Diosar jakʼachasipxam

“Chuymachasir Dios awki”

2 Corintios 1:3, 4

SAPAK uñjasiñasa, llakinakasa ukat chuyma usuyasiñanakasa utjapuniwa, taqi ukanakaw aynachtʼayistaspa. Ukhaman uñjasisaxa inas akham jisktʼassna, jichhax khitirak yanaptʼitanisti sasa. Apóstol Pablosti akham sänwa: Dios Awkisaw tʼaqhisiñanakasan jan jaytas chuymachistu sasa (2 Corintios 1:3, 4).

Kimsïr tʼaqan Pablox akham siwa: “Jupaw jiwasar khuyapayasir Awkisaxa” sasa. ¿Uka arunakax kamsañs munpacha? Griego arunxa, maynin tʼaqhisiñapat khuyapayasiri sañ muni. * Ukatwa yaqhip yatxatat jaqinakax akham sapxi: Uka arunakax “wali khuyapayasir Awki” jan ukax “maynin tʼaqhisitapat llakisiri” sañ munarakispa sasa. Jichhax ‘uka khuyapayasiñaxa’ janiw arukïkiti, jan ukasti Jehová Diosax luratanakapampiw khuyapayasiñ uñachtʼayi. Ukham suma awkïtap yatisaw Diosarux jukʼamppach jakʼachassnaxa.

‘Chuymachasiri’ Awki sasaw Pablox Jehová Diosat qhanañcharaki. Bibliat yatxattʼat mä jaqix akham sarakiwa: griego arut “chuymachasiri” sasin jaqukipaski ukaxa, “tʼaqhisiñanakamp llakinakamp aynachtʼataru chʼamañchaña” sañ muni sasa. The Interpreter’s Bible uka qillqatanxa akham sarakiwa: “Chuymachañaxa aynachtʼatanakar llakinak apañ yanaptʼañawa” sasa.

Ukat inas akham jisktʼassna: “¿Kunjamats Diosax chuymachistu? ¿Llakinakar saykatañatakix kunjamats chʼama churistu?” sasa. Biblian qillqat arunakapampiw wal chʼamachistu, ukat oración tuqis yanaptʼarakistuwa. “Qillqatan uchatäkän ukanakax jiwasanakaruw yatichistu, llampʼu chuyma tuqi suytʼañasataki” sasaw apóstol Pablox sarakïna. Ukatsti oracionan taqi chuyma jakʼachasktan ukhawa Jupax ‘chuymasar samarañ churistu ukax jaqinakan amuyupat sipans jukʼamp jachʼawa’ (Romanos 15:4; Filipenses 4:7).

¿Kunapachanakas Jehová Diosax chuymachistaspa? “Taqi tʼaqhisiñanakasanwa chuymachistu” sasaw Pablox säna (2 Corintios 1:4). Jan waltʼañanakasa llakinakasa tʼaqhisiñanakasa utjaskpanxa, Diosaw chʼam churistani ukat chuymacharakistaniwa, ukhamata uka jan waltʼäwinakar saykatañataki. ¡Uk yatiñaxa wal chuymachistu!

Janiw jiwasaki ukham chuymachatäktanti. “Jiwasax tʼaqhisirinakar chuymachtʼañasa[rakiwa], kunjämtï Diosax jiwasar chuymachkistu ukhama” sasaw apóstol Pablox säna. Chiqpachansa, Jehová Diosan chuymachäwipaxa, jaqi masisar chʼamanchtʼas chuymachañatakiw yanaptʼistu.

Ukhamäskapuniwa: Jehová Diosax wali ‘chuymachasir Awkiwa’. Ukhamäkipansa, janiw taqi llakinakassa jan waltʼäwinakassa jichpach tukjañapxa suyksnati. Ukampis jan waltʼäwinakarux yanaptʼapampix saykatsnawa. ¡Wali munasiñani Awkiwa! Ukhamasti juparuw jachʼañchañasa ukat yupaychañasa.

[Qhanañchäwi]