Nayajj jiskʼaskayät ukhaw awk taykajajj divorciasipjje, ukat mamajakiw kullakajarusa, jilajarusa ukat nayarusa uywapjjetäna. Ukapachanjja, Francia markankir oqar wawanakarojj janiw jichhürunakjam yatichaskänti, cheqas uka maranakanjja yatichäwejj wali llakkañänwa. Ukampisa, wawatpachwa kunanaktï oqar wawanakajj jan lurirjamäpki ukanak lurayäta. Uk jichhajj qhanañchtʼapjjäma.

Mä tiemponjja, oqar wawanakar parlañ yatichañasawa ukat kuntï parlaski uk uñjasa yateqañapatakiw yatichañasa sasaw yatichirinakajj sapjjerïna. Ukampis kawkhantï nayajj jilsuwayta uka Francia markanjja, janiw kunäkipansa escuelan amparampi parlasiñapäkänti. Ukatwa yaqhep yateqerinakarojj amparap jikhan qhepajjaparuw chintʼapjjerïna.

Wawakayät ukhajja, semanan walja horanakaw parlañ yatichir doctorampi qheparirïta. Ukanjja, lakaj katthapisaw kuntï jan istʼkayät uk kutin kutini ukat munkir jan munkir arsuyapjjetäna. Janipuniw yaqha wawanakampejj parlañjamäkänti. Uka maranakanjja walpun tʼaqhesiwayta.

Sojjta maranïsajja, kawkhantï walja oqar wawanakajj utjasipki ukaruw irpapjjetäna. Ukhapuniw yaqha oqar wawanakampejj jikista. Ukanjja janirakikiw amparampi parlasiñapäkänti. Jan istʼasirinakarojj ampar moqonakatwa jawqʼjapjjerïna, jan ukajj ñikʼutatwa jiyanoqapjjerïna. Ukampis nänakan uñstayat arunakampiw jamasat parlasipjjerïta. ¡Ukhapuniw mayni wawanakamp parlañ qalltawayta! Ukhamatwa pusi maranak kusisita jakasiwayta.

Tunka maranïsajja, yaqha escuelaruw irpapjjetäna, ukan wawanakajj janiw oqarapkänti, ¡ukatwa wali aynachtʼat jikjjatasiyäta! Taqe oqar wawanakas jiwaratapkaspasa ukat aka oraqen nayakis oqar wawakirist ukham amuyasiyäta. Ukat doctoranakajj kuntï parlañ yatichapkitäna uk jan armañajätakejja, familiajarojj janiw amparamp parlañ yateqapjjätati ni yaqha oqar wawanakampis chikachasiyapjjatati sasaw ewjjtʼapjjäna. Mä kutejja, oqaranakat sum yatjjatʼat doctoraruw uñjayasir sarta. Ukanwa amparamp parlañataki mä librojj utjäna. Uk uñjasajj jankʼakiw lukʼanamp wikuchtʼas akham sista: “¡Uk nayajj munta!” sasa. Uka doctorajj jankʼakiw uka libro imantasiwayjje. *

Mamajajj Biblian yatichäwinakap nänakar yatichañatakejj wal chʼamachasiwayi. Mérignac sat cheqan Jehová Diosan Qhanañchirinakapajj tantachasipki ukaruw irpapjjetäna, ukajj Burdeos sat marka jakʼankänwa. Ukan yatichaskäna uk janis sum amuykchiyätjja, mayn mayniw nayampejj qontʼasipjjäna ukat qellqtʼasaw amuyayapjjetäna. Ukham munasiñampi ukat nayat llakisipjjatapaw wal chuym chʼalljjtayitäna. Utanwa mamajamp Bibliat yateqawayta, ukampis janiw sum amuykayattï. Cheqas kunjamtï Daniel profetajj mä profecía angelat katoqkasajj jikjjataskäna ukhamarakiw nayajj jikjjatasiyäta, jupajj akham sänwa: “Istʼaskarakïyätwa, [...] ukampisa janiw amuytʼkäyätti” sasa (Daniel 12:8). Nayasti, “Uñjaskarakiyätwa, ukampis janiw amuytʼkäyätti”.

Ukampis Biblian cheqa yatichäwinakapajj jukʼat jukʼat chuymajar purtʼaskitäna. Ukat kuna cheqa yatichäwinaktï sum amuykäyäta ukjja, wali askit uñjayäta ukat ukarjam sarnaqañatak chʼamachasiyäta. Ukat mayninakan sarnaqäwinakapatsa yateqasirakiyätwa. Sañäni Biblianjja, paciencianïpjjañamaw sasaw yatichi (Santiago 5:7, 8). Ukjja, cristiano jilat kullakanakan luräwinakap uñjasaw yateqawayta. Cheqas tamankir jilat kullakanakaw nayrar sartaskakiñatakejj yanaptʼawayitu.

Qʼajjo waynakasaw callen oqar wayn tawaqonakar amparamp parlir uñjta. Ukat jupanakamp jamasat chikachasisaw francés arut amparamp parlañ yateqawayta, ukat Tantachasiñ Utarojj saraskakïyätwa. Ukat ukanjja, Stéphane sat waynaw nayar yanaptʼañataki ukat parltʼañatak wal chʼamachasïna, jupajj Jehová Diosan Qhanañchiripänwa, juparojj wal munasiyäta. Ukampis Stéphanejj ejercitor jan sarañ munatap laykuw carcelan jistʼantat uñjasïna, ukat jan jupampïsajj wali llaktʼata ukat aynachtʼata jikjjatasiyäta, ukat janirakiw kuns lurañ munjjäyätti. Tantachäwinakarus janirakikiw sarjjäyätti.

Ukat 11 phajjsinak qhepatjja, Stéphanejj librëjjatapat utaruw kuttʼanjjarakïna. Jupajj nayampejj amparampiw parljjäna, ukaw wal muspharayitäna. Janipuniw cheqaw sañjamäkänti. ¿Kunas paspachäna? Carcelankkasaw amparamp parlañ yateqatayna. Ukat jupar amparamp wali suma parlir uñjasajja, jichhakuchaw jukʼamp sum yanaptʼitani sasaw wal kusisiyäta.

Stéphane waynampiw Bibliat yateqañ qalltawayta. Ukat taqe kuntï nayrajj yateqkäyät ukjja, jukʼat jukʼat sum amuyjjayäta. Wawäkasajja, Bibliat apstʼat qellqatanakasan uñstki uka fotonak wal uñiriyäta, ukat khitinakäpjjesa uk sum amuyañataki ukat yatsuñatakis wal chʼamachasirïta. Cheqas Abrahamatsa, ‘wawanakapatsa’ ukat ‘walja jaqenakatsa’ yatiyätwa, ukampis uka toqenakat amparamp qhanañchtʼapjjetan ukhaw sum amuyjjäyäta (Génesis 22:15-18; Apocalipsis 7:9). Ukhamatwa kunjamtï chuymajan parlañ munkäyat uk jikjjatta, mä arunjja, amparamp parlaña.

Niyakejjay kuntï tantachäwin siski uk sum amuyjjchïyatjja, yatichäwinakajj chuymajarupuniw purtʼitäna ukat jukʼampiw yatjjatañsa munjjarakiyäta. Stéphanen yanaptʼapampejj Biblian yatichäwinakapjja, jukʼamp amuyjjäyäta, ukat Jehová Diosar jakäwejj katuyasisajj 1992 maranwa bautisasirakta. Nayrarus jukʼamp sartaskchiyätjja, walja maranak jan khitimp parlatäjj laykojj wal ajjsarirïyäta.

Tiempompejja, oqaranakat jiskʼa grupojj utjäna ukajj mä tamampiw mayachthapisjjäna, uka tamajj Pessac sat cheqankänwa ukajj Burdeos markankarakinwa. Ukajj nayatakejj wali askïnwa kunattejj ajay toqet jukʼamp jiltaskakiñatakiw yanaptʼitäna. Ukat mayninakamp parlañajj nayatakejj  chʼamakïnwa, ukampis amigonakajajj kuntï sapkitän uk sum amuyañajatakiw chʼamachasipjjäna. Gilles ukat Elodie chacha warmejja, nayamp parlañatakejj walpun chʼamachasipjjäna. Walja kutiw manqtʼasiñatakisa jan ukajj café umtʼasiñatakis tantachäwinak tukuyatarojj utapar jawsapjjetäna, ukhamatwa jupanakampejj suma amigopjjayäta. Jehová Diosan munañaparjam sarnaqapki ukanak taypinkañajj ¡wali kusiskañawa!

Uka tamankkasaw wali munasiri Vanessar uñtʼawayta. Jupajj wali khuyaptʼayasiri ukat cheqapar kuns luriri ukhamänwa. Janiw oqarätajj laykojj janis kunatak askïkirista ukham uñjkitänti, antisas kuna askinaksa lurirista uk uñjäna. Cheqas jupaw chuymajj lunthatitu, ukatwa 2005 maran casarasjjapjjta. Ukat mayninakamp parlañwa ajjsarasiyäta ukhas jupaw jan ajjsarirïñataki ukat taqenimp sum parltʼasiñatak yanaptʼawayitu. Ukham taqe luräwinakajj sum phoqhañajataki yanaptʼatapatjja, taqe chuymapuniw yuspärta.

Casarasipkta uka mararakiw Francia markan Louviers sat cheqan Jehová Diosan Qhanañchirinakapan sucursalapar mä phajjsi sarañajatak invittʼapjjetu. Ukanjja traductorjam irnaqtʼañajatakiw wakichtʼapjjetu. Aka qhepa maranakanjja, Francia markankir amparampi parlirinakatakejj walja horanakaw DVD video apsuñatakejj irnaqasiwayi; ukampis lurañanakajj utjaskakiwa, ukat mä arut yaqha arur jaqokipañataki irnaqtʼapki ukanjja, yanapajj munasiskakïnwa.

Vanessatakisa ukat nayatakisa, sucursalan irnaqtʼatajajj Jehová Diosan mä aski churäwiparjamaw uñjapjjta, cheqas mä jukʼa llaktʼatapjjarakiyätwa. ¿Amparampi parlirinakat mä jiskʼa grupojj utjkäna ukarojj khitis yanaptʼani? ¿Utjja khitirus jaytʼasiwayapjjeristjja? ¿Vanessa esposajajj trabajo jikjjatakpachäniti? Taqe uka llakinak atipjañatakejj Jehová Diosaw yanaptʼawayapjjetu. Ukat Jehová Diosajj qhawqsa nayarusa, esposajarusa ukat oqaranakarusa munasi uk qhan amuyawayta.

Kawkhantï mä arut yaqha arur jaqokipapki ukan irnaqañajj nayatakejj wali askïnwa, ukat kunjamsa oqaranakar Diosar yupaychañan yanaptʼasispa uk sum amuyañsa yanaptʼarakituwa. Cheqansa, nayamp parlañatakejj walja jilat kullakanakaw chʼamachasipjje, uk uñjañajj ¡wali kusiskañawa! Janirakiw yaqhachatäkirist ukham amuyaskti. Ukat taqe ukanak uñjasajja, Jehová Diosan markapajj mä wawaki sarnaqapjjatap ukat munasiripjjatap qhan uñjasi (Salmo 133:1).

Ukat wali khuyaptʼayasiri ukat munasiri jilatanakar nayar yanaptʼañajatak khitanitapatjja Jehová Diosar wal yuspärta. Ukat wali munasir taqe kun Lurir Diosar uñtʼapjjañapataki ukhamat jakʼachasipjjañapataki yaqha oqaranakar yanaptʼañajj nayataqejj wali askiwa ukat ukatjja wal yuspäraraktjja. Cheqas kunanakatï jichhürunakan taqenimpi sum parltʼasiñataki jarkʼkistu ukanak tukusiñap wal suyasktjja ukat taqenis mä familjama ‘qʼoma arunak’ parlsna mä arunjja, kunatï Diosatsa amtäwinakapat cheqaki uk parlañjja wal suyasktjja (Sofonías 3:9, NM).