NAYRÏR JANAN PʼEQEÑCHÄWIPA | BIBLIAN YATICHÄWINAKAP TAQENIW AMUYSNA
¿Kunatsa Bibliat amuyañasa?
“Bibliajja, religionanakan wali uñtʼatawa, ukampis yaqha markankirinakan libropawa, janiw China markankirinakatakejj kunäkisa.” (LIN, CHINA)
“Janiw hindú religionajankir qollan libropsa sum amuykti. Kunjamarak Biblia amuyästi.” (AMIT, INDIA)
“Bibliarojj nayra librötap laykojj wali askitwa uñjta, ukat waljapuniw aljasiraki sapjjewa, ukampis janiw nayan utjkituti.” (YUMIKO, JAPÓN)
Bibliajj kuna toqetsa yatichi uk mä jukʼaksa yatipkchi, jan ukajj janis ni kunsa yatipkchejja, waljaniw Bibliar wali respetomp uñjapjje. Khaysa Asia toqenjja, walja millón jaqenakaw Biblia jan uñtʼapkiti, ukampis kawki markanakantï Bibliajj wali uñtʼatäki, uka markanakansa ukhamarakiw Bibliat jan sum amuyapkiti.
Ukampis inas akham jisktʼasta: “¿Kunatsa Biblia amuyañajajj wakisi?” sasa. Kunanaktï Bibliajj qhanañchki ukajj akanakanwa yanaptʼiristam:
-
Kusisita ukat sum jakasiñataki
-
Familian jan waltʼäwinak askichañataki
-
Llakinakar saykatañataki
-
Mayninakampi sum apasiñataki
-
Qollqe sum apnaqañataki
Japón markankir Yoshiko sat warmit yatjjatañäni. Kuna toqetsa Bibliajj parli sasaw jupajj jisktʼasïna, ukatwa Biblia liyiñ amtäna. Ukat ¿kunas pasäna? Jupajj akham siwa: “Bibliajj sum jakasiñatakiw yanaptʼawayitu, jutïritakisa mä suma suytʼäwi churarakitu” sasa. Jupajj saskakiwa: “Jichhajj wali kusisitaw jikjjatasjjta” sasa. Amit sat chachajja, Bibliat jupa pachpa yatjjatañ amtatayna. Jupajj siwa: “Biblianjja, taqenitakiw suma yanaptʼanakajj utji. Ukajj wal muspharayitu” sasa.
Bibliajj millón millón jaqenakaruw jakäwipan yanaptʼawayi. Jumarus yanaptʼarakiristamwa, ukhamajj ¿janit Bibliat yatjjatkasma?
