1, 2. 1) Mä amtar puriñatakejj taqeniw librëtanjja, ¿uka toqet kamsapjjes yaqhepanakajja? 2) ¿Bibliajj uka toqet kamsisa, ukat kuna jisktʼanakarus aka yatichäwin qhanañchaskañäni?

JUPA pachpa mä amtar puriñat sipansa, mä warmejj amigopar akham sänwa: “Jan sinti lupʼiyistati; kunsa lurä ukjja jumak sita; ukaw nayatakejj facilajja” sasa. Kunjamtï uñjktanjja, uka warmejj janiw jupa pachpajj mä amtar puriñ munkänti, jan ukasti kunsa lurani uk maynin amtañapwa munäna. Jehová Diosajj jiwas pachpa kuns amtirwa lurawayistu, ukajj mä suma churäwipawa. ¿Jumat kamsasirakispasa? ¿Juma pachpat kuns amtasma? Jan ukajj ¿mayninakan juma lanti amtapjjañapcha munasma? Jehová Diosajj jiwas pachpa amtir lurawaykistu ukjja, ¿kunjamsa uñjta?

² Mä amtar puriñatakejj taqeniw librëtanjja, ukampis waljaniw uka toqet may may amuyapjje. Yaqhepajj akham sapjjewa: ‘Mä amtar puriñatakejj janiw librëktanti, Diosaw kunsa lurañäni uk amtjje’ sasa. Yaqhepajj akham sapjjarakiwa: ‘Cheqpachapun librësna ukhakiw taqe kunsa jiwas pachpajj amtsna’ sasa. Ukampis Bibliarjamajja, kuns lurañäni ukjja sapa  mayniw amtsna, Jehová Diosaw ukham lurawayistu (Josué 24:15 liytʼañataki). Aka jisktʼanakaruw Bibliajj sum qhanañcharaki: ¿Taqe kunsa jiwas pachpat amtsna? Niyakejjay Diosajj jiwas pachpa kun amtir lurawaychistojja, ¿kunjamsa uk uñjañasa? Suma amtanakar purisajja, ¿kunjamsa Jehová Diosar munasitas uñachtʼaysna? ¿Kunjamsa mayninakan amtanakap respetatas uñachtʼaysna?

3. ¿Kunatsa Jehová Diosajj wali yateqaskayajja?

³ Jehová Diosajja, kunsa lurani uk sumwa amti, ¿kunjamsa Jupat yateqassna? Amuytʼañataki, Jehová Diosajja Israel markaruw “jupatak yaqhachat” markapäñapatak ajllisïna (Deu. 7:6-8). ¿Kunatsa ukham amtpachäna? Kuntï Abraham amigopar arskäna uk phoqañwa munäna, ukatwa ukham amtäna (Gén. 22:15-18). Jehová Diosajj wali munasiriwa, cheqaparjamaw kuns amtaraki. Kunapachatï israelitanakajj Jupar kutkatasipjjäna ukhajja, munasiñampiw cheqañchäna. Ukatjja arrepentisipjjäna ukhajja, jupanakat khuyaptʼayasïnwa, munasiñampiw uñjarakïna. Jupajj akham sänwa: “Naya contra saytʼasitanakapatjja qolljjatjjäwa; jupanakarusti munasirakïwa jan wakiskchi jupanakar munañajj ukasa” sasa (Ose. 14:4). Jehová Diosajj wali yateqaskayawa, Jupajj mayninakar yanaptʼañwa amtäna.

4, 5. 1) ¿Khitirus Diosajj jupa pachpa mä amtar purir nayraqat lurtʼäna, ukat kunjamsa sarnaqäna? 2) ¿Kunsa jisktʼasiñasa?

⁴ Jehová Diosajja, angelanakarusa, jaqenakarusa, jiwas pachpa mä amtar purirwa lurawayistu. Diosan nayrïr luratapajj Jesusawa, jupajj Awkipar uñtasit lurtʼatawa. Ukhamarus jupa pachpaw mä amtar purispa (Col. 1:15). Janïr aka Oraqer jutkasajja, Supay toqet saytʼasiñat sipansa Awkip toqetwa Jesusajj saytʼasïna. Aka Oraqenkjjäna ukhasti, Supayajj kunaymanitwa pantjasiyañ munäna, ukampis Jesusajj janiw ukamp apayaskänti (Mat. 4:10). Jiwañap uru jakʼajja, akham sasaw Awkipar säna: “Awkejja, munsta ukajja, aka tʼaqhesiñatjja qhespiyita; ukampis jan munañajja luratäpati, jan ukasti juman munañamak luraspan” sasa (Luc. 22:42). ¿Jiwasajj Jesusjamarakit Jehová Diosar jachʼañchañatakejj munañap lurañ muntanjja?

⁵ Jïsa, ukham lursnawa, jiwasajj Jesusan Awkipar uñtasit lurtʼatarakïtanwa (Gén. 1:26). Ukampis janiw Jehová Diosjam taqe kunsa munañasarjam lurksnati. Jiwas pachpa amtir luratäkstansa, janiw taqe kunsa amtasarjam lurksnati sasaw Bibliajj qhanañchi. Sañäni, familia taypinjja, warminakajj chachanakaparuw istʼapjjañapa, wawanakasti awk taykaparuw istʼapjjañaparaki, ukarjam sarnaqañaswa Jehová Diosajj muni (Efe. 5:22; 6:1). Uk yatisajj akham jisktʼasiñasawa: ‘¿Janit munañasarjam kuns lurksna?’ sasa. Uka jisktʼar kunjamjjay jayschiñäni ukarjamaw wiñay jakañ katoqañäni jan ukajj aptʼasiñäni.

6. Janiw taqe kunsa munañasarjampun lurksnati, ¿kunatsa ukham sistanjja? Uk mä uñachtʼäwimpi qhanañchtʼam.

⁶ Kunjamtï yatjjataniwayktanjja, janiw taqe kunsa munañasarjampun lurksnati. ¿Ukajj walikïpachati? Jïsa, ¿kunatsa ukham sistanjja? Awisajj mä kunat jarkʼatäñajj yanaptʼistuwa. Uk sum amuytʼañatakejja, jaya  cheqarus autosampi sarksna ukham amuytʼañäni. Thakinjja, janiw kuna señalisacionanakas utjkiti, sapa mayniw ratukit sarani jan ukajj kʼachatakcha sarani uk amti. Ukatjja kawkïr thaknamsa sarapjjani uksa munañaparjamaw amtapjjaraki. Uk yatisajja, ¿uka thaknam sarañ munsnati? Janiw munksnati. Ukhamajj kusisit sarnaqañatakejja, janiw munañasarjam sarnaqañajj wakiskiti. Jichhajj Diosan servirinakapat mä qawqhanit yatjjatañäni, ukaw munañasarjam sarnaqañajj walikïskiti janicha uk amuytʼañatak yanaptʼistani.

7. 1) Adán chachasa animalanakasa, ¿kunjam lurtʼatäpjjänsa? 2) Adanajj jupa pachpa kuns amtir lurtʼatätapatjja, ¿kunsa luräna?

⁷ Jehová Diosajja, Adán chacharojj angelanakarjamarakiw jupa pachpa kuns amtiri lurtʼawayi. Ukampis janiw animalanakar ukham lurkänti. Qalltanjja, Adanajj animalanakaruw sutinak uchäna, Diosaw jupan ukaru apäna suti uchañapataki. Sapa mayni animalajj kunjamänsa ukarjamaw suti uchäna. Ukatsti Jehová Diosajj ‘uka sutimpipuniw qheparayjjäna’ (Gén. 2:19-20).

8. Jan sum amtatapatjja, ¿kuna jan walirus Adanajj purtʼasiwayi?

⁸ Jehová Diosajja, Adán chacharuw aka Oraqe mä suma paraisor tukuyañapataki jaytäna. Diosajj akham sänwa: “Wali mirantapjjam, aka oraqerusti phoqhantapjjarakim, apnaqapjjarakim; taqe chawllanakarusa, jamachʼinakarusa apnaqapjjam, ukhamaraki oraqenjam qatatnaqtir animalanakarusa” sasa (Gén. 1:28). Ukampis Adanajj jan istʼasisaw aski ukhamarak ñanqha yatiñ churir qoqat manqʼantäna. Diosar jan istʼañ ajllitapatjja, walja maranakaw jaqenakajj kunayman jan walinakan tʼaqhestanjja (Rom. 5:12). Adanajj jan sum amtasin kuna jan walirus purtʼasiwayi uk amtapjjapuniñäni. Ukaw Diosar istʼañajj kunja askisa uk amtañatak yanaptʼistani.

9. ¿Kunsa israelitanakajj amtapjjäna, ukat kamsapjjänsa?

⁹ Adán chachana ukhamarak Eva warmin wawanakapjamajja, taqeniw pantjasirïtanjja, ukatwa jiwaraktanjja. Ukampis kunsa lursna uk jiwas pachpaw amtsna. Khä nayra tiempot amtañäni, israelitanakaw Diosan markapäpjjaniti janicha uk amtapjjañapäna (Éxo. 19:3-6). Jupanakajj Diosan markapäñwa amtapjjäna. Kuntï Diosajj siskäna uksa istʼapjjarakïnwa, ukatwa akham sapjjäna: “Lurañäniwa kunanaktejj Tatitojj siski ukanaka” sasa (Éxo. 19:8). Ukampis qhepatjja, kuntï sapkäna uk janiw phoqjjapjjänti. ¿Kunsa uka sarnaqäwit yateqsna? Kuntï lurkañäni uk Diosatakjam amtapjjañäni, janipun Jehová Diosat jitheqtapjjañäniti, leyinakapsa istʼapjjapuniñäni (1 Cor. 10:11).

10. Hebreos 11 jaljarjamajj taqe jaqenakaw Diosar jachʼañchañ amtapjjaspa sasajja, ¿kunatsa sistanjja? (12 janankir dibujo uñjjattʼam).

¹⁰ Hebreos 11 jaljanjja, Diosar istʼir 16 chachanakata ukhamarak warminakatwa parli. Ukham istʼasirïpjjatapat walja bendicionanakwa katoqapjjäna, jutïritakis mä suma suytʼäwinïpjjarakiwa. Amuytʼañataki, Noé chachajj Jehová Diosar wal confiyäna, ukatsti Jehová Diosar istʼasaw mä arca luräna. Ukhamatwa familiapar qhespiyäna, jiwasas ukhamatarakwa utjtanjja (Heb. 11:7). Abrahamampi Sarampejj taqe chuyma istʼasaw kawkharutï Jehová Diosajj khitkäna ukar sarapjjäna. Ur markar kuttʼañat sipansa, kuntï Diosajj jutïrit arskäna ukwa lupʼipjjäna. “Jupanakajj mä suma oraq” suyapjjäna  sasaw Bibliajj qhanañchi (Heb. 11:8, 13, 15, 16). Moisés chachajja, Egipto markan sum jakasiñat sipansa, “Diosan markapan uñisitäñwa munäna, mä jukʼa tiempo juchanakan kusisiñat sipansa” (Heb. 11:24-26). Diosar taqe chuyma servir uka chacha warminakat yateqasipjjañäni. Kunatï Jehová Diosar jachʼañchki uk lurañ amtapjjañäni.

11. 1) Jiwas pachpa mä amtar puriñataki lurtʼatätasatjja, ¿kunsa amtsna? 2) ¿Kunas suma amtar puriñatak yanaptʼiristamjja?

¹¹ Mayninakajj jiwas lanti kuns amtapjjaspa ukwa munsna, ukampis ukhamäspa ukhajj janiw jiwas pachpa amtir Diosajj lurtʼawaykistu ukat bendición katoqksnati. ¿Kuna toqetsa parlasktanjja? Ukjja Deuteronomio 30:19, 20 (liytʼañataki) qellqataw qhanañchi. 19 tʼaqanjja Jehová Diosajj mä amtar puripjjañapatakiw israelitanakar jaytäna sasaw qhanañchi. 20 tʼaqanjja, israelitanakajj qawqsa Jupar munasipjjäna uk uñachtʼayapjjaspa ukwa Jehová Diosajj munäna sasaw qhanañcharaki. Jiwasajj ukhamarakiw Jehová Diosar serviña, jachʼañchaña, munasiña amtsna.

12. Jiwas pachpa amtir lurtʼatätasatjja, ¿kunsa jan lurañasäki?

¹² Mä amigomarus mä suma regalo churkasma ukham amuytʼañäni. Uka regalo basurar jaqtaspa jan ukajj maynir jan waltʼayañatak apnaqaspa ukhajja, ¿kunjamsa jikjjatasisma? Chuym wal usuyasisma. Jehová Diosampejj ukhamarakiwa, Jupajj jiwas pachpa amtirwa lurtʼawayistu. Suma amtanakar jan purktan jan ukajj mayninakar jan waltʼayktan ukhajja, Diosajj chuym wal usuyasi. “Qhepa urunakanjja” jaqenakajj jan yuspärasirïpjjaniwa sasaw Bibliajj qhanañchi (2 Tim. 3:1, 2). Ukhamajja jiwas pachpa amtañatak lurtʼawaykistu ukatjja, ¿kunjamsa Jehová Diosar yuspärsna? ¿Kunas suma amtar puriñatakejj yanaptʼistaspa?

13. Jiwas pachpa amtir luratätasatjja, ¿kuna toqetsa sum amuytʼasiñasa?

¹³ Khitis amigosäni, kunjamsa isisiñäni, kunampis kusistʼañäni uk sapa mayniw amtsna. Ukampis jiwas pachpa amtir luratätasatjja, kunatï Jehová Diosatak jan walïki ukanakwa lurañ munsna, jan ukajj akapachan  munañaparjamaw sarnaqjjsna (1 Pedro 2:16 liytʼañataki). Kunanakatï jan walïki uk lurañat sipansa, kunatï ‘Diosar jachʼañchkaspa’ ukwa lurañasa (1 Cor. 10:31; Gál. 5:13).

14. ¿Kunatsa Jehová Diosar confiyañasa?

¹⁴ Jehová Diosajj akham sistuwa: “Nayätwa Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” sasa (Isa. 48:17). Suma amtanakar puriñatakejja, Jehová Diosaruw confiyañasa ukatjja kun lurañastï munki ukwa lurañasaraki. Altʼat chuymampiw akham sistanjja: “Jaqejj janiw alaskiti pachpa jakañapjja, janirakiw tukuyäwipsa munañapar apnaqkaspati” sasa (Jer. 10:23). Adán chachasa, israelitanakasa Jehová Diosar istʼañat sipansa, jupanak pachparuw confiyasipjjäna. ¿Kunsa ukajj yatichistu? Jiwas pachpar confiyasiñat sipansa, ‘Jehová Diosaruw taqe chuymasampi confiyañasa’ (Pro. 3:5).

15. ¿Kunsa Gálatas 6:5 qellqatat yateqsna?

¹⁵ Mayninakajj kuntï lurañ amtapki ukarojj respetañasawa. ¿Kunatsa? Sapa maynejj mayj mayj amtirïtanwa, ukhamajj janiw mä pachpa amtaruk purksnati. Kunjamsa maynejj sarnaqani, kunjamsa Jehová Diosar servini ukjja sapa mayniw amtjje. Kuntï Gálatas 6:5 (liytʼañataki) qellqatan qhanañchki uk amuytʼañäni, ukanjja sapa mayniwa luräwinakapat llakisiñapa sasaw qhanañchi, ukhamajj mayninakan amtanakap respetañasawa.

16, 17. 1) ¿Kuna jan waltʼäwis Corinto markankir taman utjäna? 2) ¿Kunjamsa Pablojj uka cristianonakar yanaptʼäna, ukat kunsa yateqsna?

¹⁶ Kunatsa mayninakan amtanakap respetañasa uk sum amuytʼañatakejja, Corinto markankir jilat kullakanakat parltʼañäni. Corintonkir cristianonakajja, idolonakar loqtat aycha qhatun aljapkäna uk manqʼañajj walikïskiti janicha uka toqetwa chʼajjwapjjäna. Yaqhep cristianonakatakejja, idolonakar loqtat aycha manqʼañajj walikïskänwa, idolonakajj janiw kunäkisa sasaw amuyapjjäna. Ukampis diosaparjam idolonakar nayrajj uñjapkäna uka cristianonakatakejja, uka aycha manqʼañajj janiw walïkänti, idolonakar serviñampi sasïnwa (1 Cor. 8:4, 7). Ukham chʼajjwañajja, tamaruw jan waltʼayaspäna, ¿kunjamsa apóstol Pablojj uka jan waltʼäwi askichpachäna?

¹⁷ Nayraqatjja, apóstol Pablojj “kuntï manqʼktan ukajj janiw Diosatjja jayarstʼaykistuti” sasaw cristianonakar säna (1 Cor. 8:8). Ukatsti akham ewjjtʼarakïna: “Ukatrak uka libre luratanakamampejj khitinakatejj Tatitur iyawsañanjja pisi chʼamäsipki ukanakarojj juchar puriyasipkasma” sasa (1 Cor. 8:9). Ukatjja, iyawsäwin pisi chʼamanïpki ukanakarojja, idolonakar loqtat aycha manqʼañ toqet jan mayninakar juzgapjjamti sasaw sarakïna (1 Cor. 10:25, 29, 30). Kunjamtï uñjtanjja, cristianonakat sapa mayniw kun lurañsa amtjjañapäna. Jiwasajj ukhamarakiw kuntï jilat kullakanakajj amtapki uk respetañasa (1 Cor. 10:32, 33).

18. Jiwas pachpa kuns amtir luratätasatjja, ¿kunsa lursna?

¹⁸ Jehová Diosajja, jiwas pachpa kuns amtirwa lurtʼawayistu, ukhamajja kunsa lurañäni uk sapa mayniw amtjjsna (2 Cor. 3:17). Ukham luratätasatwa Jehová Diosar jachʼañchkir amtanakar pursna, ukhamatwa qawqsa Jupar munastan uk uñachtʼaysna. Ukhamajj Jehová Diosar jachʼañchkir amtanakar puripjjañäni, kuntï mayninakajj amtapkani uksa respetapjjarakiñäni.