NAYRÏR JANAN PʼEQEÑCHÄWIPA | JUMAJJ DIOSAN AMIGOPÄSMAWA
¿Diosajj amigojaw sasmati?
“Diosan amigopäñajj wali sumawa, janiw kunatsa llakisktati ni pächaskaraktasa, jumat wal llakisi ukat sum jakasiñam munaraki.” (GHANA MARKANKIR CHRISTOPHER SAT WAYNA)
“Llakitäkta ukhajja, Diosajj uñjasktamwa ukat jukʼampirakiw munastamjja.” (ESTADOS UNIDOS MARKANKIR, 13 MARANI HANNAH SAT IMILLITA)
“Diosan amigapäñajj sum jakasiñataki, jan kuns ajjsarañatakiw yanaptʼitu. Nayatakejj Diosamp sum apasiñajj wali askipuniwa.” (JAMAICA MARKANKIR GINA SAT WARMI, JUPAJJ MÄ 45 MARANAKANIWA)
Janiw jupanakakejj ukham amuyapkiti, jan ukasti oraqpachanjja waljaniw ukham amuyapjjaraki. Jumasti, ¿Diosajj amigojaw sarakismati? ¿Amigopäñ munarakismati, jan ukajj Jupar jukʼamp jakʼachasiskakiñ munasmati? Inas akham jisktʼassta: “¿Kunjamaraki nayjam aleq jaqekisti Taqe Chʼamani Diosan amigopäspasti?” sasa.
DIOSAN AMIGOPÄSNAWA
Bibliajja, Diosan amigopäsnawa siwa. Sañäni, Isaías 41:8 qellqatarjamajja, Diosajj ‘nayan munat amigoja’ sasaw Abraham chacharojj säna. Ukat Santiago 4:8 qellqatanjja, mä suma invitacionaw utjaraki. Ukanjja akham siwa: “Diosar jakʼachasipjjam, jupasti jumanakarojj jakʼachasirakiniwa” sasa. Ukhamasti Diosan amigopäsnawa. Ukampis janiw Juparojj uñjktanti, ukhamajj ¿kunjamaraki jakʼachassnasti?
Uka jisktʼar qhanañchañatakejja, kunjamatsa pä jan uñtʼatanakajj suma amigor tukupjje uka toqet amuytʼañäni. Jupanakajj nayraqatjja, sutipwa yatiyasipjje. Jikisisipkakini ukhajja, amuyunakapatsa, kunjamsa jikjjatasipjje ukanakat parltʼasipjjani, ukham lurasajj jukʼamp sumwa uñtʼasipjjani. Ukat purapat yanaptʼasipjjani ukhajja, suma amigojjapjjaniwa. Diosampi amigoñatakejja niya ukhamarakiwa. Uka toqet jukʼamp uñjaskakiñäni.
Akanakajj inas gustarakiristam
YATIYAÑATAKI
¿Diosan sutip yattati?
Diosajj Jupar jakʼachasiñaswa muni. Ukatwa Biblianjja akham sistu: “Nayätwa [Jehová] Tatitojja, ukarakiw sutejjajja” sasa.
