ANTOINE Skalecki jilatajj jiskʼatpachaw minan trabajirïna. Ukanjj caballomp yanaptʼataw carbón sat qalanak apsurïna. Tunelanakajj oraqet 500 metro manqhankänwa. Mä kutejja, mä minaw alliranttäna, ukanwa Antoinen awkipajj usuchjasïna. Jan khiti trabajir utj-jjepansti Antoineruw familiapajj minan llätunka horanak trabajiñapatak khitapjjäna. Mä kutejja, Antoinerojj mä minaw alljjattäna, ¡niyapuniw jakañap aptʼasïna!

Khä 1920, 1930 maranakanjja, Francian walja wawanakaw nasïna, jupanakajj Poloniat jutiri jaqenakan wawanakapäpjjänwa. Antoine jilatajja uka wawanakat maynïrïnwa. ¿Kunatsa jaqenakajj Poloniat Franciar sarapjjäna? Nayrïr Jachʼa Chʼajjwäwejj tukuyjjäna uka qhepatjja, Polonian waljaw jaqenakajj jiljjattäna, janirakiw yaqha markanakan apnaqatäjjänti. Ukampis Francian mä millonatsa jilaw jaqenakajj guerran jiwarapjjatayna, ukhamajj minanakat carbón qalanak apsuñatakejj walja trabajirinakaw munasïna. Ukatwa septiembre 1919 maran Francia marka apnaqerimpi Polonia marka apnaqerimpejj mä amtaru mantapjjäna. ¿Kunatakisa? Poloniankir jaqenakajj Franciar sarapjjañapataki. 1931 maratakejja, Poloniankirinakat 507.800 ukhaniw Francian jakasjjapjjäna, jilapartejja Franciat alay toqenakan minanakajj utjkäna uka cheqanakanwa utjnoqapjjäna.

Poloniat jutiri jaqenakajj wali irnaqtʼirïpjjänwa. Francianjja, costumbreparjamasa, religionaparjamas sarnaqasipkakïnwa. Antoinejj akham siwa: “Mamajan Joseph awkipajja Bibliat wali respetompiw parlirïna, uksti awkipatwa yateqatayna” sasa. Jichhajja, Antoinejj 90 maranëjjewa. Poloniat jutirinakajja, kunjamtï Polonian iglesiarojj sarapjjerïkänjja, ukhamarakiw sapa domingojj wali suma isinakampi isthaptʼata sarapjjerïna. Ukampis Franciankir jaqenakajj janiw sinti Dios chuymäpkänti, ukatwa Poloniat jutirinakarojj jan sum uñjapjjerïkänti.

Poloniat jutirinakajja, Nord-Pas-de-Calais sat cheqanwa Bibliat Yatjjatirinakarojj uñtʼapjjäna. Jupanakajj 1904 maratwa uka cheqan Diosan arunakap yatiyapjjatayna. 1915 maransti, polaco arutwa Yatiyañataki revistajj imprimisiñ qalltasïna. 1925 maransti, ¡Despertad! revistaw imprimisiñ qalltasirakïna. Polaco arut qellqata uka revistanaksa, El Arpa de Dios sat librsa, walja familianakaw liytʼapjjäna.

Antoinen familiapajja, mamapan jilap toqew Bibliat Yatjjatirinakar uñtʼapjjatayna. Mamapan  jilapajja 1924 maranwa mä tantachäwir saratayna. Uka maranjja, Bruay-la-Buissière markanwa Bibliat Yatjjatirinakajj polaco arut mä jachʼa tantachäwi apapjjäna. Janïraw mä phajjsis paskänti ukhaw Brooklyn Betelat jutiri Joseph F. Rutherford jilatajj mä tantachäwi wakichtʼäna. Uka tantachäwirojja, 2.000 jaqenakaw sarapjjäna. Polaco aru parlirinakat waljaniru ukan uñjasajja, Rutherford jilatajja, jupanakar akham sänwa: “Diosaw Francia markarojj arunakapat yateqapjjañamataki apanipjjtam. ¡Jichhajja, jumanakaw wawanakamampi, Franciankir jaqenakarojj Diosan arunakapat yatiyapjjañama! Waljanir yatiyañaw faltaski, ukatakejja Jehová Diosaw yatiyirinak utjayaskani” sasa.

Ukhampunwa phoqasïna. Poloniat jutirinakajj kunjamtï minanakan wal irnaqapkänjja, ukhamarakiw Diosatak lurapjjäna. Yaqhepasti Diosan arunakap yatiyañatakiw Poloniaru kuttʼapjjäna. Jupanakat yaqhepajj Teofil Piaskowski, Szczepan Kosiak, Jan Zabuda jilatanakänwa. Jupanakajj walja cheqanakanwa Polonia markan yatiyapjjäna.

Waljaniw Francian qheparapjjäna, ukhamat ukankir jilat kullakanakamp chika yatiyaskakiñataki. 1926 maranjja, mä jachʼa tantachäwiw Sin-le-Noble markan apasïna. Ukanjja, polaco aru parlirinakajj waranqanïpjjänwa, francés aru parlirinakasti kimsa patakaraki. Anuario 1929 libronjja, akham qellqasïna: “Aka maranjja, polaco aru parlirinakat 332 ukhaniw bautisasiwayapjje” sasa. Payïr Jachʼa Chʼajjwäwejj janïr qalltkäna ukhajja, 84 tamanakaw Francian utjäna, ukhanitjja 32 tamanakajj polaco aru parlirinakäpjjänwa.

1947 maranjja, Polonia marka apnaqer gobiernon invittʼataw walja jilat kullakanakajj Poloniar kuttʼjjapjjäna. Sarjjapjjäna uka maranjja, yatiyirinakajj Francian sapa patakat tunkanimpiw Diosan Reinopat yatiyañ qalltapjjäna. 1948 marat 1950 marakamajja waljapuniw yatiyirinakajj jiljjattäna. Machaq yatiyiri jilat kullakanakaru yanaptʼañatakejja, Franciankir sucursalajj tamanak tumptʼirinakwa 1948 maran uttʼayañ qalltäna. Tamanak tumptʼirinakajj phesqanïnwa, pusinejj polaco aru parlirïpjjänwa, jupanakat maynïristi Antoine Skalecki jilatänwa.

Jichhürunakanjja, walja Testigonakaw Poloniat jutiri nayra awkinakapan apellidonakap apapjje. Jupanakajj walpun minanakansa, Diosan arunakapat yatiyañansa irnaqtʼawayapjje. Jichhasa, Francian ukhamarakiw yaqha markanakat jutirinakajj Diosan arunakap yateqasipki. Yaqha markat jutiri jilat kullakanakajj markanakaparu kuttʼjjapjjchisa, jan ukajj Franciansa qheparapjjchejja, nayra awkinakapjamarakiw Diosan Reinopat yatiyasipkaki. (Franciat qellqanita.)