Wawanakar yatichañataki

Jupatakik taqe kun munasaw Giezi chachajj taqe kunap aptʼasïna

¿JUMAJJ mä kun uñjasas jikjjatañ walt munirïta? *... Ukaw akapachankir walja jaqenakarojj pasaski. Ukat uk jikjjtañatakejj kʼarisiñajj ¿walikïskpachati?... Cheqas janiw walïkiti. Ukjja, jupatakik munir mä jaqekiw luraspa. Jupatakik kuns munatap laykojj kunas Giezi chacharojj pasatayna uk uñjañäni. Jupajj Jehová Diosan Eliseo sat profetapan yanapiripänwa.

Jesusan aka oraqen nasiñapatak niya waraq maranak faltaskän ukhaw Eliseomp Giezimpejj jakapjjäna. Jehová Diosajj Eliseo toqnamaw milagronak luräna. Mä kutejja, Eliseojj asirionakan soldadonakap pʼeqtʼir Naamán chacharuw lepra usupat qolläna sasaw Bibliajj qhanañchi. Ukhamajja, janipuniw khitis jupar qollirjamäpkataynati.

Eliseojj jaqenakar yanaptʼañatak milagro lurasajja, janiw qollq mayirïkanti ni katoqerïkansa. ¿Kunats ukham lurpachäna?... Kunattejj Jehová Diosaw uka muspharkañ milagronak luraskäna uk jupajj sum yatïna. Ukatwa kuntï Naamanajj lepra usupat qollatäjjasin qori, qollqe ukat wali jila alan isinak churañ munkän ukhajj jan katoqaskänti. Ukampisa, Giezi chachajj ukanak katoqañjja, walpun chuymapanjj munaskäna.

Naamanajj sarjjäna ukhajja, Giezi chachajj qhepapwa tʼijüna janiw Eliseompejj uñjayaskänti. ¿Giezi chachajj kamspachäns Naamanarojj uk yattati?... Pä chachanakaw visittʼir purinipjje ukat pä kast isinak mayinim sasaw Eliseojj khithanitu sasaw kʼarisïna.

 ¡¿Ukataq kʼaristï?! Giezejj chachajj kuntï Eliseojj jan katoqasiñ munkän uka yänak munasaw ukham kʼarisïna. Ukat ukajj kʼarikïtapjja, Naamanajj janiw yatkänti, ukatwa kuntï maykän ukat sipans jukʼamp churäna. ¿Ukjjarojj kunas paspachäna uk sasmati?...

Giezejj utar kutʼjjän ukhajja, Eliseojj akham sasaw jupar jisktʼäna: ‘¿Giezi kawkitsa jutaskta?’ sasa.

“Janiw nayajj kawkirus sarkti” sasaw Giezi chachajj säna. Ukampisa, Eliseorojj Jehová Diosaw kawkitsa jutaskäna taqe ukanak yatiyjjäna. Ukatsti Eliseojj kuntï lurktas ukajj janipuniw akchʼas walïkiti sasaw säna.

Giezi chachajja, kunanakatï jupar jan waktʼkän ukanakwa katusjjäna. Ukatwa Diosajj Naamanan lepra usupamp jupar castigäna. ¿Kunsa uka sarnaqäwejj yatichistu?... Kuntï munktan ukanak jikjjatañ laykukejj janiw kunäkipansa kʼarisirïñasäkiti, ukwa aka sarnaqäwejj yatichistu.

Giezi chachajj kʼari arunakakwa cheqäkaspas ukham parläna. ¿Kunats ukham kʼarispachäna?... Kunattejj jupatakik taqe kuns munirïnwa. Kunatï jan jupankkäna ukwa munäna ukat uk jikjjatañatakiw kʼarisïna. Ukham lurasajj jan walinpunwa uñjasïna, jiwañapkamaw uka usumpi usuntatäna.

Cheqansa, lepra usupat sipans jukʼamp jan walinwa uñjasïna. ¿Kunatsa ukham sistanjja?... Kunattejj Jehová Diosan suma amigopäñwa aptʼasïna. ¡Janipun Giezi chachjam pantjasiñäniti! Antisas kunatï utjkistu ukjja, janiw jiwasatakik munañasäkiti, jan ukasti wajjtʼasirïñasawa.

Bibliat liytʼañataki

2 Reyes 5:5, 20-27; Judas 21

Juan 15:10

[Qhanañchäwi]