¿Yatiyätati?
Jonás profetajj jiwjjäna uka qhepatjja ¿kunas Nínive markampejj pasäna?
ASIRIA markajj 670 antes de Cristo maranakanjja, oraqpachan wali chʼamani markaruw tuküna. Internetan Museo Británico sat cheqajj utjki ukarjamajja, “Asiria markan oraqepajj inti jalantankir Chipre markat inti jalsunkir Irán markakamänwa. Yamas mä qhawqha maranakajja, oraqepajj Egipto markakamaw purïna”. Nínive capitalapajja, oraqpachan utjki uka markanakat sipan wali jachʼänwa. Uka markajj jachʼa estatuanakanïnwa, wali suma jardinanakanïnwa, jachʼa palacionakanïnwa, jachʼa bibliotecanakaw utjarakïna. Nayra Nínive markanjja, perqanakan qellqatanakaw jikjjatasiwayi. Ukanjja Asurbanipal sat reyejj “oraqpachankir reyïtwa” sasaw jupa pachpat säna. Asirio yaqha reyinakajja, uka pachparakwa jupanak pachpat sapjjäna. Uka tiemponjja Asiria, Nínive markanakajj jan atipjkay markanakäpkaspas ukhamänwa.
Uka tiemponjja Asiria markajj oraqpachankir markanakat wali chʼamani markänwa.
Ukampis Asiria markajj wali chʼamanïkäna ukhajja, Sofonías profetajj kunsa Jehová Diosajj uka markamp lurani uka toqet akham sänwa: “Asiria markaruw tʼunjarakini. Nínive markaruw tʼunjani, wasarar uñtat qʼala wañsutwa jaytarakini” sasa. Nahúm sat profetajj akham sarakïnwa: “¡Qollqe saqueysupjjam! ¡Qori saqueysupjjam! [...] ¡Markajj chʼusakiwa, qʼala apanukutawa, tukjatarakiwa! [...] Khititï jumar uñjkätam ukajja, jumat escapaniwa, akham sarakiniwa: ‘¡Nínive markajj tukjatawa!’” sasa (Sof. 2:13; Nah. 2:9, 10; 3:7). Uka profecianak istʼasajj inas jaqenakajj akham jisktʼasipjjchïna: “¿Cheqapunit ukajj paspachäni? ¿Khitirak Asiria wali chʼamani marka katuntaspasti?” sasa. Uk pasañapajj janiw creyiñjamäkänti.
Nínive markajj wasara, chʼusa lugarar tukuyatänwa.
Ukampis ukaw pasäna, niya 600 antes de Cristo maranjja, babilonionakampi medonakampejj Asiria marka katuntjjapjjänwa, tiempompejja Nínive markajj qʼala apanukutäjjänwa, janirakiw khitis uka markat amtasjjänti. Nueva York markankir Museo de Arte Metropolitano ukan mä qellqataparjamajja, tiempompejj “Nínive markajj qʼala allintatäjjänwa, jaqenakajj Biblia liytʼasakiw uka markan utjatap yatipjjäna”. Mä organizacionajj Internetankir mä paginapan akham siwa: “1800 mara qalltanakanjja, Asiria markan capitalapan utjatap janiw khitis yatkänti” sasa (Biblical Archaeology Society Online Archive). Ukampis 1845 maranjja, Austen Henry Layard arqueologojj Nínive markwa jikjjatäna. Kunanaktï jikjjatkäna ukanakajj Nínive markajj wali jachʼätapwa uñachtʼayäna.
Nínive markat Biblian parlki uka profecianakan taqpach phoqasitapajja, jichha tiempon utjki uka potencia mundialanakat parlir profecianakajj taqpachaw phoqasini sasin confiyañatakiw yanaptʼistu (Dan. 2:44; Apoc. 19:15, 19-21).
