NAYRÏR JANAN PʼEQEÑCHÄWIPA
¿Jiwjjasajj kawkharus maynejj sarjjpacha?
“Maynejj aka kimsa cheqarukiw jiwjjasajj saraspa sasaw amuyayäta: alajjpacharu, infiernoru ukat purgatorioru. Janiw alajjpachar sarañatakjam sinti suma jaqëkayätti, ni sinti jan wali jaqëkayätsa infiernor sarañatakejja. Ukampis purgatoriojj kunänsa uk janiw sum yatkayätti, ni kuntï Bibliajj yatichki uksa yatkarakiyätti. Kuntï jaqenakajj sapki ukak yatiyäta.”
(Lionel)
“Jiwatanakajj alajjpacharuw sarjjapjje sasaw yatichapjjetäna, ukampis janiw ukajj cheqaw sañjamäkänti. Jiwjjasajj taqe kunas ukharukiw tukusjje sasaw amuyayäta.”
Fernando)
¿Kunjamäsipkis jiwatanakajj sasin jisktʼasirïtati? ¿Tʼaqhesisipkpachati? ¿Jupanakampejj wasitat jikissnati? ¿Kunjamatsa jiwañat cheqpach yatsna? Uka jisktʼanak qhanañchañatakejja, kunsa Bibliajj uka toqet yatichi uk jichhajj yatjjatañäni. Nayraqatjja, kunsa Bibliajj jiwañ toqet yatichi uk uñjañäni, ukjjarusti yaqha kimsa jisktʼanakaruw qhanañchaskañäni.
¿Kunjamäsipkis jiwatanakajja?
BIBLIAJJ AKHAM SIWA: “Khitinakatejj jakasipki ukanakajja yatisipjjewa jiwjjañanakapa, ukampis jiwatanakajj janiw kunsa yatipkiti, janirakiw kunsa jikjjatapkarakiti, jupanakajj armatäjjatap layku. Kuna lurañatejj jumataki utjkani ukjja chʼamamarjam luram, jumajj sepulcror sarkätas ukanjja janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti” sasa (Eclesiastés 9:5, 10). *
Sepulcrojja, mä arunjja jiwatanakajj kawkhankapkitï ukajja, janiw cheqpach mä lugaräkiti, jan ukasti mä uñtasïwikiwa, ukanjj janiw kuna yatiñas ni kuna lurañas utjkiti. Job chachatakejj ¿kunäns sepulcrojja? Jupajj mä urunakwa taqe yänakapa, wawanakapa aptʼasïna. Ukat jan qollkaña llejjti usumpiw usuntarakïna. Ukhamïpansti, akham sasaw Diosar wal ruwtʼasïna: “Walïspawa nayaru jiwañan munañaparu [mä arunjja, sepulturaru] imantjjañamajja” sasa (Job 1:13-19; 2:7; 14:13). Kunjamtï amuyktanjja, Job chachatakejj sepulcrosa jan ukajj infiernosa, janiw ninan tʼaqhesiñ lugaräkänti. Antisas tʼaqhesiñat samartʼañ lugaränwa.
Jiwatanakajj kunjamäsipkisa uk yatiñatakejja, jiwatanakar jaktayaskäna ukanak Biblian liytʼañaw yanaptʼistani. Ukatakejja, “ Kimsaqallqo jaqenakaruw jaktayasïna” siski uka recuadro uñjjattʼam.
Janiw jupanakat maynis ‘wali suma lugarawa, jan ukajj ninan tʼaqhesiñawa’ sasajj sapkänti. Yaqha cheqar sarapjjaspäna ukhajja, ¿janit uka toqet yatiykistaspäna? ¿Janit ukajj Bibliar qellqaskarakispäna, ukhamat jiwatanakajj kunjamäsipkisa uk yatiñataki? Ukampis Bibliajj janiw uka toqet kuns qhanañchkiti, ni uka kimsaqallqo jaqenakas uka toqet kuns sapkarakiti. ¿Kunatsa? Jiwatäpkäna ukhajja, janiw kuns amuyapkänti, wali sums ikisipkaspa ukhamäsipkänwa. Biblian jiwañ toqet parlañatakejja, awisajj “ikiña” arwa apnaqaraki. Sañäni, Davitasa ukat Estebanas jiwjjapjjänwa sañatakejj “iktʼawayjjewa” sasaw qhanañchi (Hechos 7:60; 13:36, MT).
Ukhamajja, ¿taqe kunas jiwañarukit tukusjje, jan ukajj uka ‘ikit sartsnacha’?
^ tʼaqa 7 “Sepulcro, amay imäwi” sasaw Hebreo arut Seol ukat griego arut Hades siski uka arunakatakejj apnaqasi. Yaqhep Biblianakan “infierno” sasaw jaqokipasiraki, ukampis Bibliajj janiw ninan tʼaqhesiñat parlkiti.
Akanakajj inas gustarakiristam
YATIYAÑATAKI
¿ Jesusajj cheqapunit jiwatanakar jaktayirïna?
Jesusan jiwatanakar jaktayatapajj ¿kunar confiyañatakis yanaptʼistu?
