Biblia qellqaskäna uka tiemponakanjja ¿kunjamans jakäwejja? Qota thiyanakan ¿kunjamsa irnaqasïna?

“Jesusasti Galilea qota thiyanjamwa saraskäna, uñjarakïnwa pani chachanakaru; maynïristi Simón satänwa, yaqha sutipasti Pedro; maynipäkis ukajj Andrés jilapänwa. Jupanakasti qäna qotaruw jaqontasipkäna. Ukapachaw Jesusajj jupanakarojj saraki: —Nayaru arkapjjeta, ukatsti jaqe katuri tukuyapjjäma—sasa.” (MATEO 4:18, 19)

QOTATSA ukat qotan irnaqañatsa, Mateo, Marcos, Lucas ukat Juan qellqatanakanjj walja kutiw parlasi. Jesusajj wakiskir yatichäwinak yatichañatakejj walja kutiw chawlla katuñ toqet parlirïna. Cheqas ukhamänwa, jupajj Galilea qota jakʼanakanpunwa sarnaqerïna (Mateo 4:13; 13:1, 2; Marcos 3:7, 8). Uka qotajj mojjsa umanïnwa ukat largorojj niya 21 kilometronakänwa, anchorojj 11 kilometronakat jilarakïnwa. Jesusan arkirinakapatjja paqallqoniw chawlla katuripjjäna: Pedro, Andrés, Santiago, Juan, Felipe, Tomás ukat Natanael (Juan 21:2, 3).

Uka tiemponakanjj ¿kunjamsa qotan irnaqapjjerïna uk yatiñ munasmati? Yatjjatasajja, chawlla katuripkäna uka apostolanakarojj sum uñtʼäta, ukat kunanaksa Jesusajj luräna, parläna uksa amuyarakïtawa. Ukanak sum amuyañatakejja kunjams Galilea qotan irnaqapjjerïna uk uñjañäni.

“Qotanjama saraskipansti mä jachʼa thayaw sartäna”

Galilea qotajja, lamar qotat sipans 210 metronak aynachankiwa, jachʼa qala qarqanakaw thiyanakapan utjaraki. Alay toqensti  Hermón qolluw uñstaraki. Juyphi pachanjja, thayajj uksar aksaruw mathapinak sartayi, ukat juntʼu pachajj janiw kuna mathapinakas utj-jjeti. Awisajj akatjamat jachʼa qollunakat thayajj sartanisin qotan irnaqerinakarojj aynachtʼayi, ukaw mä kutejj Jesusampir, arkirinakapampirojj pasatayna (Mateo 8:23-27).

Botenakajj maderat luratänwa, largorojj 8 metroni, anchorojj 2 metroniraki. Walja botenakanjja, mä lawa saytʼayataw utjäna ukat qhepäjjepan samartʼañatakis utjarakïnwa (Marcos 4:35-41). Uka botenakajj kʼachakiw sarapjjerïna ukat wali thurunakarakïnwa, thayajj velapar thaytʼanisajj janiw kamachkänsa ukat wali jathi qänanakas maysar jiytʼkchïnjja, janiw aynachtʼkänti.

Botejj uksar aksar sarañapatakejj pä remonïnwa. Ukat sojjtats jilaw boterojj mantapjjerïna (Marcos 1:20). Jupanakajj wali wakichtʼataw sarapjjerïna, akanak apasipjjerïna: Linot lurat vela 1), thuru lazonaka 2), remonaka 3), qalat lurat ancla 4), thuru isinaka 5), manqʼañanaka (Marcos 8:14) 6), canastanaka 7), mä chʼijma (Marcos 4:38) 8) ukat mä qäna 9). Qänanak askichañatakejj inas boyanak apasipjjchïna 10), pesanaka 11), herramientanaka 12) ukat antorchanaka 13).

“Qänarojj chawllajj phoqtʼänwa”

Galilea qotanjj nayra patak maranakjamarakiw jachʼa jawiranakasa, jiskʼa jawiranakas chʼojjña qoranaka qotar apanki ukar chawllanakajj wal sarapjje. Jesusajj aka oraqenkkän ukhajja, chawlla katurinakajj arumaw antorcha qhanamp irnaqapjjerïna. Mä kutejja, Jesusan arkirinakapajj arum paqaraw chawlla katuñataki inak thaqhapjjäna. Ukat Jesusajj mayamp qäna umar jaqontapjjam sasin qhepärmantejj säna ukhajja, walja chawllanakwa apsupjjäna, niyaw botenakarus umar chhaqhantayäna (Lucas 5:6, 7).

Umajj wali manqhäki ukhanakanjja chawlla katurinakajj yaqhanakampiw mayachtʼasipjjerïna. Nayraqatjja qänanakap mä botet maysa botekamaw janatatapjjerïna ukat mayni botejj chʼeqaruw sarayäna ukat maynisti kupirurakiw sarayirïna ukat mayawjarukiw muythapipjjerïna. Ukhamatwa walja chawllanak katupjjerïna. Qänanakajj largorojj niya 30 metronïnwa, anchorosti 2,5 metroniraki, qänanak saytʼatäñapatakejj akham lurasïna: Manqhar mantañapäki ukarojj pesanak uchapjjäna, patjjankañapäki ukarojj boyanakwa uchapjjerïna. Ukat chawlla katurinakajj manqhankki uka lazonakat qäna jiytʼasaw chawllanak boter apantapjjerïna. Walja horanakaw  mayamp mayamp ukham lurasin irnaqapjjerïna.

Qota thiyanakanjja, mayjarak chawll katupjjerïna. Mä qhawqhanejj qota thiyaruw qänan mä thiyap kattʼata suyapjjerïna. Ukat botenkirinakajj uka pachpa qänan maysa thiyap katusaw jukʼamp khurir mantapjjerïna kuttʼaniñkama. Ukat muythapipkaspas ukham lurasaw qota thiyar puriñkam qänanak qatatipjjerïna. Ukat qota thiyanwa suma chawllanak ajllsusin, chawlla uskuñanakar uchjjapjjerïna. Yaqhepjja ukaratpachaw alj-jjapjjerïna ukat jila partjja, chʼarksusaw jayunchjjapjjerïna jan ukajj vinagreruw uchjjapjjerïna ukat ñeqʼet lurat tinajanakaruw imjjapjjerïna. Ukatsti Jerusalenaruw jan ukajj yaqha markanakaruw alj-jjapjjerïna. Jan escamanïpkäna ukat anguilanakjama jan chheqhaninakjja, qʼañut uñjapjjerïna ukat jaqtjjapjjerïnwa (Levítico 11:9-12). Jesusajj ‘Diosan reinopajj’ mä qänjamaw siskän ukhajja, uka kasta chawlla katuñatwa parlaskäna ukat kunayman chawllanak sasinjja, wali ukat jan wali jaqenakaruw uñtayarakïna (Mateo 13:47-50).

Maynikis chawll katurakispänwa sedal siski ukaruw broncet lurat walja anzuelonak chinuntasin umar jaqontaspäna jan ukajj amparamp apnaqañ wayaqar uñtasit mä jiskʼa qänampiw katusapäna. Ukham katuñatakejj umaruw qäna aptʼasita mantañapäna ukat qänjja altor jaqtʼasaw jayar puriyañapäna. Altonkkasinwa qänajj janatattasin umar chhaqhantjjäna. Ukat chawlla katurejj qänan chika taypipan mä lazojj ujtkän ukat jiytʼasaw chawllanïpachaw sasin waysunjjañapäna.

Niyakejjay qänanakajj wali qollqetakïchïnjja ukat suma uñjañarakïchïnjja, chawlla katurinakajj amuyumpiw apnaqapjjerïna. Ukat katuñ tukuyasajj walja horanakaw askichapjjerïna, tʼajjsupjjerïna ukat wañachtʼjjapjjerïna (Lucas 5:2). Santiago, Juan uka pani jila sullkajja, botep patanwa qänanakap askichasipkäna, ukhaw Jesusajj arkirinakapäpjjañapatak jawsäna (Marcos 1:19).

¿Kuna chawllanaks katupjjerïna? Galileonakajj tilapia sat chawlla jila partejj manqʼapjjerïna. Jesusas uka suma chawlljja manqʼpachänwa ukat waranqa waranqanir pä chawllampi mä milagro toqe maqʼaykäna ukhajja, inas uka tilapia chawllachïna (Mateo 14:16, 17; Lucas 24:41-43). Uka chawllajj kʼawnapjja, lakaparuw ansuñatakejj api ukat wawanakapar jarkʼaqañatakejja, lakaparuw imanti. Jan wawanïki ukhajja, mä jiskʼa qala jan ukajj uma manqhan kuna kʼajkir monedsa jikjjatasi ukwa lakapan aparakispa (Mateo 17:27).

Cheqas nayra patak maranakanjja, chawlla katurinakajj wal irnaqapjjerïna. Katuñatakejj wali paciencianïpjjañapänwa ukat kunas kunäskpan wal chʼamachasipjjañapäna. Jesusar arkañ amtirinakajja, ‘jaqenak katuñatakejj’ ukhamäpjjañaparakïnwa (Mateo 28:19, 20).

[27 janan fotopa]

(Qellqatanak uñjañataki)