunisa ukjja, islar purisaw sum amuyapjjäna. Kullakajj akham siwa: “Walpun llakthapisipjjayäta. Janiw luzasa ni suman jakasiñas utjkänti. Arroz phayasiñatakejj phukhu enchuftʼañat sipansa, nanakaw kʼullunak kʼutjapjjañajäna ukat ukamp phayapjjañajäna. Ukat jachʼa mercadonakar alasir sarañsa, pensionar manqtʼasir sarañsa ukat kuntï jachʼa markanakan utjki ukanaksa wal munayäta”. Ukhamäkchïnsa, kunatsa uka markar sarjjapjjäna uk sapa kutiw amtapjjäna ukat mä jukʼa tiemporojj yatinoqtjjapjjänwa. Kullakajj akham saskakiwa: “Suma cheqanaka ukat arumanakajj kʼajkir warawaranak uñjasasa, jichhajj kusisitakëjjtwa. Ukat yatiyapkta ukhajj jaqenakajj kunja kusisitäpjjesa uk uñjañaw jukʼamp kusisiyapjjetu. Akan jakasajja, kunatï utjkistu ukampik ‘kunjam sarnaqañsa’ yateqapjjaraktwa” (Fili. 4:12).

Gregorio jilatajj akham sarakiwa: “Purinipkta ukhajja, pusi jilat kullakakiw utjäna. Ukat taqenitak arstʼäw sapa semana arstʼkayäta ukat guitarrajamp qʼochunak Diosar qʼochupjjayäta ukhajj jupanakajj wal kusisipjjäna”. Mä maranakwa jupanakajj tama jiltir uñjapjjäna, ukat 24 jilat kullakanakäjjapjjänwa. Jilatajj saskakiwa: “Kunja munasiñampis tamankir jilat kullakanakajj uñjapjjetu ukajj chuymarupuniw purtʼapjjetu”. Sojjta maranak uka islan irnaqtʼjjasajj jupanakajj akham sapjjewa: “Qawqhanis Diosan markapar mantawayapjje uk uñjañajj wali kusiskañapuniwa, janipuniw kunampis ukham kusisit jikjjatasipjjerïkti” sasa.

Filipinas markanjja, niya 3.000 jilat kullakanakaw kawkhantï jukʼamp yatiyirinakajj munaski uka cheqanakar sarapjje, ukat jupanakatjja, niya 500 ukhaniw soltera kullakanakäpjje. Jupanakat maynïrejj Karen satawa.

Jupajj 25 maranakaniwa ukat Baggao (Cagayan) markanwa jilsuwayaraki. Qʼajjo tawaqetäkäna ukhajja, Diosatak jukʼamp irnaqtʼañ wal munäna. Jupajj akham siwa: “Tiempojj jukʼakïtapa ukat Diosan Reinopat suma yatiyäwinak walja jaqenakan istʼañ wakisitap sum yatiyäta. Ukatwa kawkhantï jukʼamp yatiyirinakajj munasi ukar sarañ munayäta” sasa. Familiapat yaqhepajja, yaqha cheqar yatiyir sarañat sipansa, jachʼa yateqañ utar sarañapatakiw chʼamañchapjjäna. Ukampis Karen kullakajj Jehová Diosaruw yanap mayisïna ukat yaqha cheqar yatiyir sarapkäna jupanakampiw parläna. Ukat 18 maranïkasaw yaqha cheqar saratayna, utapatjja 64 kilometronak sarañankänwa.

Purkäna uka jiskʼa tamajja, Pacífico jachʼa lamar qota jakʼanakanwa yatiyapjje. Jupajj akham siwa: “Baggao markankir machaq tamajar puriñatakejj kimsa uruw kayuk sarapjjta. Walja qollunakwa pasawayapjjta ukat 30 jawiranakwa paskatawayapjjarakta”. “Ukat Bibliat yateqerinakat yaqhepajja, 6 horanak kayuk sarañankapjjewa. Ukhamajja, utanakapanwa arumajj qheparta, ukat qhepürojj 6 horanakarakwa kayuk utar kuttʼanjjta.” ¿Chʼamachasitapajj inamayakïpachati? Jupajj akham siwa: “Awisajj kayunakajajj wal usutu, ukampis 18 jaqenakaruw Bibliat yatichta. Cheqas ‘yantʼtwa ukat Diosan munasiñ kankañap uñjaraktwa’” sasa (Sal. 34:8).

Sukhi sat soltera kullakajj Estados Unidos markatawa, ukat 40 jila maranïkäna ukhaw Filipinas markar sarjjatayna. ¿Kunatsa uka markar sarpachäna? 2011 maranjja, pä uru jachʼa tantachäwiruw saratayna, ukat ukanjja mä chacha warmi jilat kullakaruw entrevistapjjatayna. Jupanakajja, México markar yatiyir sarañatakejj kunatï jupanakan utjkän uk niya qʼalwa aljapjjatayna. Sukhi kullakajj akham siwa: “Uka entrevistaw kuntï jan lurañ amtkayäta uk lurañajatak yanaptʼawayitu” sasa. Filipinas markan jakasiri ukat panjabí aru parlirinakar yatiyirinak wakisitap yatisaw uka markar sarañ amtatayna, kunattejj jupajj India markankir familiat jutirïnwa. ¿Jan walin jikjjataspachänti?

“Jïsa”, siw jupajja, “kunanaksa aljäjja, ukat kunanakampikis qheparäjja uk amtañaw chʼamänjja. Ukhamarusa, 13 maranak sapaki mä suma utan jakaskasajj familiajan ukaruw sarañajäna, ukanjja janiw nayrjam jakasjjayätti. Ukampis kunatï wakiski ukampik jakasiñwa yateqawayta”. ¿Ukat Filipinas  markar purisajj kuna jan walirus saykatäna? Jupajj akham siwa: “Laqʼonakaruw wal ajjsarayäta ukat utajankañsa walirak munayäta. Ukampis Jehová Diosar wal atinisiñwa yateqawayta” sasa. ¿Ukham chʼamachasitapajj inamayakïnti? Jupajj saskakiwa: “Jehová Diosajj akham sistuwa: ‘Jichhajj yantʼapjjarakita, nayaw jumanakaru alajjpach ventananak jistʼaranisina walja bendicionanak apayanipjjäma’ sasa. Kunapachatï maynir yatiyktan ukhajj ‘¿kunürus kuttʼanïta? Walja jisktʼanakanïtwa’ siskitu ukhaw uka arunakajj cheqätap sum amuyta. Diosaru uñtʼapjjañapatak jaqenakar yanaptʼañajj wali kusiskañapuniwa” (Mal. 3:10). “Cheqas jutañ amtañaw chʼamänjja, ukampis uk lurjjta ukhajja, kunjamsa Jehová Diosajj taqe kunan yanaptʼitu uk uñjañajj wali muspharkañawa” sasa.

Niya 40 marani Sime jaqechat jilatajja, Filipinas markat Medio Oriente uksa toqenkir markaruw trabajir sarjjatayna ukat wali suma pagatarakïnwa. Uka markankkasajja, tamanak tumptʼir jilatan chʼamañchtʼata ukat Oraqpachan Jilïr Irpirinakat mä jilatan arstʼäwipaw Jehová Diosar nayrar uchañatak yanaptʼatayna. Jupajj akham siwa: “Trabajojj jaytañwa wal ajjsarayasiyäta” sasa. Ukhamäkchïnsa, trabajopat mistjjasaw Filipinas markar kuttʼjjäna. Jichhajja, Sime jilatajj Haidee warmipampejj kawkhantï jukʼamp yatiyirinakajj munaski ukanwa irnaqtʼasipki, Davao del Sur markana, uka markajj Filipinas markat aynach toqenkiwa. Jilatajj saskakiwa: “Nayrat amtasajj wali kusisitapuniw jikjjatasta, kunattejj trabajo jaytañ ajjsarañar atipjtwa ukat Jehová Diosar serviñwa nayrar uchawayta. ¡Jupar taqe chuyma serviñajj wali kusiskañapuniwa!”.

Kunapachatï Ramilo ukat Juliet precursor chacha warmejj kawkhantï jakasipkäna uka cheqat niya 30 kilometronak sarañan mä taman yanaptʼa munapjjatap yatisajja, nanakaw yanaptʼir sarapjjerista sasaw yatiyapjjatayna. Jalluskpans janisa, jupanakajj sapa semanapuniw tantachäwinakaru ukat yatiyiris motopat sarapjje. Ukat warkuskir puentenaksa ukat jan wali thakinakanjamsa sarapjjañapakchejja, uka tamar yanaptʼir sarasajj wali kusisitäpjjewa. Ramilo jilatajj akham siwa: “Panpachanejj 11 jaqenakaruw Bibliat yatichapjjta. Kawkhantï yatiyirinakajj munaski ukar yanaptʼir sarañajj chʼamäkchisa, wali kusiskañawa” (1 Cor. 15:58).

¿Jukʼamp yatiyirinakajj munaski uka cheqanakaru pachpa markamana jan ukajj yaqha markar sarañatakis kuns lurasma uk yatiñ munasmati? Ukhamächejja, tama tumptʼir jilatampiw parltʼasma ukat “¿Jumajj Macedoniar pasasmati?” siski uka yatichäw liytʼarakisma, ukajj Diosan Apnaqäwipat Yatiyañataki agosto 2011 qellqatanwa jikjjatasma.