Mä mara qhepatjja, peliculanak lurjjayäta, ukan nayaw jilapart uñstirïta. Periodistanakajj entrevistañsa, fotonak apsuñsa wal munapjjetäna, machaq peliculanak uñtañatakisa, inauguración lurañatakisa, manqʼerisa wal invitapjjetäna.

Ukampis tiempompejj ukham jakañajj janiw askejjänti. Apskayäta uka peliculanakan jilapartejj nuwasiñanaka, chʼajjwäwinakaw uñstäna. Janiw kunjamtï Hollywood sat cheqan peliculanakajj luraskäna ukham Hong Kong markan luraskänti. Ukatwa chhijir puriñjam peliculanak naya pachpa lurañajäna. Sañäni, motompiw auto pata pasañajäna, ukajj wali chʼamänwa. Yaqhep peliculanakajanjja, qʼañu luräwinaka, nuwasiñanakaw uñstäna, yaqhepanjja ñanqha ajayunakaw uñstarakïna.

Peliculanak luriri mä chachampiw 1995 maran casarasta. Kusisit jakasiñatakejj ¡taqe kunaw utjitäna! Sañäni, wali uñtʼatäyätwa, qollqeni ukhamarak mä suma esposoni, ukampis janiw kusisitäkayätti. Ukatwa peliculanak lurañ jaytawayta.

Kunjamsa sábado urunakajj kullakajampi mä munasir familiampi Bibliat yatjjatapjjerïta uk amtañ qalltta, jupanakajj Jehová Diosan Testigopapjjänwa. Jilatajj Joe McGrath satänwa, nanakajj “tío Joe” sasaw sapjjerïta, jupaw kimsa phuchapampiru nanakampiru Bibliat yatichapjjetäna. Warmiparusa, phuchanakaparus wali respetompiw uñjirïna. Tantachäwinakar sarañajj wal gustitäna, awisajj jachʼa tantachäwinakarus jupanakamp chikaw sarapjjerïta. Testigonakampejj wali kusisitaw jikjjatasiyäta.

Ukampis utajan janiw ukham jikjjataskayätti. Papitujajj jan walinakan sarnaqasaw mamitajar wal llakisiyiri, ukatwa wali aynachtʼata jikjjatasïna. Kunapachatï 10 maranïkayäta ukhajja, janiw mamitajajj Jehová Diosan Testigonakapan tantachäwinakapar sarjjänti. Nayajj saraskakiyätwa, ukampis janiw nayrjam taqe chuym sarjjayätti,  ukat 17 maraniruw bautisasta. Ukampis mä qawqha tiempo qhepatjja, janiw cristianjam sarnaqjjayätti, tamatsa jitheqtjjarakiyätwa.

Jaqechaskta uka qhepatjja, Jehová Diosan Testigonakapat pä jilatanakaw utajar visittʼapjjetu. Jupanakajj kunjamsa Jehová Diosampi sum apasjjerista ukwa qhanañchtʼapjjetäna, ukatjja Cindy sat misionera mä kullakaruw nayaru yanaptʼañapatak mayipjjäna. Ukhatakejja, Diosajj janis utjkaspa ukham amuyjjayäta, ukatwa Bibliajj cheqapunit Diosan Arupäpacha uk qhanañchtʼañapataki mayirïta. Cindy kullakajj kunjamsa Biblian profecianakapajj phoqasiwayi uk uñachtʼayitäna. Ukhamatwa jukʼat jukʼata jupampejj suma amigar tukjjapjjayäta. Qhepatjja Biblian qallta yatichäwinakap jupampiw yatjjatjjapjjayäta. Jehová Diosajj kunja munasirisa, kunjam jakasiñajsa muni uk amuyjjayäta.

Wasitat tantachäwinakar sarjjayäta ukhajja, wali aytat jaqenakampïñat sipansa, Testigonakampïñajj wali sumänwa ¡ukajj qhanaw amuyasïna! Ukampis wawäkasin kuna jan walinakatï paskitäna ukanakaw aynachtʼayitäna, ukatwa jan khitirus confiyjjayätti. Tama taypit mayniw kunjamsa uka jan walinakar saykatirista uk Bibliampi yatichtʼitäna. Suma amigonaksa jikjjatawayaraktwa.

Hollywood (California, Estados Unidos) markaruw 1997 maran esposojampi sarjjapjjta. Jaqenakar Diosan Arupampi yanaptʼañatakiw chʼamachasjjayäta. Cheqas jaqenakar yatichañajj kusisit jakasiñatakiw yanaptʼitäna, ukajj peliculanak lurañat sipansa, jukʼamp sumänwa. 2002 maranjja, Cheri sat amigajampiw jikisipjjta, jupajj Hong Kong markatänwa. Jupan jakäwipajj nayan jakäwijampi niya pachpakïnwa. Jupajj Miss Hong Kong satäkis ukhamwa nayat mä mara nayra ajllipjjatayna. Cheqas ajllipkitäna ukhajj jupaw nayar corona uchitäna. Jupajj peliculanak luräna, ukans uñstäna, wali uñtʼat jaqenakampis irnaqarakïnwa. Jupajj nanakjamarakiw Hollywood markan jakäna.

Cheri amigajan uñtʼatapa jiwatap yatisajja, walpun amigajat llakisiyäta, jupajj budismo religionapan janiw chuymachir arunaka jikjjatkänti. Kunjamtï nayajj jikjjataskayäta ukhamarakiw jupajj jikjjatasïna: wali uñtʼatäkchïnsa, janiw kusisit jakaskänti, jaqenakarus janiw confiykarakïnti, ukatwa kuntï Bibliat yateqkayäta uk jupar yatichirïta, ukampis religionapan kunanaktï yateqkäna ukanakaw kunatï cheqäki uk amuyañ jan yanaptʼkänti.

Cheri amigajajj 2003 maran mä urojj jawsanitu, jupajj Vancouver (Canadá) markan película luririw saraskäna. Thaknam sarkasajj kunanakatï uka cheqan utjkäna ukanak uñjasajja, walpun muspharta sasaw sitäna, ukatwa Diosar akham sasin mayisïna: “¿Khitïtasa? ¿Kamsatätasa?” sasa. Uka qhepatjja, Tantachasiñ Uta uñjäna, ukan Jehová sat sutiw qellqkatatäna. Uk amuyasajja, Diosajj mayisitapar istʼatapwa amuyäna, ukatjja jankʼakiw Jehová Diosan  Testigonakapampi yateqañ munäna. Ukampis jilat kullakanakaruw visittʼapjjañapatak jawsta, mä qawqha urunak qhepatjja, Vancouver cheqan chino aru parlir tantachäwiruw saräna.

“Testigonakajj cheqapuniw nayat llakisipjje, jupanakarojj kunjamas jikjjatasta ukajj yatiyañjamakiwa” sasaw Cheri amigajajj situ. Uk yatiñajj nayar wal kusisiyitäna, peliculanak lurkäna ukan janiw amigonakapajj utjkänti. Tantachäwinakar saraskakïnwa. Ukampis 2005 maran wali uñtʼat pä peliculanak apsuñatakiw Hong Kong markar saräna. Ukatjja uka markanwa 2006 maran Jehová Diosar jakäwip katuyasis bautisasjjäna. Jupajj Jehová Diosatak jukʼamp irnaqañ munäna, ukampis trabajopaw jan tiemponi jikjjatasiyäna, ukatwa wali llakita uñjasïna.

Cheri amigajan jakäwipajj 2009 maran mayjtʼawayjjänwa. Peliculanak lurañ jaytasajj Jehová Diosaruw jukʼamp loqtjjäna. Walirak taman amigonaksa jikjjatäna. Jichhajj Diosan arunakap sapürunjamaw yatiyaski, jaqenakar yanaptʼasas wali kusisitaw jikjjatasiraki (Mateo 24:24).

Cheri amigajajj Nepal aru yateqañ amtawayi, ukhamat Hong Kong markan uka aru parlir mä grupor yanaptʼañataki. Hong Kong markanjja, Nepal aru parlirinakarojj jiskʼachapjjewa, kunatejj janiw inglés arsa ni chino arsa sum parlañ yatipkiti, ukhamarak costumbrenakapas mayjarakiwa. Cheri amigajajj ‘Bibliampi uka jaqenakar yanaptʼañajj wali kusiskañawa’ sasaw sirïtu. Sañäni, mä urojj utat uta yatiykasajja, mä warmiruw jikjjatatayna, jupajj Jesusat mä jukʼa yatïnwa, ukampis janiw Jehová Diosat kuns yatkänti. Ukatwa Jesusajj Awkiparuw mayisirïna sasin Bibliampi yatichäna, uk amuytʼasajja, uka warmin chuymaparuw suma yatiyäwinakajj purtʼäna. Qhepatjja, chachapasa phuchapasa Bibliat yateqañ qalltjjapjjarakïnwa (Salmo 83:18; Lucas 22:41, 42).

Diosan arunakap yatiyasajj kunja kusisitas Cheri amigajajj jikjjatasïna, uk yatisaw akham sasin jisktʼasta: “¿Janit nayajj jupjam lurkarakiristjja?” sasa. Ukhatakejja, Hong Kong markanwa jakasjjarakiyäta. Diosan arunakap jukʼamp yatiyañatakiw tiempo apsusta. Jaqenakar istʼañasa, Diosan Arunakap yatichañas nayatakejj wali askipuniwa.

Amuytʼañataki, Vietnam markankir mä warmiruw Bibliat yatichawayta, jupajj wali llakita, jachtʼasisa ukhamaw jikjjatasirïna. Jichhasti jupajj wali kusisitaw jakasjje, tamansa walja amigonakanëjjewa.

Cheri amigajampejj wali aytatäñat sipansa, jukʼampi sumanakwa jikjjatawayapjjta. Peliculanak apsuñajj sumäkchïnsa, jaqenakar Jehová Diosat yatichañaw jukʼampi askejja, ukham lurasajj Juparuw jachʼañchtanjja. Kuntï Jesusajj arskäna uk cheqätapwa amuyapjjta, jupajj akham sänwa: “Katoqerit sipansa jukʼamp kusisiñaniw khititï churki ukajja” sasa (Hechos 20:35).