1, 2. а) Иса шаҝирдләрини нә барәдә хәбәрдар етмишди? б) Нәјә ҝөрә шаҝирдләр Исаны гојуб гачдылар? (Һәмчинин шәкилләрә бахын.)

 «РУҺ шөвглү, ҹисим исә зәифдир» a (Мәт. 26:41б). Иса Мәсиһ бу сөзләрлә ҝүнаһа мејилли олдуғумузу баша дүшдүјүнү ҝөстәрмишди. Онун сөзләриндә һәм дә ваҹиб бир хәбәрдарлыг вар иди: өзүмүзә чох архајын олмамалыјыг. Иса Мәсиһ бу сөзләри демәмишдән бир нечә саат әввәл шаҝирдләри гәтијјәтлә һеч вахт ондан ајрылмајаҹагларыны билдирмишдиләр (Мәт. 26:35). Онлар дүзҝүн давранмаг нијјәтиндә идиләр. Амма чәтинлијә дүшәндә гәтијјәтләринин асанлыгла сынаҹағыны һеч ағылларынын уҹундан да кечирмәздиләр. Елә буна ҝөрә дә Иса демишди: «Сајыг олун вә даима дуа един ки, ҝүнаһа јол вермәјәсиниз» (Мәт. 26:41а).

² Тәәссүф ки, шаҝирдләр сајыг галмадылар. Бәс бунун нәтиҹәси неҹә олду? Иса һәбс олунанда шаҝирдләри онун јанында галдылар, јохса горхуб гачдылар? Еһтијаты әлдән вердикләри үчүн шаҝирдләр «һеч вахт етмәрәм» дедикләри шеји етдиләр — Исаны гојуб гачдылар (Мәт. 26:56).

3. а) Јеһоваја садиг галмаг үчүн нәјә ҝөрә өзүмүздән чох архајын олмамалыјыг? б) Бу мәгаләдә нәји арашдыраҹағыг?

³ Биз өзүмүзә һәддән артыг архајын олмамалыјыг. Дүздүр, Јеһованы наразы салаҹаг һәр бир шејдән узаг дурмаг нијјәтиндәјик. Амма ону да нәзәрә алмалыјыг ки, биз гејри-камилик вә нәфс бизә асанлыгла үстүн ҝәлә биләр (Ром. 5:12; 7:21—23). Гәфләтән елә бир вәзијјәтә дүшә биләрик  ки, һәмин ан ҝүнаһ етмәк истәји ҝүҹлү олар. Јеһоваја вә Исаја сәдагәтимизи горумаг үчүн Исанын вердији мәсләһәтә ујғун давранмалыјыг — ҝүнаһа јол вермәмәк үчүн сајыг олмалыјыг. Мәгалә бизә бу саһәдә көмәк едәҹәк. Нөвбәти суаллара ҹаваб тапаҹағыг: «Һансы саһәләрдә ҝөздә-гулагда олмаг хүсусилә ваҹибдир? Ҝүнаһдан өзүмүзү неҹә горуја биләрик? Неҹә сајыг гала биләрик?»

ҺАНСЫ САҺӘЛӘРДӘ АЈЫГ-САЈЫГ ОЛМАЛЫЈЫГ?

4, 5. Нәјә ҝөрә һәтта кичик ҝүнаһлардан да өзүмүзү ҝөзләмәлијик?

⁴ Нисбәтән кичик сајылан ҝүнаһлар белә, Јеһова илә мүнасибәтимизи зәифләдә биләр. Һәтта онлар даһа ҹидди ҝүнаһлара ҝәтириб чыхарар.

⁵ Һамымыз ҝүнаһа сөвг едән сынагларла үзләширик. Амма һәрәмизин өз зәиф ҹәһәти вар вә мүәјјән вәзијјәтлә үзләшәндә мөһкәм галмаг даһа чәтин олур. Мәсәлән, кимиси ҹинси әхлагсызлыг етмәк истәји илә мүбаризә апарыр. Кимисиндә мастурбасија етмәк вә ја порнографијаја бахмаг кими натәмиз әмәлләрә ҝүҹлү мејил вар. Кимиси исә инсан горхусу илә, мүстәгиллик руһу илә мүбаризә апарыр, јахуд да тез өзүндән чыхыр. Јагуб демишкән, «һәр кәс өз нәфси илә товланыб алданараг сынаныр» (Јаг. 1:14).

6. Һансы мәсәләдә дүрүст олмалыјыг?

⁶ Бәс сизин ән чох һансы саһәдә зәифлијиниз вар? Зәифликләринизи данмаг вә ја ҝүҹлү олдуғунузу, һеч вахт ҹидди ҝүнаһ етмәјәҹәјинизи дүшүнмәк чох тәһлүкәлидир (1 Јәһ. 1:8). Һәвари Булус да демишди ки, һәтта «јеткин мәсиһиләр» белә өзләриндән муғајат олмасалар, јолдан чыха биләрләр (Гал. 6:1). Биз өзүмүзә гаршы дүрүст олмалыјыг вә зәиф ҹәһәтләримизи билмәлијик (2 Кор. 13:5).

7. Һансы саһәдә хүсусилә еһтијатлы олмалыјыг? Нүмунә чәкин.

⁷ Тутаг ки, бизи ән чох нәјин јолдан чыхардығыны артыг билирик. Бәс бундан сонра нә етмәлијик? Она гаршы дурмаг баҹарығымызы мөһкәмләндирмәлијик. Бир нүмунәјә бахаг. Мүгәддәс Китабын јазылдығы дөврдә шәһәрин ән зәиф һиссәси дарвазалар иди. Она ҝөрә дә дарвазалар даһа ҹидди мүһафизә олунурду. Ејнилә, биз дә зәиф олдуғумуз саһәләрдә хүсусилә еһтијатлы олмалыјыг (1 Кор. 9:27).

 ҜӨЗДӘ-ГУЛАГДА ОЛУН

8, 9. Мәсәлләр 7-ҹи фәсилдә бәһс олунан оғлан нәләри етмәсәјди, ҹидди ҝүнаһ ишләмәзди? (Мәсәлләр 7:8, 9, 13, 14, 21).

⁸ Ҝүнаһ етмәкдән өзүмүзү неҹә горуја биләрик? Ҝәлин Мәсәлләр 7-ҹи фәслә нәзәр салаг. Ҝөрәк орада бәһс олунан ҝәнҹ оғландан һансы ибрәти ҝөтүрә биләрик. О, позғун бир гадынла әхлагсызлыг етди. 22-ҹи ајәдә јазылыб: «Ҹаван... онун ардынҹа ҝетди». Ҝөрүнүр о, гадынын тәләсинә гәфил дүшүр. Амма өнҹәки ајәләрә әсасән, ҹаван оғлан бундан әввәл бәзи аддымлар атмышды вә бу, тәдриҹән онун ҝүнаһ етмәсинә ҝәтириб чыхартды.

⁹ Бу һансы аддымлар иди? Әввәла, о, һәмин ахшам «[позғун] гадынын евинин тининдән кечирди». Сонра онун евинә тәрәф ҝетди. (Мәсәлләр 7:8, 9 ајәләрини охујун.) Даһа сонра бу оғлан гадыны ҝөрәндә јолуну дәјишмәди. Гадынын ону өпмәсинә иҹазә верди. Һәм дә ҝәтирдији јандырма гурбанлары барәдә данышанда она гулаг асды. Јәгин, гадын буну демәклә ҝөстәрмәк истәјирди ки, пис јолун јолчусу дејил. (Мәсәлләр 7:13, 14, 21 ајәләрини охујун.) Әҝәр оғлан вәзијјәтин бу јерә ҝәлиб чыхмасына јол вермәсәјди, онда нә нәфс ојанарды, нә дә ҝүнаһ едәрди.

10. Бу ҝүн мәсиһиләр ҝәнҹ оғланын сәһвини неҹә тәкрарлаја биләр?

¹⁰ Бу һадисә Јеһованын һәр бир хидмәтчиси илә нә баш верә биләҹәјини ҝөстәрир. Инсан ҹидди ҝүнаһ ишләјиб, сонра да дүшүнә биләр ки, һәр шеј гәфил баш верди. Ја да белә дејә биләр: «Һеч өзүм дә билмәдим неҹә олду». Амма о, баш верәнләр һагда бир аз дүшүнсә, ҝөрәр ки, атдығы бәзи јанлыш аддымлар бу ҝүнаһы етмәсинә ҝәтириб чыхарыб. Бәлкә дә отуруб-дурдуғу инсанлар, әјләнҹә сечими пис олуб, ја да дахил олдуғу сајтлар, ҝетдији јерләр мәсиһијә јарашмајан олуб. Ола билсин, о, даһа дуа етмирди, Мүгәддәс Китабы охумурду, ибадәт ҝөрүшләриндә вә тәблиғ хидмәтиндә иштирак етмирди. Бәли, «Мәсәлләр» китабындакы оғлан кими белә инсан да ҝүнаһы һеч дә гәфил етмир.

11. Ҝүнаһ етмәмәк үчүн өзүмүзү нәләрдән ҝөзләмәлијик?

¹¹ Өзүмүз үчүн һансы нәтиҹәни чыхарырыг? Биз тәкҹә ҝүнаһдан јох, ҝүнаһа апаран аддымлардан да өзүмүзү ҝөзләмәлијик. Сүлејман пејғәмбәрин сөзләриндән буну ајдын ҝөрмәк олар. О, позғун гадынла ҹаван оғланын һадисәсини данышандан сонра белә дејир: «Мәбада онун кечдији јола гәдәм гојасан» (Мәс. 7:25). О, позғун гадынла бағлы бу сөзләри дә ишләдир: «Белә гадындан узаг ҝәз, евинин гапысына јахын ҝетмә» (Мәс. 5:3, 8). Бәли, ҝүнаһ етмәмәк үчүн биз ҝүнаһа ҝәтириб чыхаран вәзијјәтләрдән узаг олмалыјыг b. Һәтта бу елә вәзијјәтләр, елә мәшғулијјәтләр ола биләр ки, үмумиликдә мәсиһиләр үчүн гәбаһәт сајылмасын. Амма билирик ки, буну биз етсәк, тамаһымыза үстүн ҝәлмәк бизә чәтин олаҹаг (Мәт. 5:29, 30).

12. Әјјуб нәјә гәти гәрарлы иди вә бу она ҝүнаһдан узаг дурмаға неҹә көмәк етмишди? (Әјјуб 31:1).

¹² Ҝүнаһа апарыб чыхаран вәзијјәтләрдән гачмаг үчүн биз бәзи шејләрлә бағлы гәти мөвге тутмалыјыг. Әјјуб пејғәмбәр мәһз белә етмишди. О, башга гадына пис ҝөзлә бахмамаг үчүн ҝөзләри илә әһд бағламышды. (Әјјуб 31:1 ајәсини охујун.)  Әјјубун бу саһәдә гәтијјәтли олмасы ону зина етмәкдән чәкиндирмишди. Биз дә ҝүнаһа ҝәтириб чыхара биләҹәк вәзијјәтләрдән гачмаг үчүн гәти гәрарлы олмалыјыг.

13. Нәјә ҝөрә дүшүнҹәмизә һаким олмалыјыг? (Һәмчинин шәкилләрә бахын.)

¹³ Биз һәм дә дүшүнҹәләримизә һаким олмалыјыг (Чых. 20:17). Бәзиләри белә һесаб едир: «Јанлыш шејләрин фантазијасыны гурмагда пис бир шеј јохдур, өзүм ки буну етмирәм». Амма бу ҹүр дүшүнмәк сәһвдир. Јанлыш фикирләр ҝүнаһ етмәк истәјини ҝүҹләндирир. Бир нөв, инсан өзү үчүн сынаг јарадыр, сонра да бу сынагла мүбаризә апармалы олур. Әлбәттә, һәрдән ағлымыза Јеһоваја мәгбул олмајан фикирләр ҝәләҹәк, амма әсас одур ки, биз белә фикирләри дәрһал ағлымыздан говуб, јерини јахшылары илә долдураг. Онда бу ҹүр фикирләрин шиддәтли истәјә чеврилмәсинә јол вермәјәҹәјик вә беләҹә, ҝүнаһ ишләмәјәҹәјик (Филип. 4:8; Кол. 3:2; Јаг. 1:13—15).

14. Ҝүнаһ етмәмәјимизә башга нә көмәк едә биләр?

¹⁴ Ҝүнаһ етмәкдән өзүмүзү даһа неҹә горуја биләрик? Биз там әмин олмалыјыг ки, Јеһованын ганунларына итаәт етмәк бизим хејримизәдир. Бәзән дүшүнҹәмизин вә арзуларымызын Аллаһа мәгбул олмасы үчүн әмәлли-башлы мүбаризә апармаг лазым ҝәлир. Амма дујаҹағымыз гәлб раһатлығына ҝөрә бу мүбаризәни апармаға дәјәр.

15. Дүзҝүн давранмаг истәји бизи ҝүнаһдан неҹә горујаҹаг?

¹⁵ Биз өзүмүздә дүзҝүн давранмаг истәјини ҝүҹләндирмәлијик. Әҝәр јахшылығы севиб, пислијә нифрәт етсәк, Јеһованын бәјәндији кими давранмаға даһа гәтијјәтли олаҹағыг вә ҝүнаһа апаран вәзијјәтләрдән узаг дураҹағыг (Амс. 5:15). Бундан әлавә, үрәјимиздә дүзҝүн давранмаг истәји олдуғу үчүн ҝөзләнилмәдән бизи сынаға чәкән вәзијјәтлә үзләшәндә она гаршы дура биләҹәјик.

16. Руһани ишләрлә мәшғул олмаг бизи ҝүнаһ етмәкдән неҹә горујур? (Һәмчинин шәкилләрә бахын.)

 ¹⁶ Бәс дүзҝүн давранмаг истәјини неҹә ҝүҹләндирә биләрик? Баҹардығымыз гәдәр руһани ишләрлә чох мәшғул олмалыјыг. Биз ибадәт ҝөрүшләриндә вә тәблиғ хидмәтиндә иштирак едәндә Јеһованы разы салмаг истәјимиз ҝүҹләнир вә ҝүнаһ етмәк ағлымыздан кечмир (Мәт. 28:19, 20; Ибр. 10:24, 25). Аллаһын Кәламыны мүталиә етмәк, арашдырмаг вә охудугларымызын үзәриндә дүшүнмәк јахшыны севиб, писә нифрәт етмәк истәјимизи ҝүҹләндирәҹәк (Јуш. 1:8; Зәб. 1:2, 3; 119:97, 101). Јадыныздадырса, Иса шаҝирдләринә белә демишди: «Даима дуа един ки, ҝүнаһа јол вермәјәсиниз» (Мәт. 26:41). Дуа едиб сәмави Атамызла вахт кечирәндә Онун көмәјиндән јарарланырыг вә Ону разы салмаг гәтијјәтимиз даһа да артыр (Јаг. 4:8).

ЕҺТИЈАТЫ ҺЕЧ ВАХТ ӘЛДӘН ВЕРМӘЈИН

17. Бутрус һансы зәифлијиндән јаха гуртара билмирди?

¹⁷ Бәзи зәиф ҹәһәтләримиздән тамамилә гуртулмаг мүмкүндүр. Амма, ола биләр, бәзи зәифликләримизлә узун мүддәт мүбаризә апармаг лазым ҝәлсин. Буну һәвари Бутрусун һадисәсиндән ҝөрмәк олар. О, инсан горхусуна гапылыб, Иса Мәсиһи үч дәфә данмышды (Мәт. 26:69—75). Амма сонралар Бутрус Синедрион гаршысында ҹәсарәтлә шаһидлик верәндә адама елә ҝәлә биләрди ки, о, инсан горхусуна галиб ҝәлиб (Һәв. 5:27—29). Һалбуки бир нечә ил сонра Бутрус «сүннәт тәрәфдарларындан горхараг» бир мүддәт гејри-јәһудиләрлә бир сүфрә архасында әјләшмәди (Гал. 2:11, 12). Бутрусун инсан горхусу өзүнү јенидән ҝөстәрди. Ҝөрүнүр о бу зәифлијиндән һеч вахт там гуртула билмәмишди.

18. Бәзи јанлыш мејилләримизлә бағлы нәји унутмамалыјыг?

¹⁸ Ејни вәзијјәтә биз дә дүшә биләрик. Ола билсин, һансыса зәифлијимизин өһдәсиндән ҝәлдијимизи дүшүнүрүк. Амма о, јенидән баш галдыра биләр. Бу, бир гардашын башына ҝәлмишди. О дејир: «Дүз он ил иди ки, порнографијаја бахмырдым вә артыг бу проблемимдән јаха гуртардығыма там әмин идим. Амма, сән демә, бу асылылығым шикарына һүҹум етмәји ҝөзләјән  вәһши һејван кими пусгуда дурубмуш». Тәрифә лајигдир ки, о бу мүбаризәсини дајандырмады. Баша дүшүрдү ки, бу зәифлији илә һәр ҝүн, бәлкә дә бу шәр дүнјанын сону ҝәләнә гәдәр чарпышмалы олаҹаг. Гардаш һәјат јолдашынын вә ағсаггалларын көмәји илә порнографијаја бахмамаг үчүн даһа ҹидди тәдбирләр ҝөрдү.

19. Јаха гуртара билмәдијимиз зәифлијимизлә неҹә мүбаризә апара биләрик?

¹⁹ Јаха гуртара билмәдијимиз зәифлијимизлә неҹә мүбаризә апара биләрик? Бунун үчүн Исанын «сајыг олун» мәсләһәтинә әмәл етмәлијик. Һәтта өзүмүзү ҝүҹлү һисс етдијимиз вахтларда да бизи јолдан чыхаран вәзијјәтләрдән узаг дурмалыјыг (1 Кор. 10:12). Зәифлијинизә јенилмәмәк үчүн бундан сонра да лазыми тәдбирләр ҝөрүн. Мәсәлләр 28:14 ајәсиндә јазылыб: «Һәмишә ҝөздә-гулагда олан кәс бәхтијардыр» (2 Бут. 3:14).

САЈЫГ ГАЛМАҒЫН МҮКАФАТЫ

20, 21. а) Ҝүнаһдан узаг дурмаға чалышсаг, бизи һансы мүкафат ҝөзләјир? б) Өһдәмизә дүшәни етсәк, Јеһова Өз тәрәфиндән нә едәҹәк? (2 Коринфлиләрә 4:7).

²⁰ Әмин олун, ҝүнаһа мејлинизлә мүбаризә апармағыныза дәјәр. Ҝүнаһ инсана «мүвәггәти һәзз» версә дә, Јеһованын ганунларына ујғун јашамаг инсана даһа бөјүк хошбәхтлик ҝәтирәҹәк (Ибр. 11:25; Зәб. 19:8). Чүнки Аллаһ бизи Онун ганунларына ујғун јашамаг үчүн јарадыб (Јар. 1:27). Бунун сајәсиндә һәм виҹданымыз тәмиз олаҹаг, һәм дә ҝәләҹәкдә әбәди һәјат мүкафатыны ала биләҹәјик (1 Тим. 6:12; 2 Тим. 1:3; Јһд. 20, 21).

²¹ Дүздүр, ҹисим зәифдир. Амма бу онун гаршысында аҹиз олдуғумузу ҝөстәрмир. Јеһова бизә ҝүҹ вермәјә һәмишә һазырдыр. (2 Коринфлиләрә 4:7 ајәсини охујун.) Фикир вердинизсә, Јеһованын вердији ҝүҹ инсан ҝүҹүндән үстүндүр. Амма әввәлҹә, биз өзүмүз ҝүнаһла мүбаризә апармаг үчүн ҝүҹ сәрф етмәлијик. Бунунла өз өһдәмизә дүшәни едирик. Онда Јеһова дуамыза ҹаваб олараг бизә әлавә ҝүҹ верәҹәк (1 Кор. 10:13). Бәли, Јеһованын көмәји илә биз сајыглығымызы горујуб ҝүнаһдан узаг ола биләрик.