Kunsa liytʼirinakajj yatiñ munapjje

¿Kunatsa Jehová Diosajj israelitanakar janiw yaqhanakampi casarasipjjätati sispachäna?

▪ Israelitanakar Diosajj kamachinak churkäna ukanjja, aka kamachiw utjäna: “Janirakiw jumanakajj jupanakampi parientechasipjjätati ni yoqall wawamaru ni imill wawamarusa jupanakan wawanakapampi casarapjjätati” (Deuteronomio 7:3, 4). ¿Kunatsa ukham sispachäna?

Mä toqetjja, kunjamsa Supayajj Israel markpachar kʼari diosanakar yupaychayas pantjasiyañ munäna uk Diosajj sum yatïna. Ukatwa jan Nayar loqtirinakampi casarasipjjanejja, Nayat jitheqtjjapjjaniwa ukat kʼari diosanakaruw loqtjjapjjani sas ewjjtʼpachäna. Cheqas amuyasipjjañapänwa Diosat jitheqtasajj yanaptʼapsa, jarkʼaqatäñsa aptʼasipjjasapänwa ukat uñisirinakapan aynachtʼayatäpjjasapänwa. Ukat ¿kunjamatsa jutaniw sat Mesiasajj israelitanakat mistsusapänjja? Uk yatisaw Supayajj israelitanakar Jehová Diosar jan yupaychirinakamp casarasipjjañap wal munpachänjja.

Ukampis Diosajj sapa mayni israelitaruw munasïna. Ukat Jupamp sum apasisakiw kusisiñsa, sumankañsa jikjjatapjjaspa uks yatirakïnwa. Ukhamajj Jupar jan loqtirinakamp jan casarasiñap munatapajj ¿walikiw sisnati? Salomonat amuytʼañäni. Diosar jan iyawsirinakamp casarasiñajj jan waltʼayirïtapjja sum yatïna, Jehová Diosajj akham ewjjtʼäna: ‘Chuymanakamjja, diosanakapar loqtapjjañamatakiw mayjtʼayapjjätam’ sasa. Salomonajj wali yatiñanïtap laykojj janiw mayjtʼayapkitaniti sispachänwa. Janiw Diosan ewjjtʼaparojj jan istʼkänti. Jukʼat jukʼatwa warminakapajj “chuymapjja mayjtʼayapjjäna [...] yaqha diosanak toqeruw uñtayapjjäna.” ¡Llakkañapuniwa! Jupajj Diosamp sum apasiñjja aptʼasïnwa, jan istʼasirïtapatsa markajj tʼaqjtataw uñjasïna (1 Reyes 11:2-4, 9-13).

Janiw taqenis Salomonjamajj purtʼasipkiti sasin inas maynejj amuychispa. Sañäni, Mahalonajj mä moabitampiw casarasïna, jupajj Rut satänwa, qhepat Rutajj Jehová Diosaruw taqe chuym loqtjjäna. Cheqansa, moabitanakamp casarasiñajj janiw walïkänti. Janiw Bibliajj Mahalonan luratapajj walikiw siskiti. Jupajj waynpachaw jiwjjäna Rutajj janïraw Jehová Diosarojj Diosapjam uñtʼkpachäns ukhaw jiwjjäna. Quilión jilapajj Orfa satänwa moabitampirakiw casarasïna, Orfajj kʼari ‘diosanakapjja janiw jaytanukkänti’. Rutajj Jehová Diosar loqtjjäna uka qhepatwa Booz chachajj jupamp casarasiskäna. Ukatsti, “judionakan Diosapar taqe chuym loqtirit” uñtʼatäjjarakïnwa. Rutamp Booz chachampejj purapatwa yanaptʼasipjjäna (Rut 1:4, 5, 15-17; 4:13-17).

Mahalonamp Rutampin casarasipjjatapajj walikïskänwa, yaqheppachajj Diosan kamachip jan istʼañajj walikïskiwa sasin amuyañajj ¿walikïspati? Ukham amuysnajja, lotería anatirinakat maynir ganir uñjasakis lotería anatasaw qollqejj gantʼasiña sisksnas ukhamäspawa. Cheqas pantjasnawa.

Jichha tiemp cristianonakarojj “iyawsirik iyawsirïpajja” mä arunjja, Diosar loqteripampikiw casarasipjjañapa sasaw Bibliajj ewjjtʼi. Ukat akham sarakiwa: “Jan jumanakajj Tatitur jan iyawsirinakampejj chikachasipjjamti, [...] mä chʼulla chʼulla yuntar uñtatäpjjasmawa” sasa. Uka arunakajj casarasiñ munapki uka cheqpach cristianonakatakiwa. Jehová Diosar jan loqtirinakamp casaratäjjapjje ukanakarojj Bibliajj sum jakasipjjañapatakejj wali sum ewjjtʼaraki (1 Corintios 7:12-16, 39; 2 Corintios 6:14). Casaratanakasa, sapäsipki ukanakas kusisit jakasipjjaspa mä arunjja, taqe loqtirinakapajj kusisitäpjjaspa ukwa matrimonio Uttʼayir Jehová Diosajj muni.