Diosajj mä suma regalo churistu, Juparojj oración toqew jakʼachassna, kunjamas jikjjatastan uksa yatiyaraksnawa. David profetajj akham sänwa: “Jumajj mayisitanakar istʼirïtawa. Taqe jaqenakaw jumarojj [jakʼachasipjjätam]” sasa (Salmo 65:2). Ukampis ¿kunjamsa Diosarojj jiwasar istʼañapatakisa bendisiñapatakis orasiñasa?

Salmo 62:8 textojj ‘chuymam jupar jistʼaram’ sasaw sistu. Diosar mayiskasajja, kunjamas jikjjatastan ukwa taqe chuyma awistʼassna. Taqe Chʼamani Diosajj chuymatpach mayisitasjja wali valoranit uñji.

Diosarojj kunayman sutiñchanakampis uñtʼaskchejja, mä sapa sutinikiwa. ‘Nayajj Jehová satätwa, ukarakiw sutijajja’ (Isaías 42:8, TNM). Sagrado Qellqatanakanjja, Diosan Jehová sutipajj mä paqallqo waranqa kutiw uñsti. Walja profetanakajja, sutipat aytasisaw Jupar jakʼachasipjjerïna. Abrahán profetajj akham sänwa: “[Jehová] perdonit nayan ukham jumar parlatajjata” sasa (Génesis 18:27). Jiwasajja, ukhamarakiw Diosarojj Jehová sutip aytasis mayisiñasa.

Diosarojj kuna arutsay mayiskstanjja, kuntï amuyktan kunjamatï jikjjatasktan uk amuyistuwa. Arupajj akham siwa: “Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakajja, jupan katoqatäpjjewa” sasa (Hechos 10:34, 35).

Ukampis Diosan jiwasar bendisiñapatakejja, janiw orasiñ mayakejj wakiskiti. Akjjar jutki uka yatichäwinakanwa kunanakampsa lurañasa uk yatjjataskañäni.