Suma amtanakaruw puriñasa: ¿Kunatsa ukham lurañamajj wali wakiskirejja?
Sum sarnaqañ toqet kuna amtarutï purkañäni ukarjamaw kusisit jakasiñäni, jan ukajj kunayman jan walinakansa uñjasiñäni. Jehová Diosajj uk sum yati, ukatwa leyinakaparjam sarnaqañas muni.
Diosajj kusisita sum jakasiñaswa muni.
“Naya Jehová Diosajj juman Diosamätwa, khititï juman askimatak yatichktam ukajj nayätwa, khititï sarañamäki uka thaknam irpktam ukajj nayätwa. Jumatï mandamientonakajar istʼasma ukhajja, sumankañamajj mä jawirar uñtasitäspawa, justiciamajj lamar qotan oladanakapjam jan tukuskirïspawa” (Isaías 48:17, 18).
Taqenejj janiw mä igualak jakasktanti, ukampis kunjamsa kusisit jakassna uk Jehová Diosakiw yati. Jupajj Biblian suma ewjjtʼanakaparjam sarnaqañaswa muni, kuna laykutejj ukakiw sum jakasiñatak yanaptʼistaspa. Jiwasatï Diosan leyinakaparjam sarnaqañäni ukhajja, taqe kunas jakäwisan sumaruw sarani. Ukatjja suma amtanakaruw purirakiñäni, ukham luratasat kusisitaw sumankañan jakasiñäni.
Diosajj janiw kunatï chʼamäki uk maykistuti.
“Aka urun nayajj churasipksma uka mandamientojja janiw jumanakatakejj sinti chʼamäkiti, janirakiw jan phoqañjamäkiti” (Deuteronomio 30:11).
Diosan leyinakaparjam sum sarnaqañatakejja, inas amuyusana ukat luratasan cambionak lurañajj wakischini. Ukampis Jehová Diosajj janiw kunatï jiwasatak chʼamäki uk maykistuti. Jupajj Luririsjamajja, qhawqsa lurirjamätan uk sumwa yati. Diosar jukʼamp sum uñtʼtan ukhajja, “mandamientonakap phoqañajj janiw chʼamäkiti” (1 Juan 5:3).
Jehová Diosajj jupar serviñ ajllipki ukanakarojj yanaptʼapuniwa.
“Naya Jehová Diosamaw kupi amparam katjjasiskta, nayaw jumarojj akham sissma: ‘Jan ajjsaramti. Nayaw yanaptʼaskäma’ sasa” (Isaías 41:13).
Jehová Diosan leyinakaparjam sarnaqañatakejj taqeniw chʼamachassna, kuna laykutejj Jehová Diosajj janiw sapak jaytkistuti. Jupajj Biblia toqew yanaptʼistu, chʼamañchtʼistu, mä suma suytʼäwsa churarakistu.
Biblian ewjjtʼanakaparjam sarnaqasajja, oraqpachankir walja millón jaqenakaw kusisit jakasipjje. ¿Janit jumajj Bibliamp yanaptʼayaskarakisma? ¿Biblian suma ewjjtʼanakap yatjjatañ munasmati? Ukhamächi ukhajja, ¡Wiñayatakiw kusisit jakasisma! sat folletot yatjjatañwa qalltasma. Uka folletjja Internetan jw.org cheqatwa gratisak apaqasma, ukanjja aka kimsa yatichäwinakaw utji:
-
¿Kunjamsa Bibliajj sum jakasiñatak yanaptʼiristam?
-
Bibliajj jutïrin sum jakasiñatwa parli
-
¿Bibliajj confiykañati?
Biblia sum yatjjatañajja, sapürunjam sum jakasiñatakiw yanaptʼiristam. Cheqansa Diosan Arunakapajj “confiykañapuniwa, jichhasa wiñayatakisa” (Salmo 111:8). Biblian suma ewjjtʼanakaparjam sarnaqañajj wali askipuniwa, ukampis ukarjam sarnaqañatakejj janiw Diosajj khitirus obligkiti (Deuteronomio 30:19, 20; Josué 24:15). Ukjja sapa mayniw amtjjañasa.
