Markapar jan walinakat qhespiyañatakejja, Diosajj juezanak nayra tiempon uttʼayäna (Jueces 2:18). Jutïrin utjkani uka Juicio Urut Bibliajj ‘wali kusisiñ urunakaniw’ sasaw qhanañchi. Ukanjja, oraqpachan jachʼa Juezaw mä arunjja, Jehová Diosaw ina chʼusat tʼaqhesiñanak aka Oraqet chhaqtayani. (Salmo 96:12, 13 ukat Isaías 26:9 liytʼäta.)

Taqe ukanak Jesús toqew Diosajj lurani. Kunattejj Jehová Diosaw Jesusar mä juezarjam uttʼayi, ukhamat jiwatanakarusa, jaktirinakarusa cheqaparjam juchañchañapataki (Hechos 10:42; 17:31). Juicio Urunjja, Diosar jan uñtʼas jiwawayapki ukanakaruw Jesusajj jaktayani. Ukhamat uka jaqenakajj Cheqpach Diosar uñtʼapjjañapataki ukat taqe chuyma munasipjjañapataki. (Hechos 24:15 liytʼäta.)

Bibliarjamajja, Juicio Urojj waranqa maranakaniwa. Uka maranakanwa jiwatanakajj jaktanipjjani ukat Diosar uñtʼapjjani, Jupar istʼañsa yateqapjjarakini (Apocalipsis 20:4, 12). ‘Kuna jan walinaktï janïr jiwkasajj jaqenakajj lurawayapki ukarjamaw juchañchasini’ sasaw waljanejj amuyapjje, ukampis Bibliajj kuntï uka qhepat lurapkani ukarjamaw juchañchasini sasaw qhanañchi. (Romanos 6:7 liytʼäta.)

Bibliajj yaqha juicio urutwa parlaraki, ukajj janïr waranqa maranak qalltkipanwa akatjamat pasañapa. Uka ururojj akapachan tukusiñapa sasaw uñtʼasi, kunjamtï aka revistan qallta yatichäwipan uñjaniwayktan ukhama. Ukanwa Diosajj jan wali jaqenakar tʼunjani (2 Pedro 3:7). Ukatwa Diosar cheqpachapuni munasitas uñachtʼayañajj wakisi. (2 Pedro 3:9, 13 liytʼäta.)