UKA pä qellqatanakat ¿kawkïris jumatak wali askejja? Waljaniw Saulo chachan arsutapar wali askit uñjapjje, juparojj apóstol Pablo sasinwa uñtʼasiraki. Cheqas arunakapajj jaqenakan chuymaparuw purtʼi (Hechos 17:26, 27). Biblianjja, walja chʼamañchtʼkir yaqha qellqatanakaw utjaraki. Sañäni, Jesusajj mä mayisïwipanjja, arkirinakaparojj ‘Diosar uñtʼapjjasmawa ukat bendicionaps katoqapjjarakismawa’ sasaw säna (Juan 17:3).

Maysa toqetjja, walja filosofonakaw Filón sat chachjam amuyapjjaraki. Jupanakajj janiw Diosar uñtʼksnati, Diosajj jan amuytʼkayawa sasaw sapjjäna. Ukhamajja, ¿kawkïris cheqäpacha?

‘Jaqenakajj janiw Diosat taqpachpun amuyapkaspati’ sasaw Bibliajj qhanañchi. Ukanakat mä qawqhajj akanakawa, utjatapa, amuyupa, yatiñapa, ukanakajj janiw kunampis tuptʼaskaspati, amuyaskaspasa ni yatjjataskaspasa, kunatejj taqe ukanakajj jaqenakan yatiñapat jilankiwa. Ukampis janiw ukanakajj Diosar uñtʼañat jarkʼkistuti, antisas ukanakat lupʼiñajja, Jehová Diosar jukʼampi jakʼachasiñatakiw yanaptʼistu (Santiago 4:8). Jichhajj kuntï Diosat jan sum amuyksna ukanakat mä qawqha yatjjatañäni, ukat kawkïrinaksa amuysna ukanaksa yatjjatarakiñäniwa.

WIÑAY UTJATAPA. Bibliajj “wiñayatpacha, wiñayatakiw jumajj Diosätajja” sasaw qhanañchi (Salmo 90:2). Mä arunjja, Diosajj janiw qalltanïkisa ni tukuyanïkarakisa, Jupajj wiñayatakiw utjani. Jaqenakatakejj “Diosajj jachʼawa, janiw amuytʼañjamäkiti, janirakiw qawqha maranïkitejj uksa jaktʼksnati” (Job 36:26).

Kunjamsa uk yatiñajj yanaptʼistu. Diosar uñtʼañatak chʼamachasiñäni ukhajja, Jupajj wiñay jakañ churistani (Juan 17:3). Jupatï jan wiñayatak jakkaspa ukhajja, ¿kunjamarak uka arunak phoqaspasti? Cheqas ‘wiñay jachʼa Reyikiw’ uka arunak phoqaspa (1 Timoteo 1:17).

YATIÑ KANKAÑAPA. Bibliajj Diosat akham yatichi “yatiñ kankañapasti jan tukuskiriwa” sasa. Ukhamasti Diosajj jaqenakat sipansa jukʼamp yatiñaniwa (Isaías 40:28; 55:9). Ukatwa akham sasin apóstol Pablojj jisktʼpachäna: “¿Khitirak Tatitun amtäwinakapsti amuytʼaspasti? ¿Khitirak Diosarusti yaticharakispasti?” sasa (1 Corintios 2:16).

Kunjamsa uk yatiñajj yanaptʼistu. Diosajj taqe jaqenakan mayisitap istʼi, ukhamasti Juparojj khitis kuna horasarus mayisikispawa (Salmo 65:2). Inas maynejj walja lurañanïpachawa, janiw istʼkitaniti sasin ajjsarchispa, ukampis Jupajj mayisitanakas istʼiwa. Diosajj mä jamachʼin jiwatapsa yatiwa, uka toqet Bibliajj akham sistuwa: “Jumanakajj uka jiskʼa jamachʼinakat sipanjja wali jila alanïpjjtawa” sasa (Mateo 10:29, 31).

KUNTÏ LURKI UKANAKA. Bibliajj “Diosan luratanakapa, ukhamaraki kuntï lurkani ukanakata” janiw jaqenakajj amuyksnati sasaw qhanañchi (Eclesiastés 3:11). Diosat janiw kunapachas taqpachpun yatkañäniti. “Kunja sumas Diosan yatiñ kankañapajja” ukajj janiw yatjjatañjamäkiti (Romanos 11:33). Ukhampachasa, Diosajj khitinakatï Jupar taqe chuyma thaqapki ukanakar uk yatiyaspawa (Amós 3:7).

Kunjamsa uk yatiñajj yanaptʼistu. Jumatï Biblia liyïta ukat yatjjatarakïta ukhajja, thakipatsa, Jupatsa jukʼamp yateqäta. Ukampis Jupat yateqañajj janipuniw tukuskaniti. Ukhamajj wiñayaw alajjpachankir Awkisat jukʼamp yateqaskakiñäni.

Kunjamtï yatjjataniwaytanjja, janiw Diosat taqpachpun amuyksnati, ukampis taqe ukanakajj janiw Diosajj janis uñtʼañjamäkaspa ukham sañ munkiti. Biblianjja, walja yatichäwinakaw utji, ukanwa kunjamas Diosajj uk yatichistu. Ukanakat mä qawqha uñjañäni:

DIOSAN SUTIPA. ‘Nayätwa Jehová Tatitojja, ukarakiw sutijajja’ sasaw Bibliajj qhanañchi, ukhamajj Dios pachpaw sutip uchasïna. Uka sutejja, 7.000 kutiw Biblian qellqat uñsti (Isaías 42:8).

Kunjamsa uk yatiñajj yanaptʼistu. Jesusajj mayisïwipanjja, akham sasaw arkirinakapar yatichäna: “Alajjpachankir nanakan Awkejja, sutimajj jachʼañchatäpan” sasa (Mateo 6:9). Ukhamajj mayiskäta ukhajja, Diosar sutipat mayisïta. Jehová Diosajj sutip wali askiti uñjapki ukanakarojj qhespiyaniwa (Romanos 10:13).

DIOSAN UTJÄWIPA. Bibliajj alajjpachampita aka Oraqempit parli. Alajjpachanjja, ajay cuerponi angelanakaw jakapjje, ukampis aka Oraqenjja, jañchi cuerponïpki ukanakaw jakapjjaraki (Juan 8:23; 1 Corintios 15:44). Alajjpacha siski uka arut Bibliajj parlki ukhajja, kawkhantï Diosajj jakaski uka cheqat parlaski. Ukhamasti Jehová Diosajj alajjpachanwa jakasi (1 Reyes 8:43).

Kunjamsa uk yatiñajj yanaptʼistu. Ukanak yatiñajja, Jehová Diosajj kunjam Diosas uk amuyañatakiw yanaptʼistu. Diosajj janis taqe cheqan  jikjjataskchejja, Jupajj cheqapuniw utjaski. Ukampis alajjpachat taqe kun uñjani “janiw kunas Diosan luratanakapatjja jupat imantaskaspati” (Hebreos 4:13).

KUNJAM DIOSASA. Jehová Diosajj kunjam suma Diosasa uk Bibliajj sum yatichistu. Sañäni, “Diosajj munasiñawa”, janiw kʼarisirïkiti, cheqapar uñjiriwa, khuyapayasiri, sinttʼasiri ukat janiw jankʼaki colerasirïkiti (1 Juan 4:8; Tito 1:2; Éxodo 34:6; Hechos 10:34). Ukampis Jupar ajjsarapki ukanakampejj wali sum apasi (Salmo 25:14).

Kunjamsa uk yatiñajj yanaptʼistu. ¡Jumajj Jehová Diosan amigopäsmawa! (Santiago 2:23.) Diosat jukʼamp yateqaskakïta ukhajja, Jupamp wali sum apasïta, ukatjja Biblian yaqhep sarnaqäwinakapsa jukʼamp sum amuyjjarakïta.

Jehová Diosajj kunjamasa uk Bibliajj sum qhanañchistu. Ukhamajj Jupar uñtʼsnawa, Jupajj amigosañwa muni. Arupajj akham sistuwa: “Jumatejj jupar thaqtätajja, jupasti jumarojj jikjjatayasïtamwa” sasa (1 Crónicas 28:9). Jiwasatï Biblia liyiñäni, ukhamarak lupʼirakiñäni ukhajja, Jehová Diosar sum uñtʼañäni. Ukatjja, Jupajj jiwasanakar “jakʼachasirakiniwa” (Santiago 4:8).

Inas jumajj akham sasin amuysta: ‘Janiw nayajj kunsa Diosat yatkti, ukhamajj janiw Jupan amigopäkirïsti’ sasa. Ukampis akham amuytʼañäni: ¿mä doctoran amigopäñatakejj doctoräñamat wakisispa? ¡Janiwa! Inas uka doctoran wali suma amigopajj yaqha irnaqäwinïskchi. Amigopatï doctorar sum uñtʼchi ukat kunanakas jupar kusisiyi, ukat jan kusisiykaraki ukanak yatirakchi ukhajja, jupanakajj wali suma amigöpjjaspawa. Jiwasampejj ukhamarakiw pasi, jiwasatï Diosar kunas kusisiyi ukat kunas jan kusisiykaraki ukanak yatiñäni ukhajja, Jupamp wali sumarak apasiñäni, cheqas ukanak yatiñaw amigopäñatak munasi.

Diosar janiw uñtʼksnati sasin yatichañat sipansa, Bibliajj kunjamsa Diosar uñtʼsna uk wali qhan yatichistu. ¿Jumajj Diosan amigopäñ munasmati? Jehová Diosan Testigonakapaw Bibliat yatichiristam. Ukhamajj mayan visitir jutapkani ukhaw jupanakampi parlasma, jan ukajj Internetan jw.org sat cheqaruw mantasma.