TAQE kunsa Jehová Diosatwa jiwasajj katoqtanjja (Sant. 1:17). Warawaranakasa, chʼojjña qoranakasa, taqe ukham luratanakasa Jehová Diosaruw jachʼañchi (Sal. 65:12, 13; 147:7, 8; 148:3, 4).

Salmonak qellqerejja walpun Jehová Diosar munasïna, ukatwa luratanakapat jachʼañchañatakejj chuymar purtʼkir mä qʼochu qellqäna. Salmo 104 liytʼam, ukatjja salmonak qellqerjamarakit jikjjatasta uk amuytʼasim. Jupajj sänwa: “Jakañajjkamaw [Jehová] Tatitur qʼochü, jakkasaw Diosajjatak jayllï [jan ukajj ‘qʼochöjja’, Aymar Biblia]” sasa (Sal. 104:33). ¿Salmonak qellqerjamarakit Diosar jachʼañchañ munta?

Diosaw taqe kuns churistu, jiwasajj jupjamarakïsna ukwa Jupajj muni. Ukatakejj kunaymanitwa yanaptʼistu. Jehová Diosajj apóstol Pablorojj akham qellqayäna: “Aka oraqenkir qamirinakarojj sañamawa: ‘Jan jachʼa jachʼa tukupjjamti’ sasa, janiraki qamir kankañaparus alkatasipjjpati, ukanakasti tukusirikiwa. Ukat sipanjja jakkiri Diosaru katuyasipjjpan, khititejj taqe kunsa jilarkir churkistu kusisit jakañasataki ukaru. Ewjjtʼam sum sarnaqapjjañapataki, aski luräwinakana qamirkipstapjjpan, ukatsti jankʼakirakïpjjpan, kunatejj jupan utjki uk mayninakaru churañataki. Ukhamatwa yänakapajj utjani qhepüru sum saytʼañapataki, ukhamata wiñay jakaña katoqapjjañapataki” sasa (1 Tim. 6:17-19).

Pablojja, Corintonkir tamaru payïr carta qellqasajja, kunjam chuymampis kuns churañasa uka toqetwa amuytʼayäna. Akham sänwa: “Sapa mayniw, kunjämtï chuymapanjja amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa (2 Cor. 9:7). Ukjjarojja, janiw yanaptʼa katoqerinakakejj askinak katoqapkiti, jan ukasti churirinakasa Diosan bendicionap katoqapjjarakiwa sasaw sarakïna (2 Cor. 9:11-14).

Pablojj akham sasaw qellqañ tuktʼayi: “¡Yuspagaratäpan Diosajja! ¡Jiwasarojj mä jachʼa churäwi churistojja, ukasti jan amuytʼkayawa!” sasa (2 Cor. 9:15). Diosan jachʼa churäwipajja, kunanaktï Jesús toqejj markapar churki taqe ukanakawa. Jesusan jiwas layku jiwatapajj qawqha valoranisa ukajj janipuniw arumpejj sañjamäkiti.

Jehová Diosasa Jesusasa kunaymanwa jiwas laykojj lurawayapjje, jutïrinsa ukhamarakiw lurapjjani. Taqe ukanakat yuspäratasjja, tiemposa, chʼamasa, kunanakatï utjkistu ukanak churasaw uñachtʼaysna. Churatasajj waljäpasa janisa, Jehová Diosar jukʼamp jachʼañchasiñapatakiw yanaptʼani (1 Cró. 22:14; 29:3-5; Luc. 21:1-4).