Rmaysh sat cheqankirïtwa, ukajj Líbano markankiwa, Israel marka jakʼana. Markachirinak pura chʼajjwapkän ukhaw jilsuwayta. Kunjamsa Oraqen imantat bombanakajj phallasin jan chʼajjwirinakarus jan amparani jan kayuni usuchjäna uk amtaskaktwa. Ukan jakañajj chʼamänwa, lunthatanaka ukat jan wali jaqenakakiw utjäna.

Familiajajj Maronita sat católica iglesiankapjjänwa. Familianjja 12 ukhapjjayätwa, tatajajj nanakar uywañatakejj wal trabajäna, mamajakiw iglesiarojj irpapjjetäna. Tiempompejj iglesiasa jaqenakasa, jan yanapirinïpki ukanakar yaqhachjjapjjatap amuyayäta.

Waynitöjjäyät ukhajj kung fu sat nuwasiñ yateqañatakiw chʼamachasiyäta. Tiempompejj amparampi kayumpi nuwasiñ sum yatjjayäta, ukat uka kasta nuwasiñan kuna armanakatï utjki uk apnaqañsa yatjjarakiyätwa. ‘Guerrajj janis saytʼayañjamäkchejja, jan wali jaqenakan jan walinak jan lurapjjañapatakis jarktʼapuniwa’ sasaw sayäta. Ukatwa pä jaqenakar nuwasir uñjasajj jankʼaki jaljtayirïta. Ratuk kuns muniri, jankʼak coleriri ukhamäyätwa. Líbano aynach toqenjja, wal ajjsarapjjetäna, kunattejj ina chʼusat tʼaqhesiña ukat jan walinak nä pachpa tukjañatakiw chʼamachasiyäta.

Beirut markan kung fu nuwasiñ yatipki uka gruporuw 1980 maran qellqayasta. Sapürus bombanakampi, balanakampi nuwasisipkchïnjja, yateqerejj saraskakirïtwa. China markat jutir Bruce Lee sat chachjamaw manqʼerïta, ikirïta, jakasirïta, ñikʼutsa peintʼasirïta, sarnaqerïta, nuwaskasas wararirïta. Jupajj Estados Unidos markan peliculanak lurirïnwa, kung fu nuwasiñansa atiptʼarakirïnwa. Janipuniw larurïktsa.

China markan kung fu nuwasiñan wali yatjjatat nuwasirïñ munayäta. Mä urojja, uka markan nuwasiñatakiw yatsuskayäta, ukhamaruw punk leqtʼanipjje. Ukhajj uka nuwasiñ chʼiyar isini ukat jumpʼi mayaki ukhamäskayätwa. Mä amigojaw Jehová Diosan pä  Qhanañchiripampi Bibliat parlir jutapjjatayna, ‘janiw uka toqet kuns yatkti’ sasaw jupanakar sista. Kunjamsa ukajj wiñayataki yanaptʼitaspäna uk janiw amuykayätti.

‘Ina chʼusat tʼaqhesiñsa, jan walinaksa janiw jaqejj tukjkaspati. Ukanak utjañapatakejj Supayaw juchani’ sasaw jupanakajj Bibliat yatichapjjetu (Apocalipsis 12:12). Suma arunakampi, taqe chuyma parltʼapjjetäna ukajj wal muspharayitäna. Diosan sutip yateqasajj chuymajas chʼalljjtitänwa (Salmo 83:18). * Ukatsti, 1 Timoteo 4:8 qellqat liytʼarapipjjetu, ukan akham siwa: “Janchin ejercicio lurañajj kunatakis askiwa, ukampis Dios chuymäñawa jukʼampi taqe kunatakis askejja, akapachan jakañatakisa ukhamarak jutiri urun jakañatakisa” sasa. Ukaw wal yanaptʼawayitu.

Jehová Diosan Qhanañchirinakapampejj janiw jikisjjayätti. Familiajaw jupanakan kuttʼaniñap jan munkänti. Ukhampachas kung fu nuwasiñ jaytjjaña ukat Bibliat yatjjatañwa amtawayta. Ukajj jilanakajatakejj janiw askïkänti. Ukampis Bibliat yateqaskakiñatakejj Jehová Diosan Qhanañchirinakapar thaqhañ amtayäta.

Jupanakar janiw jikjjatkti. Ukhanakarakiw tatajajj akatjamat jiwjjäna, familiarajansa jan waltʼäwinakajj utjarakïnwa. Ukanakaw wal llakisiyitäna. Utanak lurapki uka empresanwa trabajayäta, mä urojja, Adel sat trabajir masijaw ‘¿kunatsa wali llakitäta?’ sasin jisktʼitu. Jiwatanakajj jaktapjjaniwa sasin Bibliajj siski uka toqetwa parltʼitu. Jupajj Jehová Diosan Qhanañchiripätaynawa. Llätunka phajjsinakaw Bibliat yatichitu. Pacienciampi ukat munasiñampi.

Bibliat yatjjatkasajja, jan walinak jaytjjañ wakisitap amuyjjayäta, nayajj jankʼak coleriri, ratuk kuns muniri ukhamäyätwa, uk jaytañajj chʼamakïnwa. Ukampis Bibliaw yanaptʼawayitu. Mateo 5:44 qellqatanjja, akham sasaw Jesusajj ewjjtʼistu: ‘Uñisirinakamarojj munapjjam, Diosat mayirapipjjarakim, jan walinaks lurapktam ukanakatakisa’ sasa. Romanos 12:19 qellqatan akham sarakiwa: “Jumanak purajj jan ukhamat ukham lurjasipjjamti [...]. Qellqatanjja siwa: ‘Nayaruw waktʼitu mutuyaskañajja, nayarakiw phoqhaskäjja, siw Tatitojja’” sasa. Uka qellqatanaka ukat yaqha ukham qellqatanakaw suma jaqëñatak yanaptʼawayitu.

Familiajajj Jehová Diosan Qhanañchirinakapampi Bibliat yatichayasiñäj janiw munapkänti, jichhajj respetjjapjjewa. Mä jilajasa, Jehová Diosan Qhanañchiripäjjewa, mamajas kuntï nanakajj creyipkta ukjja, jiwañapkamaw arjjatawayi.

Anitampi casarasisajj kusisitätwa, Diosar ajjsartʼiri suma esposapuniwa. Diosat yatiyañatakiw jila partejj chʼamachasipjjta. 2000 maratwa Eskilstuna (Suecia) sat markan jakasjjapjjta, ukan árabe aru parlirinakaruw Bibliat yatichasipkta.

Jan walinakampi tʼaqhesiyata jaqenakat lupʼiskaktwa. Ukampis kunatsa tʼaqhesiñanakajj utji ukat Diosajj kunjamsa niy tukjkani uk yateqasajj wal kusista (Salmo 37:29).