Ciudad Mante sat cheqanwa nasta, ukajja Tamaulipas (México) markan jikjjatasi. Ukanjja jaqenakajj munasiri ukat wajjtʼasirïpjjewa. Ukampisa jan walinaka lurir jaqenakaw uka cheqan utjarakïna, ukatwa ukan jakañajj chʼamakïna.

Kimsa jilanakanïtwa, jupanakat nayajj taypirïtwa. Tatajampi mamajampejja, Católica Iglesiat bautisapjjetäna ukat iglesiansa qʼochurakiyätwa. Diosaw juchañchitani ukhamarak ninar phichantitani sasaw ajjsarayäta, ukatwa Diosan munañap lurañatak chʼamachasiyäta.

Phesqa maranïkayäta ukhajja, tatajajj utatwa sarjjäna. Ukajj wal llakisiyitäna, jupar wal munasipjjayäta, ukatwa kunatsa jaytapjjetäna uk jan amuykayätti. Ukhat aksarojja, nanakar manqʼa churañatakisa ukat sum uywañatakisa mamajajj walja horanakaw trabajïna.

Niyakejjay mamajajj jan utankchïntejja, janiw escuelar sarirïkti ukat jilïr waynanakampiw chikachasirïta. Jupanakajja jan wali arunak parlaña, fumaña, lunthataña ukat nuwasiñ yatichapjjetäna. Jaqenakar apnaqañajj nayatak walikjamakïnwa, ukatwa boxeo, lucha libre, artes marciales ukat armanak apnaqañ yateqayäta. Wali phiru jan ukajj qhoru waynäyätwa ukat walja kutiw jan walinakan uñjasirïta. Awisajja wilararaw callen jaqosiskirïta, ukat jiwatäjjpachawa sasaw amuyapjjerïna. Hospitalar apasajja mamajajj ¡wali llakitaw uñjaspachäna!

Tunka sojjtani maranïkayäta ukhajja, Jorge amigojaw utar visittʼapjjetäna. Jupajj Jehová Diosan Testigopäjjänwa, ukat jumanakamp parlañ munta sasaw sapjjetäna, Bibliampiw kunarus creyïna uk qhanañchapjjetäna. Janiw nayajj Biblia leyirïkayätti, ukatwa Diosan sutipa ukat amtanakap yateqañajj wali askïna. Jorgejj Bibliat yatichapjjäma sasaw sapjjetäna, nanakasti iyaw sapjjayätwa.

Nina aqaskir mä lugaran jan utjatap yateqañajja, wal chuymachtʼitäna (Salmo 146:4; Eclesiastés 9:5). Ukhat aksarojj janiw Diosajj jan sinttʼasirïkaspas ukham uñj-jjayätti, antisas wali munasir awkirjamaw Jupar uñj-jjayäta, taqenis sum jakassna ukwa Jupajj muni.

 Bibliat yatjjatasajja, jakäwejjan walja mayjtʼäwinak lurañajjaw wakisïna. Janiw qhoruñajajjänti ukhamarak altʼat chuymanïñajjänwa. 1 Corintios 15:33 qellqataw ukatakejj yanaptʼawayitu, ukanjja ‘jan wali jaqenakampi sarnaqañajj suma luräwinak chhaqayi’ sasaw yatichi. Jan walinaka jaytañatakejja, jan wali lurir jaqenakampejj janiw chikachasjjañajjänti. Jan ukasti cristian taman suma amigonak jikjjatañatakiw chʼamachasiyäta. Jupanakajja Bibliarjamaw jan waltʼäwinak askichapjje.

Romanos 12:17-19 qellqatanakaw yanaptʼarakitäna, ukansti akham siwa: “Janiraki ñanqhat ñanqha kuttʼayapjjamti [...]. Kawkikamatejj puedepkta ukakamajj taqenimpis jumanakajj sumankapjjam. Munat jilatanaka, jumanak purajj jan ukhamat ukham lurjasipjjamti [...]. Qellqatanjja siwa: ‘Nayaruw waktʼitu mutuyaskañajja, nayarakiw phoqhaskäjja, siw Tatitojja’” sasa. Jehová Diosaruw jan walinak askichañajj waktʼi, Jupaw horasapar askichani uk amuyañatakiw uka qellqatanakajj yanaptʼawayitu. Ukhamasti jukʼat jukʼatwa jan walinak jaytjjayäta.

Kunas mä arumajj utajar kuttʼankasajj pasitäna uk janiw armkäti. Walja waynanakaw nuwjapjjetäna, jupanakajja callen jan walinak lurir mä grupotäpjjänwa, nayrajj janiw jupanakamp sum apasipkayätti. Jupanakat maynejja, ati patat nuwantasajj akham sitänwa: “¡Arjjatasimaya!” sasa. Uka pachajja, ‘Jehová jan ukhamat ukhama kuttʼayañatak yanaptʼita’ sasaw mayisiyäta. Chuymajan wal jupanakar nuwjañ munayäta, ukampis janiw ukham lurkayätti, jan ukasti tʼijukamaw utar sarjjayäta. Qhepürojja, nuwjkitäna uka waynaw thaki sapak jutaskäna, walpun colertʼasta ukat nuwjañ munayäta. Ukampis Jehová Diosaruw ukat toqet mayampi mayisirakiyäta. Uka waynajja jakʼachasisin akham sitänwa: “Kunatï masür arumajj paski ukat pampachtʼita. Nayajj jumjamaw sum jakasiñ munarakta, Bibliat yatjjatañ munta” sasa. Walikpun ukhamat ukham jan kuttʼaykatätti sasaw kusisiyäta, qhepatsti jupajj Bibliat yateqañ qalltäna.

Familiajajja janiw Bibliat yateqjjänti, ukampis nayajj kuntï lurañ munkayäta uk amtjjayätwa, ukjja janiw kunasa ni khitis mayjtʼaykasapänti. Jehová Diosan markapaw jan walinak armañatakisa ukat kʼuchiki jakasiñatakisa yanaptʼitani sasaw amuyarakiyäta. Jan walinakjja jukʼat jukʼatwa jaytawayjjta ukat 1991 maranwa Jehová Diosan Testigopjam bautisasjjayäta.

Nayrajj mayninakar jan waltʼayiri wali phiru jaqëyätwa, Diosan Arupaw jan ukham jaqëjjañatak yanaptʼawayitu. Jichhajja Biblian sumankaña churir arunakap jaqenakar yatichañatakiw chʼamachasjjta. Jehová Diosarojja, sapürunjamaw aka qhepa 23 maranakajj yupaychaskta.

México markan Jehová Diosan Testigonakapan sucursalapajj utjki ukansa mä qawqha maranak sirviwayaraktwa. Ukanjja Claudia sutini mä kullakaruw uñtʼawayta, jupajj wali qʼapha tawaqönwa, ukhamajj jupampiw 1999 maran jaqechasjjayäta. Jupar jan jitheqtas servir mä suma warmi churatapatjja, Jehová Diosaruw wal yuspärta.

Esposajampejj México markan oqaranakaru ukhamarak amutunakaruw mä taman yanaptʼawayapjjarakta. Jupanakar Jehová Diosar uñtʼapjjañapatak yanaptʼañajj wali sumawa. Qhepatjja Belice markaruw Diosan arunakap yatiyir sarapjjarakiyäta. Uka markanjja kunatï jakañatak munaski ukanakampiw jakasipjjta, ukampis wali kusisitaw jakasipjjta. ¡Ukham jakasiñajja wali sumapuniwa!

Tiempompejja, wasitatwa mamitajajj Bibliat yatjjatjjäna ukat bautisasjjäna. Jilïr jilajasa esposapas ukhamarak wawanakapasa Jehová Diosan Testigoparuw tukjjapjjarakïna. Trabajojjan Diosan arunakapat parlkayäta uka irnaqer masinakajatsa mä qawqhanejj Diosaruw servisipkaraki.

Yaqhep familiaranakajajja, jan wali jaqëpjjatapatjja jiwataw uñjasipjjäna. Janitï nayra jakäwejj jaytkiriskayäta ukhajj jiwataw uñjasirakiriskayäta. Jehová Diosarojj walpun yuspärta, Jupaw juparu, markaparu uñtʼañatak yanaptʼawayitu, servirinakapasti pacienciampi ukat munasiñampiw Diosan aruparjam sarnaqañ yatichawayapjjarakitu.