AKA arunakaw Informador * qellqatan utjäna: “Gran Bretaña markankiri jilat kullakanaka, ¡sartasipjjam!” sasa (diciembre 1937, Londres). Mä pʼeqeñchäwin sänwa: “Aka markan janiw aka tunka maranakan jiltawaykiti” sasa. ¡Ukajj cheqänwa! Kunjamsa 1928 marat 1937 marakamajj yatiyasïna ukaw uka qellqatan nayrïr janapan qhanañchasïna.

¿Kunatsa Gran Bretaña markan yatiyañatak jan chʼamachasipkäna? Kunatï nayra maranakan lurasirïkäna ukarjam lurasaw tamanakajj jan jiltapkänti. Uka markan yatiyasiñapatakejja, 200 precursoranakakiw munasi sasaw sucursalajj satayna, jupanakajj janiw tamamp chika yatiyapjjañapäkänti. Precursoräñ munirinakarojja, Gran Bretañan janiw yatiyirinakajj munasjjeti sasaw sucursalajj säna. Ukatsti Europa toqer sarapjjañapatakiw chʼamañchtʼäna. Ukhamätapat walja precursoranakaw yaqha markanakar sarjjapjjäna, Francia markarus ukhamaraki. Yaqha aru mä jukʼak yatisa, jan ukajj jan yatisaw sarapjjäna.

Informador qellqatajj 1937 maran mistkäna ukan akham sänwa: “1938 maranjja, mä millón horanak lurañäni” sasa. Ukatakejja, sapa yatiyirejj 15 horanak yatiyañapäna, precursoranakasti 110 horanakaraki. Urun phesqa horanakaw yatiyapjjañapäna, ukatsti jaypʼunakajj Bibliat yateqañ munirinakaruw kuttʼapjjañapäna.

Walja jilat kullakaw ukarjam lurañ amtapjjäna. Hilda Padgett kullakajj sänwa: “Brooklyn markankir sucursalaw uk lurañatakejj chʼamañchtʼapjjetäna. Ukarjam lurañwa suyasipkayäta, ukham amtapjjatapajj janiw inamayäkänti” sasa. * E. F. Wallis kullakajj sänwa: “Sapüru phesqa hora yatiyañatak chʼamañchtʼapkitäna ukajj wali askïnwa. ¡Tatitur uru jurnala serviñat sipansa janiw yaqhajj kusisiykistaspati! [...] Qaritas utar kuttʼapjjerïstjja, kusisitäpjjayätwa” sasa. Stephen Miller jilatajja, yatiyir sarañajj wali wakiskirïtapwa amuyäna. ¡Waynäkasin wal yatiyañ munäna! Jilatajj siwa: “Waljaniw uru jurnala bicicletat yatiyapjjäna, phajsa tiemponsa grabat arstʼäwinakwa uchapjjerïna” sasa. Taqe chuymaw letreronakas aptʼata callenakan yatiyañataki, revistanak lakirañatak mistupjjerïna.

Informador qellqatajj akham sänwa: “¡Waranqa precursoranakaw munasi!” sasa. Machaqat amtapkäna ukarjamajja, precursoranakajj tamamp chika yatiyasaw jilat kullakanakar chʼamañchtʼapjjañapäna. Joyce Ellis kullakajj siwa: “Waljaniw precursoräñ munapjjäna [...]. 13 maranïkchiyätsa precursoräñwa munayäta” sasa. Jupajj julio, 1940 maranwa 15 maranïsin  precursorat serviñ qalltäna. Precursorat serviñatak chʼamañchtʼaskäna ukhajja, Peter jilatajj precursorjam serviñwa munarakïna. Junio 1940 maranwa 17 maranïsajj precursorat serviñ qalltäna. Jupajja, Scarborough markar puriñkamaw 105 kilometronak bicicletat saräna. Qhepatjja Joyce kullakampiw casarasjjäna.

Cyril ukhamarak Kitty Johnson chacha warmejj mayni precursoranakjamarakiw Diosar serviñ munapjjäna. Jupanakajja, precursorjam serviñatakejj utapsa cosasanakapsa aljañwa amtapjjäna. Cyril jilatajj trabajopatwa mistjjäna, mä phajjsitsti precursorjam serviñwa qalltäna. Jupajj siwa: “Kuntï lurapkayäta ukat janiw pächasipkayätti. Taqe chuymaw kusisit lurapjjayäta” sasa.

Precursoranakajj waliw jiljjattäna. Ukatwa Diosan markap sarayiri jilatanakajj yanaptʼañ munapjjäna. Tamanak tumptʼirjamaw (nayrajj siervo de zona) Jim Carr jilatajj 1938 maran servïna, jupaw precursoranakatak utanak markanakan jikjjatäna. Juntuk jakasipjjañapataki, juntuk yatiyapjjañapatakiw jupanakar mayisïna, ukhamatwa qollqe toqet yanaptʼasipjjaspäna. Sheffield markan mä jachʼa utwa alquilapjjäna, mä jilataw ukan pʼeqtʼäna. Ukankir tamas qollqempiw yanaptʼapjjäna, mueblenaksa churapjjäna. Jim jilatajj siwa: “Taqeniw yanaptʼapjjäna” sasa. Tunkaniw ukan jakapjjäna, sapa alwaw ukürutak apstʼat texto taqen liytʼapjjerïna. Ukatsti yatiyiriw sarapjjarakirïna.

Jilat kullakanakasa, precursoranakasa, taqenipuniw yatiyañatak chʼamachasipjjäna. 1938 maranjja, mä millón horanakwa yatiyapjjäna. Bibliat yateqerinakasa, walja horanak yatiyañasa, yaqha ukhamanakas waliw jiljjattäna. Nayra maranakan yatiyirinakajj utjkäna ukat sipansa, niya kimsa ukhampiw phesqa maran Gran Bretaña markan jiljjattäna. Ukham lurañajja, jutïrin guerranakajj utjañapäkäna ukan aguantañatakiw Diosan markapar chʼamañchtʼäna.

Armagedón uru jakʼachasisinkipanjja, Gran Bretaña markan jukʼamp precursoranakajj jiljjattaskakiwa. Aka qhepa tunka maranakanjja, jukʼampiw jiltawayi. Sañäni, octubre 2015 marakamajj 13.224 precursoranakaw utj-jje. Uka precursoranakajja, Diosan arunakap yatiyañat sipansa yaqha ukham jan utjatap yatisajja taqe chuymaw yatiyasipki.