BIBLIAJJ AKHAM SIWA: “Horasajj purininiwa taqe jiwatanakasti arupjj istʼapjjaniwa. Ukatsti uka jiwatanakajj jaktapjjaniwa” sasa (Juan 5:28, 29).

Jesusajj jutïrin apnaqjjani ukhajj taqe jiwatanakaruw jaktayani, ukjja, jupa pachpaw arsuwayarakïna. Pasïr yatichäwin yatjjataniwayktan uka Fernando chachajj akham sarakiwa: “Juan 5:28, 29 qellqata liytʼasajj walpun muspharta. Uka suytʼäwejj wali askipuniwa, ukatwa uka urunak jankʼak puriniñap suyaskta” sasa.

Job chachajja, Diosajj jutïrin jaktayitaniwa sasaw taqe chuyma confiyäna. Akham sasaw jisktʼasïna: “¿Mä jaqesti jiwjjasinjja wasitat jaktanjjaspati?” sasa. Ukat jupa pachpaw akham sarakïna: “Nayasti qawqhaya wakischispa ukhakamaw suytʼirista, tʼaqhesiñajjan tukusiña puriniñapkama [sepulcro manqhankañkama]. Jumatejj jawsitasmajja, nayajj jaysarakirismawa” sasa (Job 14:14, 15).

Lázaro chachan Marta kullakapajj ukhamarakiw jaktañajj utjapuniniwa sasin taqe chuyma confiyarakïna. Lázaro jilap jiwjjäna uka qhepatjja, Jesusajj jupar akham sänwa: “‘Jilamajj jaktaniwa’ sasa. Martasti sarakïnwa: ‘Jïsa, jiwatanakan qhepa urun jaktañapjja yattwa’ sasa. Ukjjarojj Jesusajj sänwa: Nayätwa jaktañasa, jakañasa. Khititejj nayaru iyawsarakitu ukajja jiwatäkanisa, jakaniwa” sasa (Juan 11:23-25). Uka qhepatwa Jesusajj Lazaror jaktayäna. Ukajja, kunjamsa jutïrin jiwatanakajj jaktapjjani ukwa qhan amuytʼayistu. Millón millón jaqenak jaktanir uñjañajj ¡kunja kusiskañakïkani!

BIBLIAJJ AKHAM SIWA: Biblian kimsaqallqo jaqenakar jaktayasitapat parlki ukanakat sipansa, Jesucriston jaktäwipajja mayjänwa sasaw Bibliajj qhanañchi. ¿Kunansa mayjäna? Uka kimsaqallqo jaqenakajja aka Oraqen jakañatakiw jaktapjjäna. Ukampis Jesucriston jaktäwipatjja, Bibliajj akham sarakiwa: “Jupasti alajjpacharuw makhatjje ukatsti Diosan kupëjjaparuw qontʼasjje” sasa (1 Pedro 3:21, 22). ¿Jesucristo sapakit alajjpachan jakañatak jaktpachäni? Arkirinakaparojj akham sataynawa: “Sarjjasinsti ukat mä utjäw wakichasinjja, wasitampiw jutä jumanakaru irpasjjañataki, kawkhankkätï nayajj jumanakajj ukkhankapjjañamatakiraki” sasa (Juan 14:3).

Jesusajj alajjpachar sarjjasajja, yaqhep arkirinakapar katoqañatakiw wakichtʼäna. Bibliarjamajja, 144.000 jaqenakaw alajjpachar sarapjjani (Apocalipsis 14:1, 3). Ukampis ¿kunsa jupanakajj alajjpachan lurapjjani?

 Cheqas jupanakajj walja luräwinïpjjaniwa. Bibliajj akham siwa: “Kusisiñanïpjjewa, Diosar katuyatäpjjarakiwa khitinakatejj nayrïri jaktäwin jaktapki ukanakajja. Qhepïri jiwasti jupanakjjarojj janiw kuna chʼamanïkisa, jan ukasti jupanakajj Diosampina Cristompina sacerdotepäpjjaniwa. Waranqa mararakiw jupampejj reinapjjani” sasa (Apocalipsis 20:6). Jupanakajj reyinakjama, sacerdotenakjamaw Jesusamp chika aka Oraqer apnaqanipjjani.

BIBLIAJJ AKHAM SIWA: Apóstol Pablojj akham sasaw Biblian qellqäna: “Jupanakjamarakiw Diosar iyawsas suytʼaskta, jiwatanakat ñanqha jaqenakansa, aski jaqenakansa jaktañapjja” sasa (Hechos 24:15).

Apóstol Pablojj “aski jaqenaka” sasinjja, ¿khitinakatsa parlaskäna? Sañäni, Daniel profetajja, aski jaqet uñtʼatänwa. Jupajj Diosar jan jitheqtasaw loqtawayäna, ukatwa Diosajj janïr jiwkipan akham säna: “Samartʼarakim, qhepa urunakanwa sartasjjarakïta, kunatejj waktʼkätam uka katoqañamataki” sasa (Daniel 12:13). ¿Daniel profetajj kawkhan jakañatakis jaktani? Bibliajj akham siwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29). Jesusajj akham sarakïnwa: “Kusisiñanïpjjew llampʼu chuymaninakajja, jupanakarakiw Diosan arsutaparjama oraqe katoqapjjani” sasa (Mateo 5:5). Daniel profetasa ukat Diosar jan jitheqtas loqtawayapki ukanakasa, aka Oraqen wasitampi jakañatakiw jaktapjjani, ukat wiñayatakiw jakapjjarakini.

Apóstol Pablojj “ñanqha jaqenaka” sasinjja, ¿khitinakatsa parlaskäna? Diosar jan uñtʼasa ukat Biblian yatichäwinakap jan uñtʼasa jiwawayapki, uka millón millón jaqenakatwa parlaskäna. Jupanakajj jaktjjasinwa Jehová * Diosarusa, Jesucristorusa uñtʼapjjani, ukat jupanakar wal munasipjjarakini (Juan 17:3). Khitinakatï Diosar serviñ amtapkani ukanakajja, wiñayatakiw jakapjjani.

BIBLIAJJ AKHAM SIWA: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa (Apocalipsis 21:4). “Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini” (Isaías 65:21).

Munat familiaranakasajj jaktanjjapjjaniwa, jupanakampi jakasiñajj ¡kunja kusiskañakïkani! Ukampis ¿kunjamatsa ukajj cheqapunïniwa sasajj taqe chuyma confiysna?