“Kunatï sumäki, perfectökaraki uka regalojja, alajjpachatwa juti, mä arunjja alajjpachankki uka qhananakan Awkipatwa juti” (Santiago 1:17). Uka textojja alajjpachankir Jehová Dios Awkisajj wajjtʼasirïtap qhanañchistu. Diosajj walja regalonakwa churistu, ukampis mä regalopaw jukʼamp sumajja. ¿Kunasa? Uka toqetjja, Jesusajj akham sasaw Juan 3:16 qellqatan säna: “Diosajj akapachar wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa.

Diosajj mä sapa Yoqapa jaqenak layku churatapajja, mä suma regalowa, janipuniw ukham regalo khitis churkistaspänti. Uka laykukiw juchatsa chuymankipstañatsa jiwañatsa salvassna (Salmo 51:5; Juan 8:34). Jaqenakajja janipuniw jiwas pachpa uka jan walinakat salvasksnati. Ukampis Diosajj wal munasistu, ukatwa juchampita jiwañampita salvañatakejj kunatï wakiski uk luräna. Jehová Diosajja Jesucristo mä sapa Yoqaparuw khitanïna, ukhamatwa istʼasir jaqenakarojj wiñay jakasipjjañapatakejj yanaptʼawayi. ¿Kunjamsa Jesusan jiwatapajj juchampit jiwañampit kutsuyistu? ¿Kunatsa ukajj wakisïna? ¿Kunsa uka regalot yuspärañatakejj lurañasa?

Jesusan jiwatapajja, jaqenakar juchampit jiwañampit kutsuyañatakiw yanaptʼawayi. Amuytʼañataki, mä jaqejj kunsa chhaqayasi jan ukajj maynir carcelat apsuñatak qhawqhas pagañajj wakisi ukamp sasiwa. Diosajja Adanampir Evampirojj wawanakapampi mä paraison wiñayatak jakasipjjañapatakiw luräna, jupanakajj janiw juchanïpkänti, sasaw Bibliajj qhanañchi (Génesis 1:26-28). Ukampis jupanakajj Diosar jan istʼañwa ajllipjjäna, ukhamatwa juchararäjjapjjäna. ¿Kuna jan walinakansa uñjasipjjäna? Bibliajj siwa: “Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” sasa (Romanos 5:12). Adanajj wiñay jakasiña wawanakapar jaytañat sipansa, juchampi jiwañampiruw aptʼawayi.

Jaqenakar juchampit jiwañampit kutsuyañatakejj ukhat ukha pagañaw wakisïna. Adanajj yatkasinwa Diosar jan istʼkänti, ukatwa perfecto jakañap aptʼasïna. Kunjamtï Bibliajj siskejja, wawanakaparojj juchampiru jiwañampiruw aljantawayäna. Ukatwa juchampit jiwañampit kutsuyañatakejj mä perfecto jaqe munasirakïna, Jesusaw uka perfecto jaqënjja (Romanos 5:19; Efesios 1:7). Diosajj munasiñatwa juchampit jiwañampit kutsuyawayistu, ukhamat jaqenakajj wiñay jakaña katoqapjjañapataki, ukwa Adanamp Evampejj aptʼawayapjjäna (Apocalipsis 21:3-5).

Niyakejjay Jesusan jiwatapajj jaqenakar jiwañampit juchampit kutsuychejja, ukajj Diosan mä suma regalopawa, janiw yaqha ukham “suma regalojj” utjkaspati. Uk sum amuytʼañatakejja, kuntï nayrïr yatichäwin parltʼaniwayktan ukanakat amuytʼañäni. Ukaw cheqapunit mä suma regalöpacha janicha uk yatiñatak yanaptʼistani.

Kuntï munkayätan ukwa Diosajj churistu. Jaqenakajja taqeniw wiñayatak jakasiñ muntanjja (Eclesiastés 3:11). Jiwasanak pachpajj janiw wiñay jakañ jikjjatksnati, ukampis Jesusajj jaqenak layku jiwatapatwa katoqsna. Bibliajj siwa: “Kuntï juchajj pagot churki ukajj jiwañawa, kuntï Diosajj Cristo Jesús Tatitus taypi ukhamak churki ukajja wiñay jakañawa” sasa (Romanos 6:23).

Kunatï yanaptʼkistaspa ukwa Diosajj churistu. Janiw khitis juchampit jiwañampit jupa pachpa salvaskaspati. Jaqen jakañapajj wali  jila alaniwa, janiw khitis alaskaspati sasaw Bibliajj qhanañchi (Salmo 49:8). Juchampit jiwañampit salvasiñatakejj Diosan yanaptʼap munayätanjja. Ukampis ‘Cristo Jesusaw juchat kutsuyañatak pagasajj salvawayistu’, ukhamatwa Diosajj kunatï munaskäna uk churawayistu (Romanos 3:23, 24).

¿Kunapachas uka regalo churistu? Bibliajj siwa: “Juchararäkayätan ukhaw Cristojj jiwas layku jiwawayi” sasa (Romanos 5:8). Diosajj “juchararäkayätan ukhaw” juchampit jiwañampit kutsuyawayistu, pantjasirïkstansa ukaw qhawqsa Diosajj munasistu uk uñachtʼayistu. Juchanïtas laykojj jan walinakansa uñjaskstanjja, Jesusan jiwatapajj jutïrin kunanaktï katoqkañäni uk amtañatakiw yanaptʼistu.

¿Kunatsa uka regalo churistu? ¿Kunatsa Diosajj munat Wawapar jaqenak layku jiwañapatak khitanïna? Bibliajj siwa: “Diosajj mä sapa Yoqaparuw akapachar khitanïna, ukhamat jupïpan wiñay jakañ katoqañasaki, ukhamatwa Diosan munasiñap uñjtanjja. [...] Janiw jiwasan juparu munasitas laykojj uk lurkänti, jan ukasti jiwasar munasitap laykuw uk luräna” sasa (1 Juan 4:9, 10).

Diosan uka suma regalop katoqasajja, ¿kunsa yuspärañatakejj lursna? Jesusajja Juan 3:16 qellqatan akham sasaw säna, “taqe khitinakatï jupar confiyapjjatap uñachtʼayapki ukanakajj” salvasipjjaniwa. Bibliarjamajja, “Diosar confiyañajja, kuntï suytʼasktan ukajj phoqasipuniniwa sasin jan pächasis suyaña sañ muni” (Hebreos 11:1). Diosar confiyañatakejja, Biblian cheqa yatichäwinakapwa yatjjatañasa. Ukatwa Diosar uñtʼañatak chʼamañchtʼapjjsma. Jupaw mä “suma regalo” churawayistu. Ukatjja kunsa Jesusan jiwatapajj taqenitak jikjjatawayi, kunsa wiñay jakañ katoqañatakejj lurañama uk yatjjatañamatakiw chʼamañchtʼapjjsma.

Uka toqenakat jukʼamp yatjjatañatakejja, Internetan jw.org cheqaruw mantasma. Jehová Diosan Testigonakapaw yanaptʼapjjeristam. Diosan uka suma regalopat jukʼamp yatjjatasasa, kunjamsa jumar yanaptʼam uk yatjjatasas akham sasaw Diosar säta: “¡Jesucristo Tatitus taypiw nayajj Diosar yuspärta!” sasa (Romanos 7:25).