Ваиз 8:1—17
8 Һикмәтли адама ким тај ола биләр? Мүшкүлүн һәллини ким тапа биләр? Инсанын һикмәти чөһрәсини нурландырар, сәрт үзүнү јумшалдар.
2 Бах, дејирәм: «Аллаһа ичдијин анда ҝөрә падшаһын фәрманына гулаг ас».+
3 Падшаһын һүзурундан чыхмаға тәләсмә.+ Пислијин тәрәфиндә дурма.+ Чүнки падшаһ истәдијини едә биләр,
4 ахы онун сөзү мүтләгдир,+ ким она: «Нә едирсән?» — дејә биләр.
5 Әмрә әмәл едән зәрәр ҝөрмәз.+ Һикмәтли үрәк вахты вә гајданы билир.+
6 Чүнки һәр шејин өз вахты вә өз гајдасы вар,+ ахы инсанларын дәрд-бәласы чохдур.
7 Нә олаҹағыны һеч ким билмир, бәс онда ким дејә биләр, нә неҹә олаҹаг?
8 Неҹә ки һеч кимин руһ үзәриндә һөкмү, руһу тутуб сахламаға игтидары јохдур, өлүм ҝүнү үзәриндә дә һеч кимин һөкмү јохдур.+ Мүһарибә заманы һеч ким тәрхис олунмадығы кими, пислик дә гојмаз ки, пислик едәнләр ҹанларыны гуртарсын*.
9 Ҝүнәш алтында едилән бүтүн ишләри үрәјимдә ҝөтүр-гој едәндән сонра бунлары өјрәндим. Бүтүн дөврләрдә инсанын инсана ағалыг етмәси инсанын зәрәринә олуб.+
10 Бир вахтлар мүгәддәс мәскәнә ҝириб-чыхан писләрин дәфнини ҝөрдүм, амма бу ҹүр даврандыглары шәһәрдә тезликлә јаддан чыхдылар.+ Бу да пучдур.
11 Пис әмәлә ҝөрә ҹәза тез верилмәдији үчүн инсанларын үрәји пислик етмәјә ҹүрәтләнир.+
12 Буну билирәм ки, ҝүнаһкар јүз дәфә пислик едиб узун өмүр сүрсә дә, јенә Аллаһдан горханлар хејир тапаҹаг, чүнки онлар Аллаһдан горхурлар.+
13 Амма пис адамын ахыры јахшы олмајаҹаг.+ О, көлҝәјә бәнзәр ҝүнләрини узада билмәјәҹәк,+ чүнки Аллаһдан горхмур.
14 Јер үзүндә пуч бир шеј вар: елә инсан вар ки, салеһдир, амма онунла шәр иш ҝөрән адам кими давранырлар,+ елә инсан да вар ки, писдир, амма инсанлар она салеһләрә лајиг мүнасибәт бәсләјирләр.+ Дедим ки, бу да пучдур.
15 Она ҝөрә дә севиниб-шадланмағы төвсијә етдим,+ чүнки ҝүнәш алтында инсан үчүн јејиб-ичмәкдән вә шад олмагдан јахшы шеј јохдур. Бу, Аллаһын ҝүнәш алтында вердији һәјатда инсанын чәкдији зәһмәтлә гоша олмалыдыр.+
16 Мән үрәјимдә нијјәт етдим ки, ҝеҹә-ҝүндүз јуху билмәдән һикмәт газаным, јер үзүндә едилән ишләри ҝөрүм*.+
17 Сонра Аллаһын бүтүн ишләринә фикир вердим вә баша дүшдүм ки, инсан ҝүнәш алтында баш верәнләри дәрк едә билмәз.+ Инсан нә гәдәр әлләшиб-вурушса да, буну дәрк едә билмәз. Һәтта мүдрик олдуғуну, буну дәрк едәҹәјини десә дә, јенә дәрк едә билмәз.+
Һашијәләр
^ Диҝәр вариант: пислик јијәсинин ҹаныны гуртармаз.
^ Диҝәр вариант: мән үрәјимдә нијјәт етдим ки, һикмәт газаным, јер үзүндә едилән ишләри, инсанларын ҝеҹә-ҝүндүз јуху билмәдән етдији ишләри ҝөрүм.
