Мүгәддәс Китаб һәјатлары дәјишир

Күпүнә ҝирирдим (ЛУКА ШУТС).

ДОҒУЛДУҒУ ИЛ: 1975

ӨЛКӘ: СЛОВЕНИЈА

КЕЧМИШДӘ: ИЧКИ ДҮШКҮНҮ

КЕЧМИШИМ. Мән Словенијанын пајтахты Лјублианада анадан олмушам. Дөрд јашыма кими гајғысыз һәјат сүрмүшәм. Һәмин вахт атам ҹанына гәсд етди. Бу фаҹиәдән сонра анам мәни вә бөјүк гардашымы бөјүтмәк үчүн мин бир әзијјәтлә ишләмәли олду.

Он беш јашымда нәнәмҝиллә јашамаға башладым. Онларда галмаг хошума ҝәлирди. Достларымын чоху онларын гоншулуғунда јашајырды. Һәм дә бурда өзүмү даһа азад һисс едирдим, нәинки евдә оланда. Он алты јашым оланда һәфтәсонлары ички ичән инсанларла отуруб-дурмаға башладым. Һәмин вахт сачымы узадырдым, үсјанкарлығы әкс етдирән ҝејимләр ҝејинирдим, сонрадан исә сигарет чәкмәјә башладым.

Бир нечә нөв наркотик гәбул еләсәм дә, ән чох ички ичмәји севирдим. Әввәлләр бир нечә гәдәһ шәраб ичирдимсә, ҝетдикҹә бир дәфәјә бир нечә бутулка гуртарырдым. Чох ичсәм дә, ичкили олдуғуму мәһарәтлә ҝизләдә билирдим. Ичкили олдуғуму јалныз ағзымдан спиртин ији ҝәләндә билирдиләр. Бунунла белә һеч кәс бир нечә литр шәраб вә пивә, үстүндән дә араг ичдијими тута билмирди.

Дискотекадан евә гајыданда чох вахт мән достларымын голуна ҝирирдим ки, јыхылмасынлар. Һалбуки мән онлардан икигат чох ичирдим. Бир дәфә бир достумун мәним барәмдә «о, күпүнә ҝирәндир» дедијини ешитдим. Онун бу сөзләри гәлбими јаралады.

Һәмин вахтдан сонра һәјатым барәдә ҹидди дүшүнмәјә башладым. Өзүмү чох дәјәрсиз һисс едирдим. Мәнә елә ҝәлирди ки, мән бу һәјатда һеч бир ишә јарамырам.

МҮГӘДДӘС КИТАБ ҺӘЈАТЫМЫ ДӘЈИШДИ. Һәјатымы бош шејләрә сәрф етдијими дүшүнәндән гыса мүддәт сонра фикир вердим ки, синиф јолдашларымдан бири даһа мүлајим инсан олуб. Онун бу ҹүр дәјишмәси марағыма сәбәб олду. Одур ки, бунун сәбәбини өјрәнмәк үчүн ону кафејә дәвәт еләдим. Сөһбәт әснасында о деди ки, Јеһованын Шаһидләри илә Мүгәддәс Китабы өјрәнмәјә башлајыб. Өјрәндији шејләрдән бәзиләрини мәнә данышды. Данышдыгларынын һамысы мәним үчүн јени иди, чүнки һеч вахт килсәјә ҝетмәмишдим, Мүгәддәс Китабы әлимә алыб охумамышдым. Јеһованын Шаһидләринин ибадәт ҝөрүшләринә ҝетмәјә вә Мүгәддәс Китабы өјрәнмәјә башладым.

Мүгәддәс Китабдан чохлу һәгигәтләр өјрәндим. Бунларын сајәсиндә һәјатымда дәјишиклик етмәк үчүн өзүмдә ҝүҹ тапдым. Мәсәлән, Мүгәддәс Китабдан өјрәндим ки, биз ахырзаманда јашајырыг (2 Тимутијә 3:1—5). Һәм дә өјрәндим ки, Аллаһ тезликлә јер үзүндән пис инсанларын көкүнү кәсәҹәк, мөмин инсанлара исә Ҹәннәтдә әбәди јашамаг имканы верәҹәк (Зәбур 37:29). Бүтүн бунлар мәндә һәјатымы дәјишиб, мөмин инсанларын арасында олмаг истәји јаратды.

Мүгәддәс Китабдан өјрәндијим биликләри достларымла бөлүшмәјә башладым. Чохлары мәни буна ҝөрә әлә салырды, амма онларын бу ҹүр мүнасибәти мәнә ҝөзләмәдијим тәрздә көмәк еләди. Баша дүшдүм ки, онлар әсл дост дејилләрмиш вә мәним ички проблемим әсас етибарилә кимләрлә отуруб-дурмағымдан асылы имиш. Онлар һәфтәсонуну һәсрәтлә ҝөзләјирдиләр ки, сәрхош оланаҹан ичсинләр.

Бу достларымла әлагәми кәсдим. Јеһованын Шаһидләринин арасындан газандығым јени достларла вахт кечирмәјә башладым. Аллаһы севән, Онун гајда-ганунлары илә јашајан инсанларла отуруб-дурмаг мәни чох руһландырырды. Тәдриҹән сәрхошлуг етмәк вәрдишимин өһдәсиндән ҝәлдим.

МӘНӘ ФАЈДАСЫ. Јеһоваја шүкүр, хошбәхтлији даһа ичкидә ахтармырам. Әҝәр сәрхошлуг етмәјә давам еләсәјдим, ким билир, ахырым неҹә олаҹагды. Амма әминликлә дејә биләрәм ки, инди даһа мәналы һәјат сүрүрәм.

Једди илдир ки, Јеһованын Шаһидләринин Словенијадакы филиалында хидмәт едирәм. Јеһованы таныјандан вә Она ибадәт едәндән бәри һәјатым инди даһа мәналыдыр.