2 Салнамәләр 25:1—28
25 Амисај ијирми беш јашында тахта чыхды вә ијирми доггуз ил Јерусәлимдә һакимијјәт сүрдү. Онун анасы јерусәлимли Јәһуәддән иди.+
2 Амисај Јеһованын бәјәндији ишләри ҝөрүрдү, амма буну сидги-үрәкдән етмирди.
3 Һакимијјәт әлиндә мөһкәмләнән кими Амисај атасы падшаһы гәтлә јетирән әјанлары өлдүрдү.+
4 Амма гатилләрин оғулларыны өлдүрмәди. Төвратда*, Мусанын китабында јазыланлара ујғун давранды. Орада Јеһова бујурмушду: «Ата өвладына ҝөрә, өвлад да атасына ҝөрә өлмәмәлидир. Һәр кәс өз ҝүнаһына ҝөрә өлмәлидир».+
5 Амисај јәһудалылары бир јерә топлады. О, јәһудалылары, бинјаминлиләри минбашыларын вә јүзбашыларын башчылығы алтында нәсилләринә ҝөрә дүздү.+ Ијирми вә бундан јухары јашда оланлары сијаһыја алды.+ Дөјүшә габил, низә вә галхан дашыјан, тәлим алмыш дөјүшчүләрин сајы 300 000 нәфәр олду.
6 Сонра о, 100 талант* ҝүмүш вериб Исраилдән 100 000 нәфәр иҝид дөјүшчү тутду.
7 Бир Аллаһ адамы онун јанына ҝәлиб деди: «Еј падшаһ, гој Исраил ордусу сәнинлә ҝетмәсин.+ Јеһова Исраили, әфраимлиләри тәрк едиб.
8 Өзүн тәк ҝет. Ҹәсур ол, дөјүшә атыл. Јохса Аллаһ сәни дүшмәнләринә тәслим едәр. Аллаһ сәнә көмәк дә едә биләр,+ дүшмәнә тәслим дә едә биләр».
9 Онда Амисај Аллаһ адамына деди: «Бәс Исраил дөјүшчүләринә вердијим 100 талант неҹә олсун?» Аллаһ адамы деди: «Аллаһ сәнә ондан да артығыны верә биләр».+
10 Амисај Әфраимдән онун јанына ҝәлмиш гошуну ҝеријә, өз мәмләкәтинә ҝөндәрди. Онлар Јәһудаја бәрк һирсләндиләр, гызғын гәзәблә өз мәмләкәтләринә гајытдылар.
11 Амисај ҹәсарәтини топлајыб гошунларыны Дуз вадисинә+ апарды. О, 10 000 саирлини+ гырды.
12 Јәһудалылар 10 000 нәфәри дири-дири әлә кечирдиләр. Онлары учурумун кәнарына ҝәтириб ашағы атдылар. Һамысы тикә-парча олду.
13 Бу арада Амисајын дөјүшә апармајыб ҝери ҝөндәрдији гошун+ Сәмәријјәдән+ Бејт-Һуруна+ гәдәр бүтүн Јәһуда шәһәрләринә басгын етди. Онлар 3000 нәфәри өлдүрдүләр вә чохлу гәнимәт әлә кечирдиләр.
14 Амисај әдумиләри гырыб гајыданда саирлиләрин аллаһларыны ҝәтириб өз аллаһы етди.+ Гаршыларында баш әјиб онлара гурбан түстүсү тәгдим етди.
15 Јеһова Амисаја бәрк гәзәбләнди. Онун јанына пејғәмбәр ҝөндәрди. Пејғәмбәр она деди: «Өз халгыны сәнин әлиндән гуртара билмәјән аллаһлара нијә баш әјдин?»+
16 Падшаһ онун сөзүнү ағзында гојуб деди: «Мәҝәр сәни падшаһын мәсләһәтчиси гојублар?+ Өлмәк истәмирсәнсә, кәс сәсини!»+ Пејғәмбәр ҹавабында: «Бирҹә буну билирәм ки, бу әмәлинә ҝөрә, мәнә гулаг асмадығына ҝөрә Аллаһ сәни мәһв етмәји гәт едиб»+, — деди вә сусду.
17 Јәһуда падшаһы Амисај мәсләһәтчиләри илә мәшвәрәт едәндән сонра Исраил падшаһы Јәһу оғлу Јәһәзин оғлу Јуәсә исмарыҹ ҝөндәрди: «Чых мејдана, дөјүшәк!»+
18 Исраил падшаһы Јуәс Јәһуда падшаһы Амисаја ҹаваб верди: «Ливанда гангал сидр ағаҹына хәбәр ҝөндәрди: “Гызыны оғлума вер”. Амма бир чөл һејваны гангалы тапдалајыб кечди.
19 Сән дејирсән: “Мән Әдуму дармадағын етмишәм”.+ Она ҝөрә дә үрәјин гүрурланыб. Ҝет отур евиндә. Сәнә лазымдыр ки, башына бәла ачыб Јәһуданы да өзүнлә бәрабәр учурума сүрүкләјәсән?»
20 Амма Амисај гулаг асмады.+ Бу иш Аллаһдан иди ки, онлары дүшмән әлинә тәслим етсин,+ чүнки онлар Әдум аллаһларына сәҹдә едирдиләр.+
21 Беләликлә, Исраил падшаһы Јуәс ҝәлди вә Јәһуда падшаһы Амисајла Јәһуданын Бејт-Шәмс+ шәһәриндә гаршылашды.
22 Јәһудалылар Исраилә мәғлуб олдулар. Һәр кәс өз евинә гачды.
23 Исраил падшаһы Јуәс Бејт-Шәмсдә Јәһуда падшаһы Јәһәз* оғлу Јуәсин оғлу Амисајы әсир ҝөтүрүб Јерусәлимә ҝәлди. Јуәс Әфраим дарвазасындан+ Күнҹ дарвазаја+ гәдәр Јерусәлим диварынын 400 гулаҹыны* учуртду.
24 О, Аллаһын мәбәдиндә Абид-Әдумун ихтијарында олан вә сарајын хәзинәсиндә олан бүтүн гызыл-ҝүмүшү вә әшјалары ҝөтүрүб+ әсирләрлә бирликдә Сәмәријјәјә апарды.
25 Јәһуда падшаһы Јуәс+ оғлу Амисај+ Исраил падшаһы Јәһәз оғлу Јуәсин өлүмүндән сонра он беш ил јашады.+
26 Амисајын галан ишләри, илк ишләриндән сон ишләринә гәдәр һамысы Јәһуда вә Исраил падшаһларынын китабында јазылыб.
27 Амисај Јеһованын јолундан дөнәндән сонра Јерусәлимдә она гаршы суи-гәсд гурдулар.+ О, Лаһишә гачды. Амма далынҹа адамлар ҝөндәриб ону орада өлдүрдүләр.
28 Ҹәсәдини атларын үстүндә ҝәтириб Јәһуда шәһәриндә ата-бабаларынын јанында дәфн етдиләр.
Һашијәләр
^ Талант 34,2 кг-а бәрабәрдир. Б14 әлавәсинә бах.
^ Диҝәр ады Әһәзја.
^ Тәх. 178 м. Б14 әлавәсинә бах.
