NAYRÏR JANAN PʼEQEÑCHÄWIPA | ¿DIOSAR MAYISIÑAJJ YANAPTʼISTASPATI?
¿Kunatsa jaqenakajj mayisipjje?
“Nayajj anatañar wal chuym uchirïta. Ukatwa walja qollqe ganañatak yanaptʼita sas mayisirïta, ukampis janiw ukajj phoqaskänti.” (Samuel, * Kenia)
“Yateqañ utanjja, mayisiñ yatichapjjetäna, ukat pʼeqer yatsusaw pachpa arunakampi kutin kutini mayisipjjerïta.” (Teresa, Filipinas)
“Jan walinakan uñjaskta ukhaw mayista, juchanakajat pampachayasiñatakisa, suma cristianöñatakis mayisiraktwa.” (Magdalene, Ghana)
Kunjamtï Samuel chachasa, Teresa ukat Magdalene warminakas sapkejja, jaqenakajj kunayman toqet mayisipjje. Yaqhepanakan mayisitanakapajj wali askiwa, ukampis yaqhepan janiw ukhamäkiti. Waljaniw examen churañatakisa, pelot anatir equipopan atipañapatakisa, familiapar yanaptʼañapatakisa, jan ukajj yaqha toqenakatsa mayisipjje. Taqe ukanakajj jaqenakatak mayisiñajj wali askïtap uñachtʼayistu. Cheqas ‘jan religionanïpki ukanakas mayisipjjarakiwa’ sasaw yatjjatasiwayi.
¿Jumajj mayisirïtati? Ukhamächi ukhajja, ¿kunatsa mayista? Jumajj mayisirïstasa janisa, inas akham jisktʼasta: “¿Mayisiñajj yanaptʼistaspati? ¿Mayisitanakas istʼirejj utjpachati?” sasa. Mä qellqerejja, “mayisiñajj mä qollampi sasikiwa, [...] kunjamtï maynejj uywapar parlkaspa ukhama” sasaw amuyi. Yaqhep qollirinakajja, niya pachparak amuyapjje, mayisiñajj “yanaptʼir qolljamawa” sasaw sapjjaraki. ¿Jumajj kamsasmasa? ¿Jaqenakajj aleq mayisiñatakti mayisipjjpacha? Jan ukajj ¿kuna yanaptʼanak jikjjatañatakikich mayisipjje?
Bibliajja, mayisiñajj yanaptʼir qollanakat sipansa, jukʼamp askiwa sasaw qhanañchi. Ukatjja, munañaparjam mayisipki ukanakar istʼiwa sasaw saraki. ¿Ukajj cheqäpachati? Uka toqet jichhajj yatjjatañäni.
^ tʼaqa 3 Yaqha sutinakampi uchatawa.
